Fövqəladə Hallar Nazirliyi ümummilli lider Heydər Əliyevin 90 illik yubileyi münasibətilə təntənəli mərasim keçirmişdir

Ümummilli lider Heydər Əliyevin 90 illik yubileyi münasibətilə mayın 10-da Fövqəladə Hallar Nazirliyi (FHN) "Kempinski Badamdar" mehmanxanasında təntənəli mərasim keçirmişdir. AzərTAc xəbər verir ki, əvvəlcə tədbir iştirakçıları FHN-in ictimaiyyətlə əlaqə idarəsinin multimedia mərkəzinin ümummilli lider Heydər Əliyevin 90 illik yubileyi ilə əlaqədar hazırladığı "Sən elə bir zirvəsən..." sənədli filminə baxmışlar.

Mərasimdə çıxış edən fövqəladə hallar naziri general-polkovnik Kəmaləddin Heydərov ulu öndər Heydər Əliyevin həyat və fəaliyyəti haqqında danışmış, Azərbaycan xalqı qarşısındakı əvəzsiz xidmətlərindən söz açmışdır.

K.Heydərov bildirmişdir ki, Vətəninə hədsiz məhəbbət, xalqının tarixinə, keçmişinə, mədəniyyətinə, milli-mənəvi dəyərlərinə böyük sevgi və sayğı göstərən ulu öndər Heydər Əliyev Azərbaycan dövlətçiliyinin elə bir zirvəsidir ki, bu, xalqımızın inkişaf və tərəqqiyə gedən yolunu daim nurlandırır, dövlətimizin gələcəyinə işıq saçır. Dahi rəhbərin ölkəmizə rəhbərlik etdiyi illər intibah, milli tərəqqi, milli oyanış, nəhayət, müstəqil dövlət quruculuğu dövrü kimi qəbul olunur. Heydər Əliyevin siyasi fəaliyyətinin ən böyük nəticəsi quruculuğuna bilavasitə rəhbərlik etdiyi və xalqımıza bəxş etdiyi mükəmməl milli dövlət, müstəqil Azərbaycan Respublikasıdır. Ümummilli lider bütün ömrünü, fəaliyyətini Azərbaycanın inkişafına və çiçəklənməsinə həsr etmişdir. Dahi liderin əzmkar fəaliyyəti sayəsində Azərbaycan Respublikasının hərtərəfli tərəqqisinin əsası qoyulmuşdur. Onun Azərbaycana rəhbərlik etdiyi dövrlərdə respublikamız bütün sahələrdə inkişaf etmişdir.

Nazir demişdir ki, ulu öndər Heydər Əliyev Azərbaycana rəhbərlik etdiyi bütün dövrlərdə iqtisadiyyatımızın, mədəniyyətimizin və digər sahələrin inkişafına çox böyük töhfələr vermişdir. Məhz onun verdiyi töhfələrin və misilsiz xidmətlərinin nəticəsində bu gün Azərbaycan dinamik inkişaf edir. Sovet dövründə ulu öndər tərəfindən Azərbaycanda quruculuq işlərinin, infrastruktur layihələrinin həyata keçirilməsi bu gün ölkəmizdə güclü iqtisadiyyatın təməlini qoymuşdur. Bu təməlin üzərində Prezident İlham Əliyev iqtisadiyyatımızın və digər sahələrin inkişafını təmin edir. Görkəmli dövlət xadimi Heydər Əliyevin hakimiyyətə qayıdışından sonra ölkədə həm quruculuq işlərində, həm aqrar sənayedə çox böyük irəliləyişlər olmuşdur. Ulu öndər Heydər Əliyev 1970-ci illərdən bugünkü inkişafın təməlini qoymuş və Azərbaycanın gələcəyini görmüşdür: "O xalq doğrudan da xoşbəxtdir ki, onun lideri vardır. Doğrudan da Azərbaycan xalqı çox xoşbəxtdir ki, onun Heydər Əliyev kimi ulu öndəri var və onun siyasətini davam etdirən Prezident İlham Əliyevi vardır".

Ulu öndərin "bir hadisənin qarşısını almaq, o hadisə baş verəndən sonra onun nəticələrini aradan götürməkdən daha asandır" sözlərini xatırladan nazir bildirmişdir ki, ümummilli lider Azərbaycanda siyasi hakimiyyətə gəldiyi ilk illərdən başlayaraq hər bir azərbaycanlının təhlükəsizliyinin təminatı, baş verə biləcək təbii və texnogen halların aradan qaldırılması istiqamətində mühüm qərarlar qəbul etmiş, müvafiq işlər görmüşdür. Heydər Əliyev müstəqillik illərində də Azərbaycan vətəndaşlarının təhlükəsizliyinin təminatı məsələsini daim diqqət mərkəzində saxlamışdır.

"Bu gün müstəqil Azərbaycanın öz inkişafının intibah və tərəqqi dövrünü yaşayır", - deyən Kəmaləddin Heydərov ulu öndərin siyasi xəttinin layiqli davamçısı Prezident İlham Əliyevin rəhbərliyi ilə ölkəmizin hazırda dünyada ən sabit, sosial-iqtisadı cəhətdən sürətlə inkişaf edən, liderliyini qoruyub saxlayan ölkəyə çevrildiyini qeyd etmişdir.

Kəmaləddin Heydərov vurğulamışdır ki, Fövqəladə Hallar Nazirliyinin əməkdaşları həmişə Azərbaycan və azərbaycançılıq prinsipinə, eləcə də iqtisadiyyatımızın yüksəlməsinə mane olan texniki qəzaların vaxtında araşdırılıb aradan qaldırılmasına əməl etmişdir və bundan sonra da buna əməl edəcəkdir.

Çıxışının sonunda nazir Kəmaləddin Heydərov əminliklə söyləmişdir ki, Fövqəladə Hallar Nazirliyinin kollektivi ümummilli lider Heydər Əliyevin ideyalarına, dövlətçilik xəttinə sadiq qalaraq bundan sonra da bütün qüvvə və bacarığını müstəqil respublikamızın yüksəlişi, tərəqqisi naminə səfərbər edəcəkdir.

Yeni Azərbaycan Partiyasının (YAP) icra katibinin müavini, Milli Məclisin deputatı Siyavuş Novruzov ümummilli lider Heydər Əliyevin həyat yolundan, Vətən və xalq qarşısında tarixi xidmətlərindən, Azərbaycanın iqtisadi inkişafı naminə gördüyü işlərdən danışmışdır.

S.Novruzov vurğulamışdır ki, Heydər Əliyevin bütün addımları xalqı qorumağa, onun inkişafına yönəlmişdi. Ulu öndər Heydər Əliyevin yenidən rəhbərliyə gəlişi ölkədə separatizmin qarşısını aldı, Azərbaycanı parçalanmadan, bacarıqsız idarəçilərdən xilas etdi. Azərbaycan xalqının Heydər Əliyevə sevgisi tükənməzdir. Çünki bu böyük şəxsiyyət hər zaman xalqına xidmət etmişdir. Ümummilli lider Azərbaycana rəhbərlik etdiyi illərdə uzaqgörən daxili və xarici siyasəti ilə ölkənin nüfuzunu artırmış, hərtərəfli inkişafına nail olmuş, Azərbaycan Respublikasının müstəqilliyini əbədi və dönməz etmişdir.

Deputat demişdir ki, ümummilli lider Heydər Əliyevin ideyaları əsasında formalaşdırılan Fövqəladə Hallar Nazirliyi bu gün nəinki Azərbaycanda, eyni zamanda, qonşu ölkələrdə baş verən təbii fəlakətlərin və digər fövqəladə halların aradan qaldırılmasında mühüm rol oynayır. O, milli kadrların hazırlanmasında nazirliyin bütün strukturlarının, xüsusilə də Fövqəladə Hallar Nazirliyinin Akademiyasının bütün lazımi avadanlıq və vəsaitlə təchiz olunduğunu vurğulamışdır.

Tədbir bədii hissə ilə davam etdirilmişdir.

Tədbirə nazir müavinləri, FHN-in müvafiq strukturlarının rəhbərləri və əməkdaşları qatılmışlar.

Azərbaycan.-2013.- 11 may.- S.7.