Azərbaycan
Respublikasının Prezidenti yanında
Qeyri-Hökumət Təşkilatlarına Dövlət Dəstəyi
Şurasının fəaliyyətinin dəstəklənməsi
ilə bağlı əlavə tədbirlər haqqında
Azərbaycan Respublikası Prezidentinin Sərəncamı
Azərbaycan
Respublikası Konstitusiyasının 109-cu maddəsinin 32-ci bəndini
rəhbər tutaraq qərara alıram:
1.
Yerli və xarici qeyri-hökumət təşkilatları tərəfindən
sülh və təhlükəsizliyin möhkəmləndirilməsi,
Ermənistan-Azərbaycan, Dağlıq Qarabağ
münaqişəsi barədə həqiqətlərin
dünya ictimaiyyətinə çatdırılması,
Xocalı soyqırımının tanıdılması,
qaçqın və məcburi köçkünlərin
hüquqlarının beynəlxalq məhkəmələrdə
müdafiəsi, ksenofobiya və islamofobiya təzahürlərinə
qarşı mübarizə, insan hüquq və
azadlıqlarının qorunması, vətəndaşların
ictimai fəallığının artırılması,
seçki prosesinin şəffaflığının təmin
olunması və digər istiqamətlərdə təqdim edilən
layihələrin maliyyələşdirilməsi məqsədilə
Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi
Şurasına Azərbaycan Respublikasının 2013-cü il
dövlət büdcəsində nəzərdə tutulmuş
Azərbaycan Respublikası Prezidentinin ehtiyat fondundan 5,0
(beş) milyon manat ayrılsın.
2. Azərbaycan
Respublikasının Nazirlər Kabinetinə
tapşırılsın ki, bir ay müddətində bu Sərəncamla
ayrılmış vəsaitin 5,0 (beş) yüz min
manatını Azərbaycan Respublikasının Prezidenti
yanında Qeyri-Hökumət Təşkilatlarına Dövlət
Dəstəyi Şurasının Katibliyinin maddi-texniki
bazasının möhkəmləndirilməsinə, ştat
vahidləri sayının və işçilərinin
aylıq vəzifə maaşlarının artırılmasına
yönəltsin və bu barədə Azərbaycan
Respublikasının Prezidentinə məlumat versin.
3. Azərbaycan
Respublikasının Maliyyə Nazirliyi bu Sərəncamın
1-ci hissəsində nəzərdə tutulan məbləğdə
maliyyələşməni müəyyən olunmuş qaydada
təmin etsin.
İlham Əliyev,
Azərbaycan Respublikasının
Prezidenti
Bakı şəhəri, 1 may
2013-cü il
Azərbaycan.-2013.- 2 may.- S.4.