Yekaterinburqda Azərbaycan xalqının ümummilli lideri Heydər Əliyevin 90 illik yubileyinə həsr olunmuş fotosərgi açılmışdır

 

Ümumrusiya Azərbaycan Konqresi (ÜAK) "Azərbaycan" Sverdlovsk Vilayət İctimai Təşkilatı Sverdlovsk Vilayəti Qubernatoru Administrasiyasının köməyi ilə Sevastyanov evində - Sverdlovsk vilayət qubernatorunun iqamətgahında Azərbaycan xalqının ümummilli lideri, Azərbaycan dövlətçiliyinin banisi Heydər Əliyevin 90 illik yubileyinə həsr olunmuş fotosərginin təqdimatını keçirmişdir. Sərgidə Heydər Əliyev Fondu tərəfindən təqdim olunmuş, Azərbaycan xalqının ümummilli liderinin ötən əsrin 60-cı illərinin sonundan başlayaraq Azərbaycanın başçısı, daha sonra SSRİ rəhbərlərindən biri, habelə 1993-2003-cü illərdə müstəqil Azərbaycanın Prezidenti vəzifəsində fəaliyyətinin dövrlərini əhatə edən nadir şəkillər nümayiş etdirilir. Sərgidə Heydər Əliyev Fondunun vitse-prezidenti Leyla Əliyevanın 2010-cu ildə Yekaterinburqa səfərini əks etdirən fotoşəkillər də yer almışdır.

"Azərbaycan" Sverdlovsk Vilayət İctimai Təşkilatının sədri Şahin Şıxlinski AzərTAc-a bildirmişdir ki, vilayətin birinci vitse-qubernatoru, Sverdlovsk Vilayəti Qubernatoru Administrasiyasının başçısı Yakov Silin sərgini giriş nitqi ilə açaraq, fotoəsərləri təqdim etmiş, Heydər Əliyev Fonduna təşəkkür etmiş və  əmin olduğunu bildirmişdir ki, fotosərginin açılması Azərbaycan ilə Sverdlovsk vilayəti arasında əməkdaşlığın möhkəmlənməsi, işgüzar və humanitar əlaqələrin inkişafı yolunda daha bir addım olacaqdır.

Sonra söz Federasiya Şurasının üzvü, Sverdlovsk vilayətinin birinci qubernatoru Eduard Rosselə verilmişdir. Heydər Əliyevlə dostluğundan və birgə fəaliyyətindən söz açan E.Rossel maraqlı xatirələrini bölüşərək demişdir: "Heydər Əliyev Azərbaycan ilə Rusiya arasında strateji tərəfdaşlığın əsasını qoymuş, ölkələrimiz arasında dostluğun, əməkdaşlığın və qarşılıqlı anlaşmanın möhkəmlənməsinə böyük töhfə vermişdir. Azərbaycan ilə Sverdlovsk vilayətini möhkəm iqtisadi, sosial və mədəni əlaqələr birləşdirir".

Sərginin açılışında Azərbaycanın Yekaterinburqdakı baş konsulu Sultan Qasımov, ÜAK-ın "Azərbaycan" Sverdlovsk Vilayət İctimai Təşkilatının sədri Şahin Şıxlinski, ÜAK aparatının şöbə rəisi İlqar Hacıyev, Diasporla İş üzrə Dövlət Komitəsinin, Heydər Əliyev Fondunun, RAGB-ın və s. nümayəndələri çıxış etmişlər.

Sərginin açılış mərasimində Sverdlovsk Vilayət Qanunverici Məclisinin sədri Lyudmila Babuşkina, vilayətin beynəlxalq və xarici iqtisadi əlaqələr naziri Aleksandr Xarlov, dövlət, vilayət və şəhər dumasının deputatları, Sverdlovskdakı Azərbaycan ictimaiyyətinin və digər diasporların təmsilçiləri iştirak etmişlər.

Tədbirdən sonra Heydər Əliyev Fondunun vitse-prezidenti Leyla Əliyevanın təşəbbüsü ilə 2010-cu ildə Yekaterinburqda 108 nömrəli gimnaziyanın nəzdində yaradılmış Azərbaycan Dili və Mədəniyyəti Mərkəzində "Heydər Əliyev irsinin öyrənilməsi Mərkəzi"nin təntənəli açılışı olmuş, Azərbaycan xalqının ümummilli liderinin həyat və fəaliyyətindən söz açan videoçarx nümayiş etdirilmişdir.

 

 

Fəridə ABDULLAYEVA,

AzərTAc-ın xüsusi müxbiri

Moskva

 

Azərbaycan.-2013.- 10 may.- S.15.