«YARAT!» Müasir İncəsənət Məkanı «İNDİ» layihəsi çərçivəsində növbəti art-gecəni təqdim etmişdir

 

"ÜNS" Yaradıcılıq Səhnəsində "YARAT!" Müasir İncəsənət Məkanının müxtəlif incəsənət nümayəndələrini bir araya yığmaq məqsədi güdən, təcrübi xarakterli "İNDİ" layihəsi çərçivəsində növbəti art-gecə keçirilmişdir.

"YARAT!" Müasir İncəsənət Məkanı tərəfindən təşkil olunan "İNDİ" layihəsi artıq beynəlxalq statusa malikdir.

AzərTAc xəbər verir ki, bu dəfə gənc misirli musiqiçi və rəssam Salam Yusrinin işi və onun "Xor" adlı layihəsi təqdim edilmişdir.

Müəllif bir həftə ərzində bir-birini yalnız bu il mayın 2-dən tanıyan insanlardan ibarət möhkəm bir kollektiv yaratmalı olmuşdur.

Layihənin qeyri-adiliyi ondadır ki, burada musiqi alətində ifa etməyi bacaran, yaxud da ümumiyyətlə, musiqi və vokal bacarığı olmayan istənilən yaş və peşə nümayəndələri iştirak etmişlər.

Çalışdıqları sahələrdən asılı olmayaraq, "Xor" tədbir iştirakçılarına özünü kəşf etməkdə, səhnə utancaqlığı və qorxusu kimi hisslərə qalib gəlməkdə, gizlin yaradıcı bacarığını üzə çıxarmaqda kömək etmişdir. Həmçinin "Xor" tədbir iştirakçılarına kollektivin hissəsi olmağı, fikir və hisslərini musiqi və improvizə vasitəsilə ifadə etməyi öyrətmişdir.

"Xor" ideyası Qahirədə yaranmış, daha sonra böyük uğurla İsgəndəriyyədə, Əmmanda, Beyrutda, Londonda, Münxendə, Berlində, Parisdə və İstanbulda həyata keçirilmişdir. Bakıdakı layihə mayın 2-dən başlayaraq bir həftə ərzində keçirilən ustad dərsinin nəticəsi olmuşdur.

Layihə "Bank Technique"in sponsorluğu ilə həyata keçirilmişdir.

 

 

Azərbaycan.-2013.- 11 may.- S.11.