«Avropa Olimpiya
Oyunları Azərbaycan üçün çox əlamətdar hadisə olacaq»
Dünən Avropa Olimpiya Komitəsinin (AOK)
prezidenti Patrik Hikkinin, Azərbaycan gənclər və idman
naziri Azad Rəhimovun, Yunanıstan Olimpiya Komitəsinin
prezidenti Spiros Kapralosun və baş məsləhətçi
Daq Arnotun iştirakı ilə Koordinasiya Komissiyasının
görüşünün başa çatması münasibətilə
mətbuat konfransı keçirildi.
Tədbirdə
çıxış edən gənclər və idman naziri
Azad Rəhimov ölkəmizdə idmana göstərilən
dövlət qayğısından danışaraq
idmançılarımızın qazandığı nailiyyətlərdən
söz açdı. Bildirdi ki, Avropa Olimpiya Oyunlarının
Azərbaycanda keçirilməsi qərarının qəbul
edilməsində bir neçə amil, ilk növbədə
ölkəmizin beynəlxalq nüfuzu rol oynamışdır.
Avropa
Oyunları Koordinasiya Komitəsi üzvlərinin ölkəmizdə
olduğu müddət ərzində respublikamızın idman
infrastrukturunun təqdimatının keçirildiyini
vurğulayan Azad Rəhimov qeyd etdi ki, artıq qonaqlar Olimpiya kəndində
olmuş və burada idmançılar üçün
yaradılmış şəraiti yüksək qiymətləndirmişlər:
"Ümumiyyətlə, Birinci Avropa Oyunlarına
hazırlıq yüksək səviyyədə davam edir.
Bilirsiniz ki, Bakının ilk Avropa Oyunlarının paytaxtı
seçilməsi 32 beynəlxalq ekspertin geniş müzakirəsindən
sonra qərara alınmışdır. Hazırda Azərbaycana müxtəlif ölkələrdən
ekspertlər dəvət olunurlar. Çalışırıq
ki, ekspertlər Olimpiya Oyunlarını keçirə biləcək
təcrübəyə malik olsunlar. Məsləhətçi
vəzifəsinə Daq Arnot dəvət olunmuşdur. O, 2012-ci
il London Yay Olimpiya Oyunlarının Təşkilat Komitəsində
rəhbər vəzifələrdə yer aldığından
böyük təcrübəyə malikdir. Digər vəzifələrə
də namizədlərə baxılır, onlarla da müqavilə
bağlanılacaq. Mütəxəssislər azərbaycanlı
gənclərlə birgə işləyəcəklər. Gənclərimiz
bunun sayəsində böyük təcrübə toplayaraq
özləri də gələcəkdə yarış
keçirmək üçün lazımi biliyə malik
olacaqlar".
Sonda
Birinci Avropa Olimpiya Oyunlarının 12-28 iyun 2015-ci il tarixləri
arasında təşkil olunacağını diqqətə
çatdıran nazir dedi ki, iddiaçılar idmanın 19
növündə mübarizə aparacaqlar. Siyahıda kamandan
oxatma, üzgüçülük, atletika, badminton, basketbol
(3x3), boks, kanoe, velosiped, çimərlik futbolu, gimnastika,
cüdo, karate, stend atıcılığı, stolüstü
tennis, taekvondo, triatlon, çimərlik voleybolu, güləş
və qılıncoynatma yer almışdı.
Avropa
Olimpiya Komitəsinin (AOK) prezidenti Patrik Hikki bildirdi ki, birgə səylər nəticəsində
Olimpiya hərəkatı tarixində ən yaxşı
oyunlardan birini təşkil etmək hədəfinə nail ola
biləcəyik: "Mən Azərbaycana 5-ci dəfədir ki,
səfər edirəm. Hər gəlişimdə yeni bir
inkişafın şahidi olmuşam. Bakıda çox
böyük inkişaf var. Şəhərinizdə müasir
infrastruktur, xidmət obyektləri tikilir. Şəhər
gündən-günə gözəlləşir. Böyük
işlər görülür, ictimai yerlər, parklar
salınır, binalar bərpa edilir. Biz çox şadıq
ki, Azərbaycan Prezidenti İlham Əliyev eyni zamanda Milli
Olimpiya Komitəsinin prezidentidir. Onunla görüşdük və
əmin olduq ki, həqiqətən də belə bir komanda ilə
işləmək bizim üçün şərəflidir və
daha çox yaddaqalandır. Eyni zamanda Təşkilat Komitəsinin
sədri Mehriban Əliyeva ilə görüşdük. O, Azərbaycan
Gimnastika Federasiyasının prezidentidir. İnanıram ki, azərbaycanlı
həmkarlarımın səyləri nəticəsində ilk
Avropa Oyunları ölkənizdə, sözün əsl mənasında,
uğur qazanacaq, Azərbaycan üçün əlamətdar
hadisə olacaq".
Sonda çıxış edən Koordinasiya Komissiyasının sədri, Yunanıstan Olimpiya Komitəsinin prezidenti Spiros Kapralos dedi ki, bu, məsuliyyətli tədbirdir. Çoxnövlü idman oyunlarına ev sahibliyi etmək çox çətindir. Əsas məqsədimiz bu müddət ərzində oyunları yüksək səviyyədə təşkil etməkdir: "Görüləcək çox iş var. Oyunlarda Avropanın ən qabaqcıl atletləri iştirak edəcəklər. İdman obyektləri fantastikdir. Bu oyunlar Bakı üçün çox gözəl fürsət olacaq. Obyektlərin əksəriyyəti Olimpiya kəndinə yaxındır. Yeni tikilən obyektlər isə vaxtında istifadəyə veriləcək. Çalışacağıq ki, onların sınaqdan keçirilməsinə də vaxt qalsın. İnanırıq ki, bütün ekspertlər Azərbaycan tərəfinə bu möhtəşəm oyunları təşkil etmək işində öz yardımlarını əsirgəməyəcəklər".
Elçin CƏFƏROV
Azərbaycan.-2013.- 1 may.- S.3.