Bahar Muradova ATƏT-in
Parlament Assambleyasının Cənubi Qafqaz üzrə nümayəndə
heyəti ilə görüşüb
Milli
Məclisin Sədr müavini, Azərbaycanın ATƏT
Parlament Assambleyasındakı nümayəndə heyətinin rəhbəri
Bahar Muradova mayın 6-da ATƏT-in Parlament Assambleyasının
Cənubi Qafqaz üzrə xüsusi nümayəndəsi Joao
Soaresin rəhbərlik etdiyi nümayəndə heyəti ilə
görüşüb. Görüşdə Azərbaycanın
ATƏT-in Parlament Assambleyası ilə münasibətləri
müzakirə olunub.
Bahar
Muradova bildirib ki, cənab Joao Soares ATƏT-in Parlament
Assambleyasının Cənubi Qafqaz üzrə xüsusi
nümayəndəsi təyin edildikdən sonra Azərbaycana səfəri
gözlənilən idi: "Biz ATƏT-ə və onu təmsil
edən nümayəndələrinə çox hörmətlə
yanaşırıq. Ermənistan-Azərbaycan, Dağlıq
Qarabağ münaqişəsinin həlli istiqamətində
aparılan danışıqlarda da ATƏT-in rolunu xüsusi
qiymətləndiririk. Bu gün Azərbaycanın
qaçqın və məcburi köçkünləri sizin
işğal olunmuş ərazilərə, cəbhə
bölgələrinə səfərlərinizi səbirsizliklə
gözləyirlər. Ən azından öz problemlərini,
gündəlik həyat tərzlərini göstərməyə
çalışırlar".
Bahar
Muradova bildirdi ki, Azərbaycan nəinki öz problemlərini
dünyaya çatdırır, hətta qlobal problemlərin də
həllində öz mövqeyini ortaya qoyur. Bu istiqamətdə
ATƏT-lə əməkdaşlığın xüsusi əhəmiyyəti
var.
ATƏT-in
Parlament Assambleyasının Cənubi Qafqaz üzrə
xüsusi nümayəndəsi Joao Soares isə öz növbəsində
Azərbaycanı dost ölkə kimi qiymətləndirdi. Bildirdi
ki, burada özlərini evlərindəki kimi hiss edirlər:
"Mən Azərbaycanın ATƏT Parlament
Assambleyasındakı İşçi Qrupunun fəaliyyətini
olduqca yüksək dəyərləndirirəm. Siz ATƏT-in
Parlament Assambleyasında həqiqətən böyük
hörmət sahibisiniz".
Azərbaycan.-2013.- 7 may.- S.10.