Silahlı Qüvvələrin Təlim və Tədris Mərkəzində ümummilli lider Heydər Əliyevin 90 illik yubileyi münasibətilə təntənəli mərasim keçirilmişdir

Mayın 4-də Silahlı Qüvvələrin Təlim və Tədris Mərkəzində Azərbaycan xalqının ümummilli lideri Heydər Əliyevin 90 illik yubileyi ilə əlaqədar təntənəli mərasim keçirilmişdir.

Tədbirdə Azərbaycan Respublikasının müdafiə naziri, general-polkovnik Səfər Əbiyev "Ümummilli lider Heydər Əliyev müasir Azərbaycan Silahlı Qüvvələrinin qurucusudur" mövzusunda çıxış etmişdir.

Müdafiə Nazirliyinin mətbuat xidmətindən AzərTAc-a bildirmişlər ki, nazir çıxışında Silahlı Qüvvələri Heydər Əliyevə bağlayan qırılmaz tellərdən, ulu öndərin milli ordu quruculuğunda müstəsna xidmətlərindən danışmışdır. Müstəqilliyimizin ilk illərində cəmiyyətimizdə, eyni zamanda, ordumuzda xaos və anarxiyanın tüğyan etdiyini vurğulayan Səfər Əbiyev bu problemlərin aradan qaldırılmasında ulu öndərin əvəzsiz xidmətlərinin bu gün hər bir Azərbaycan vətəndaşı və əsgəri tərəfindən böyük minnətdarlıq hissi ilə yad edildiyini diqqətə çatdırmışdır. Nazir ulu öndər Heydər Əliyevin 90 illik yubileyi münasibətilə Müdafiə Nazirliyinin birlik, birləşmə, hərbi hissələrində, xüsusi təyinatlı təhsil müəssisələrində və digər hərbi kollektivlərdə geniş qeyd olunduğunu diqqətə çatdırmışdır.

Müdafiə naziri demişdir ki, ümummilli lider Heydər Əliyevin zəngin və çoxşaxəli irsi, ordu ilə bağlı tövsiyələri Azərbaycanın Silahlı Qüvvələri tərəfindən dərindən öyrənilməli, hər bir zabit və general üçün əməli fəaliyyət proqramına çevrilməlidir.

Müasir Azərbaycan dövlətinin böyük bir dövrünün Heydər Əliyevin adı ilə bağlı olduğunu vurğulayan nazir ulu öndərin ölkəmizi inkişaf yoluna çıxardığını, iqtisadi, sosial, mədəni və mənəvi sahələrdə böyük irəliləyişlərə məhz bu dövrdə nail olduğunu bildirmişdir. Diqqətə çatdırılmışdır ki, Heydər Əliyevin ölkəmizə hələ sovet dönəmində rəhbərlik etdiyi vaxtlarda xalq və dövlət həyatının bütün istiqamətlərində irəliyə doğru mühüm addımlar atılmışdır. Bu dövrdə milli özünüdərk prosesi sürətlə inkişaf etməyə başlamış, azərbaycançılıq ideyası şüurlara hakim kəsilmişdir. Ulu öndər azərbaycançılıq prinsipini dövlətin idarəçilik sistemində ön cərgəyə çıxarmışdır ki, indi bunun böyük nəticələrini aydın görür və hiss edirik.

Nazir bildirmişdir ki, ümummilli lider Heydər Əliyev bütün sahələrdə olduğu kimi, Milli Ordu quruculuğunda də yeni mərhələnin təməlini qoymuşdur. Ulu öndərin ordu quruculuğu istiqamətində açdığı yol bu gün Prezident, Ali Baş Komandan İlham Əliyev tərəfindən ardıcıl olaraq davam etdirilir.

Hələ 1971-ci ildə Heydər Əliyev tərəfindən Cəmşid Naxçıvanski adına Hərbi Liseyin yaradıldığını xatırladan general-polkovnik Səfər Əbiyev bu hərbi təhsil müəssisəsini dahi rəhbərin Azərbaycanın hərb tarixində yaratdığı ən monumental abidələrdən biri kimi qiymətləndirmişdir. Həmin hərbi liseyin məzunu olan yüzlərlə zabitimiz bu gün Vətənin keşiyində şərəflə dayanaraq öz xidmət borcunu əzmlə yerinə yetirir.

Heydər Əliyevin SSRİ Nazirlər Soveti sədrinin birinci müavini vəzifəsində çalışdığı illərdə Vətəni Azərbaycanı unutmadığını diqqətə çatdıran nazir onun istefasından sonra ölkəmizdə ağır fəlakətlər yaşandığını demişdir. Səfər Əbiyev ulu öndərin 1990-cı ilin iyununda Naxçıvanda üçrəngli bayrağımızı yenidən ucaltdığını, ordu quruculuğu prosesinə başladığını diqqətə çatdırmışdır. Dahi şəxsiyyət muxtar respublikanı Ermənistanın silahlı təcavüzündən qorumaq, əhalinin təhlükəsizliyini təmin etmək məqsədi ilə Dövlət Milli Müdafiə Komitəsi yaratmışdı ki, bu da bir qədər sonra əlahiddə gücləndirilmiş motoatıcı briqadanın təşkili üçün əsas baza olmuşdur. Heydər Əliyevin uzaqgörən siyasəti nəticəsində vaxtilə Sovet İttifaqına məxsus bütün silah-sursat, hərbi texnika və əmlak, eləcə də texniki qurğular Azərbaycanın sərəncamına keçmiş, ölkəmizin digər bölgələrindən fərqli olaraq Naxçıvanda heç bir dağıntı və talanlara yol verilməmişdir.

Bildirilmişdir ki, 1993-cü ilin yayında Heydər Əliyevin yenidən respublika rəhbərliyinə gəlməsindən sonra müstəqilliyimiz üçün böyük təhlükəyə çevrilmiş separatçılıq hərəkatının qarşısı alınmış, 1994-cü ilin mayında cəbhədə atəşkəs rejimi əldə edilmişdir.

Qeyd olunmuşdur ki, ümummilli lider Heydər Əliyevin həyata keçirdiyi məqsədyönlü xarici siyasət nəticəsində Azərbaycanın beynəlxalq nüfuzu artmış, ölkəmiz dünya miqyasında tanınmışdır. Dahi şəxsiyyətin müəyyən etdiyi uzaqgörən siyasətin Prezident İlham Əliyev tərəfindən məharət və qətiyyətlə davam etdirilməsi ölkəmizə böyük uğurlar gətirmişdir. Təməli ümummilli lider tərəfindən qoyulan demokratik, sivil və hüquqi dövlət ideyası bu gün yüksək əzmlə həyata keçirilir. İri iqtisadi və hərbi layihələr məhz ulu öndərin müəyyən etdiyi siyasətə əsaslanır. Heydər Əliyevin böyük planları indi onun siyasi varisi Prezident İlham Əliyev tərəfindən ardıcıllıqla reallaşdırılır. Bu gün Azərbaycanın dövlət büdcəsində hərbi təyinatlı xərclər üstün yer tutur. Hərbi rəhbərlik ordumuzun maddi-texniki bazasının möhkəmləndirilməsi və modernləşdirilməsi üçün yaradılmış bütün imkanlardan istifadə edir və edəcəkdir.

Ali Baş Komandan, Prezident İlham Əliyevin ordu quruculuğu prosesinə böyük diqqət yetirdiyini vurğulayan nazir bu gün Silahlı Qüvvələrimizin maddi-texniki bazasının əhəmiyyətli dərəcədə möhkəmləndiyini, şəxsi heyətin sosial-məişət problemlərinin ardıcıl olaraq həll edildiyini, müasir texnika, avadanlıq və silahların alındığını bildirmişdir. General-polkovnik Səfər Əbiyev dövlətimizin başçısının tez-tez hərbi hissələrə, tədris müəssisələrinə getdiyini, vəziyyətlə yerində tanış olduğunu, əsgər və zabitlərlə görüşdüyünü, hərbçilərin hazırlıq səviyyəsi ilə müntəzəm maraqlandığını, tapşırıqlar, əmrlər, göstərişlər verdiyini diqqətə çatdırmışdır.

Nazir çıxışının sonunda Azərbaycan xalqının ümummilli lideri Heydər Əliyevin xatirəsinin dərin ehtiramla yad edildiyini, dahi şəxsiyyətin ideyalarına bundan sonra da sadiqlik nümayiş etdiriləcəyini, Milli Ordunun şəxsi heyətinin Ali Baş Komandan, Prezident İlham Əliyevin hər bir əmrinə daim müntəzir olduğunu bildirmişdir.

Azərbaycan.-2013.- 5 may.- S.3.