«Heydər Əliyev mənim həyatımda»
kitabının təqdimat mərasimi keçirilmişdir
Mayın
3-də "Azərbaycan" qəzetinin Heydər Əliyevin
90 illik yubileyi ilə bağlı hazırladığı
"Heydər Əliyev mənim həyatımda"
ikicildliyinin təqdimat mərasimi keçirilmişdir.
AzərTAc
xəbər verir ki, Yeni Azərbaycan Partiyasının (YAP) dəstəyi
ilə keçirilmiş tədbirdə dövlət və
hökumət rəsmiləri, Milli Məclisin deputatları, Azərbaycan
Milli Elmlər Akademiyası Rəyasət Heyətinin üzvləri,
elm, təhsil ictimaiyyətinin nümayəndələri
iştirak etmişlər.
"Heydər
Əliyev mənim həyatımda" ikicildliyinin məsləhətçisi
və ön sözün müəllifi Azərbaycan
Respublikası Prezidenti Administrasiyasının rəhbəri,
akademik Ramiz Mehdiyevdir. Tarix elmləri doktoru, professor Əli Həsənovun
redaktoru olduğu kitabın buraxılışa məsulu
"Azərbaycan" qəzetinin baş redaktoru, Milli Məclisin
deputatı Bəxtiyar Sadıqov, tərtibçisi isə qəzetin
parlament və siyasət şöbəsinin redaktoru İxtiyar
Hüseynlidir.
Tədbiri
açan YAP-ın sədr müavini - icra katibi Əli Əhmədov
ulu öndər Heydər Əliyevin 90 illik yubileyi ilə
bağlı keçirilən tədbirlərin hər bir azərbaycanlının
ümummilli liderin xatirəsinə dərin hörmətinin təzahürü
olduğunu vurğulamışdır. Diqqətə
çatdırılmışdır ki, xalqımız yubiley tədbirlərini
yüksək səviyyədə qeyd etməklə hazırda Prezident
İlham Əliyevin rəhbərliyi ilə uğurla həyata
keçirilən və müstəqil Azərbaycanın
inkişafına xidmət edən ulu öndər Heydər Əliyevin
müdrik siyasətinə öz dəstəklərini bildirirlər.
Azərbaycandakı bugünkü inkişafdan, sabitlikdən bəhrələnən,
gələcəyinə böyük ümidlərlə, inamla
baxan, özünə inanan hər bir azərbaycanlının
qəlbində ümummilli lider Heydər Əliyevin dərin
izlərinin olduğunu bildirən Əli Əhmədov bu fikirlərin
ifadəsinin ikicildlikdə əksini tapdığını
vurğulamışdır.
Baş
nazirin müavini, Qaçqınların və Məcburi
Köçkünlərin İşləri üzrə
Dövlət Komitəsinin sədri Əli Həsənov nəşrdəki
yazıların ümummilli liderin Azərbaycan xalqı və
dövləti qarşısındakı misilsiz xidmətlərini
əks etdirdiyini vurğulamışdır. Əli Həsənov
ulu öndərin həyat və fəaliyyətini geniş işıqlandıran
belə bir kitabın ərsəyə gəlməsinə
görə nəşrin məsləhətçisi akademik
Ramiz Mehdiyevə, ikicildliyin redaktoru professor Əli Həsənova,
buraxılışa məsul olan "Azərbaycan" qəzetinin
baş redaktoru Bəxtiyar Sadıqova və digər əməyi
keçənlərə dərin təşəkkürünü
bildirmişdir. Kitabda 74 müəllifin fikirlərinin yer
aldığını bildirən Baş nazirin müavini
demişdir ki, dünyanın bir nömrəli siyasətçisi
Heydər Əliyev ilə yaxın münasibətdə
olduğuma görə özümü xoşbəxt hiss edirəm.
Ümummilli
liderin çoxşaxəli, zəngin siyasi fəaliyyətindən
bəhs edən Əli Həsənov dahi şəxsiyyətin
SSRİ rəhbərliyindən
uzaqlaşdırılmasından sonra xalqımızın
amansız müsibətlərə məruz
qaldığını, Ermənistandan 250 mindən artıq azərbaycanlının
sürgün edildiyini, ərazilərimizin 20 faizinin
işğal olunduğunu, bir milyondan çox vətəndaşımızın
doğma yurdlarından didərgin düşdüyünü
diqqətə çatdırmışdır. Natiq 1993-cü
ildə ulu öndərin hakimiyyətə
qayıdışından sonra ölkəmizin bölünmək
təhlükəsindən qurtularaq sürətli inkişaf
yoluna çıxarıldığını vurğulamışdır.
Bildirilmişdir ki, dahi rəhbərin müdrik siyasətini
uğurla həyata keçirən Prezident İlham Əliyevin
qətiyyəti nəticəsində Azərbaycan MDB məkanında
ilk olaraq keçid dövrünü başa vurmuş, gələcək
inkişaf strategiyasının əsaslarını
formalaşdırmışdır.
"Ulu
öndər Heydər Əliyev kimi görkəmli dövlət
xadiminə həsr edilmiş belə bir kitabın
hazırlanması çox çətin, məsuliyyətli,
lakin şərəflidir" - deyən Azərbaycan
Ağsaqqallar Şurasının sədri, Milli Məclisin
deputatı Fəttah Heydərov ümummilli liderin hər bir azərbaycanlı
üçün nümunəvi şəxsiyyət olduğunu
bildirmişdir. Ümummilli liderin bütün ömrünü
həyatı qədər sevdiyi, ürəkdən
bağlı olduğu Azərbaycana həsr etdiyini vurğulayan
Fəttah Heydərov Heydər Əliyevin Azərbaycana rəhbərliyinin
birinci dövründə ölkəmizi qısa müddətdə
İttifaq respublikaları içərisində aparıcı
yerə çıxardığını diqqətə
çatdırmışdır. Heydər Əliyev Azərbaycanı
tanıtmış və müstəqil dövlətimizin əsasını
hələ respublikamıza rəhbərliyinin birinci
dövründə formalaşdırmışdı.
Ümummilli
lider Heydər Əliyevin hakimiyyətdə olmadığı
illərdə Azərbaycanın bir milyondan çox
qaçqın və məcburi köçkünün
yarandığını, torpaqlarımızın 20 faizinin
işğal olunduğunu, 20 min vətəndaşımızın
şəhid düşdüyünü diqqətə
çatdıran Azərbaycan Ağsaqqallar Şurasının
sədri ulu öndərin ölkəmizin ağır
vaxtında hakimiyyətə gələrək
xalqımızı fəlakətlərdən
qurtardığını bildirmişdir. Vətən və
xalq qarşısındakı misilsiz xidmətlərinə
görə ulu öndərin dərin izləri və əbədiyaşar
xatirəsi hər bir Azərbaycan vətəndaşının
qəlbində yaşayacaqdır.
Dahi rəhbərin
90 illik yubileyi münasibətilə ikicildliyin
hazırlanmasına görə təşəkkürünü
bildirən Azərbaycan Tibb Universitetinin rektoru, akademik Əhliman
Əmiraslanov təqdimatın respublikamızda və
dünyanın bir çox ölkələrində yubiley tədbirlərinin
keçirildiyi vaxtda işıq üzü görməsini təqdirəlayiq
hal kimi qiymətləndirmişdir.
Ulu
öndərin xalqımız və dövlətimiz
qarşısındakı xidmətlərinin miqyasının
çox böyük olduğunu vurğulayan rektor ümummilli
liderin 1970-1980-ci illərdə ölkəmizə rəhbərlik
etdiyi dövrdə ən böyük addımlarından birinin
gənc kadrların hazırlanması olduğunu
vurğulamışdır. Həmin dövrdə yüksək
ixtisaslara yiyələnmək üçün Moskvaya,
Leninqrada, Kiyevə və SSRİ-nin digər nüfuzlu
universitetlərinə göndərilən gənclərimiz bu
gün Azərbaycanın dövlət siyasətinin həyata
keçirilməsində, diasporumuzun formalaşmasında və
inkişafında fəal iştirak edirlər. Bu, məhz ulu
öndərin uzaqgörən siyasətinin aşkar göstəricisidir.
Ümummilli
lider Heydər Əliyevin SSRİ Nazirlər Soveti sədrinin
birinci müavini vəzifəsində işlədiyi dövrdə
bir çox sahələrlə yanaşı, təhsil və səhiyyəyə
də nəzarət etdiyini vurğulayan Əhliman Əmiraslanov
həmin vaxt keçmiş İttifaqın bir çox bölgələrində
tibb mərkəzlərinin yaradılmasının məhz ulu
öndərin adı ilə bağlı olduğunu
demişdir. Bildirilmişdir ki, Azərbaycanda nəsillər dəyişsə
də, bu dahi şəxsiyyətin xatirəsi daim
yaşayacaqdır.
"Ulu
öndər Heydər Əliyev müstəqil Azərbaycan
dövlətinin banisi, respublikamızın inkişaf
strategiyasının yaradıcısıdır" - deyən
AMEA-nın vitse-prezidenti, akademik İsa Həbibbəyli ölkəmizin
vahid inkişaf yolunu müəyyənləşdirən
ümummilli liderin xalqı qalibiyyətli gələcəyə
aparan siyasətçi olduğunu bildirmişdir. Qeyd
olunmuşdur ki, ikicildlik bu möhtəşəm şəxsiyyətin
bütün xüsusiyyətləri ilə tam ümumiləşmiş
şəkildə təqdim olunmasına, ulu öndərin
siyasi istedadının geniş
işıqlandırılmasına xidmət edir.
Kitabın
ümummilli lider Heydər Əliyevin 90 illik yubileyinə layiqli
töhfə olduğunu vurğulayan akademik ulu öndərin Azərbaycanın
həyatında sınaqlardan çıxmış siyasi xəttinin
Prezident İlham Əliyev tərəfindən uğurla davam
etdirildiyini bildirmişdir. Qeyd olunmuşdur ki, bizim əsas vəzifəmiz
bu siyasətə məsuliyyətlə, sədaqətlə
xidmət etməkdir.
AMEA
Tarix İnstitutunun direktoru Yaqub Mahmudov rəhbərlik etdiyi
qurumda 2008-ci ildən "Əliyevşünaslıq"
şöbəsinin fəaliyyət göstərdiyini, ulu
öndərlə bağlı ikicildliyin nəşrə
hazırlandığını diqqətə
çatdırmışdır. Y.Mahmudov Tarix İnstitutu tərəfindən
dahi şəxsiyyətlə bağlı bir sıra
monoqrafiyaların yazıldığını, Ukrayna Prezidenti
yanında Milli İdarəçilik Akademiyasında kitabın
hazırlandığını vurğulamışdır.
Ümummilli
lider Heydər Əliyevin Azərbaycan xalqını müstəqil
yaşamağa hazırladığını vurğulayan Tarix
İnstitutunun direktoru qeyd etmişdir ki, dünya tarixinin dahi azərbaycanlısı
- ulu öndər hər bir azərbaycanlının qəlbində
əbədi yaşayacaqdır.
Ulu
öndər Heydər Əliyevin qeyri-adi, xarizmatik şəxsiyyət
olduğunu bildirən "Azərbaycan" qəzetinin baş
redaktoru, Milli Məclisin deputatı Bəxtiyar Sadıqov dahi
şəxsiyyətin onunla təmasda olan hər bir insanı valeh
etdiyini diqqətə çatdırmışdır.
Kitabla
bağlı məlumat verən Bəxtiyar Sadıqov redaksiya tərəfindən
2003-cü ildə "Heydər Əliyev dünyanın
gözü ilə" kitabının nəşr
olunduğunu bildirmişdir. Qəzetin "Azərbaycan qədər
əbədi" silsiləsindən nəşr etdirdiyi və
xalqımızın ümummilli lideri Heydər Əliyevin əbədiyaşar
xatirəsinə ithaf etdiyi bu kitab səkkiz il əvvəl
işıq üzü görən eyni adlı kitabın təkmilləşdirilmiş
və genişləndirilmiş ikicildlik nümunəsidir. O,
kitabın ərsəyə gəlməsinə görə
Prezident Administrasiyasının rəhbəri, akademik Ramiz
Mehdiyevə, professor Əli Həsənova, əməyi
keçən bütün şəxslərə, eləcə
də tədbirin təşkilinə görə YAP rəhbərliyinə
təşəkkürünü bildirmişdir.
"Heydər
Əliyev mənim həyatımda" kitabının hər
iki cildi 7 fəsildən ibarətdir. "Ən böyük azərbaycanlı",
"Həqiqət qədər sadə", "Böyük
yolun başlanğıcı", "Birinci şəxs",
"Missiya", "Əbədi müasirimiz", "Əsl
vətəndaş, böyük şəxsiyyət, qüdrətli
lider", "Heydər Əliyev dünyanın gözü ilə",
"Tarix yaradan şəxsiyyət", "Azərbaycanın
rəmzi", "Mərhəmət və alicənablıq
mücəssəməsi", "Ən yaxın dostumuz, ən
böyük xeyirxahımız", "Sənə
borcluyuq", "Milyonların taleyi həyatında əks
olunan insan" adlanan bu fəsillərdə Heydər Əliyevin
sovet illərində və müstəqillik dövründə
müasiri olmuş, bir yerdə işləmiş, xeyir-duasını
almış, alicənablığını görmüş,
mərhəmətini hiss etmiş sadə insanların, sənət
adamlarının, dövlət xadimlərinin, siyasətçilərin,
idmançıların, ümumiyyətlə, taleyinə
ümummilli lideri şəxsən tanımaq kimi gözəl
bir qismət yazılmış insanların maraqlı xatirələri,
ulu öndərin görkəmli dövlət xadimi kimi
siyasi-ictimai və dövlətçilik fəaliyyətinə
dair fikirləri məqalələr şəklində
toplanmışdır.
Əbədiyaşar
liderimizin ölməz ruhuna və xatirəsinə böyük
ehtiramın nümunəsi olan "Heydər Əliyev mənim
həyatımda" ikicildliyi ulu öndərin irsinin tədqiqatçıları,
eləcə də geniş oxucu kütləsi
üçün dəyərli töhfədir.
AzərTAc
Azərbaycan.-2013.- 4 may.- S.5.