Azərbaycanın Naftalan və Fransanın Leql şəhərlərinin qardaşlaşmasına dair rəsmi sənəd imzalanmışdır

Mayın 10-da Fransanın Aşağı Normandiya regionunun Orn departamentindəki Leql şəhər bələdiyyə idarəsində Azərbaycanın Naftalan və Leql şəhərlərinin qardaşlaşmasına dair rəsmi sənəd imzalanmışdır. Ümummilli lider Heydər Əliyevin doğum gününün 90 illiyinə təsadüf edən bu hadisə ulu öndərin uğurlu xarici siyasətinin tərkib hissəsi kimi mühüm əhəmiyyət daşımışdır.

İmzalanma mərasimində ölkəmizin və Fransanın dövlət himnləri səslənmişdir.

1950-ci ildə Avropa İttifaqının yaradıcılarından biri olan Jan Monenin "Biz dövlətləri istismar etmirik, insanları birləşdiririk" fikrini xatırladan şəhərin meri Tierri Pinot ölkələr arasında qurulan əlaqələr sayəsində dünyanın xəritəsinin dəyişdiyini 20 ildən bir qədər artıq vaxtda müstəqil dövlətini quran Azərbaycanla Fransanın bütün sahələrdə əməkdaşlıq etdiyinə diqqət çəkmişdir.

Mer son illərdə ölkələrimiz arasında ikitərəfli əlaqələrin dinamik inkişaf etdiyini vurğulamış, İlham Əliyev Prezident seçildikdən sonra 2004-cü ildə ilk xarici səfərini və 2007-ci ildə isə dövlət səfərini Fransaya etdiyini, Fransa Prezidenti Nikola Sarkozinin 2011-ci ildə Azərbaycana, 2012-ci ilin sentyabr ayında isə Prezident İlham Əliyevin növbəti dəfə Fransaya səfərlərini, Fransa parlamentarlarının mütəmadi Bakıda olduqlarını xatırlatmışdır.

Fransa ilə geniş iqtisadi əlaqələr yaradan Azərbaycanın Qafqazın bir ölkəsi kimi Fransadan çox uzaq məsafədə yerləşdiyini vurğulayan T.Pino iki ölkə arasında ticarət dövriyyəsinin 4 milyard avro təşkil etdiyini, 30-dan artıq fransız şirkətinin Azərbaycanda fəaliyyət göstərdiyini, mədəniyyət və elm sahələrində əməkdaşlığın sürətlə inkişafda olduğunu, Bakıda təməli qoyulan fransız məktəbinin öz qapılarını tezliklə şagirdlərin üzünə açacağını, gözəl Azərbaycan və Naftalan şəhəri ilə tanışlıqdan böyük məmnunluq hissi duyduğunu bəyan etmişdir.

Mer 2011-ci ildə Leql və Naftalan şəhərlərinin qardaşlaşmasına dair razılıq protokolunun imzalandığını, keçən il 18 leqlli idmançının Naftalanda həmkarları yarış keçirildiyini kənd təsərrüfatı naziri İsmət Abbasovun Leqldə işgüzar səfəri zamanı iqtisadi əməkdaşlığa dair birgə layihə çərçivəsində İMV müəssisəsinin rəhbərləri ilə görüşdüyünü, Azərbaycanın birinci xanımı Mehriban Əliyevanın rəhbərlik etdiyi Heydər Əliyev Fondunun yardımı ilə şəhər musiqi məktəbinin zallarından birinin təmir edildiyini, Leqllə Naftalanın qardaşlaşmasının Fransa və Azərbaycanın iki şəhəri arasında ilk qardaşlaşma olduğunu qeyd etmiş və bu qardaşlaşmanın Şərq və Qərb arasında dinamik əlaqələr istiqamətində yeni dövrün simvolu kimi səciyyələndirmişdir.

Mer çıxışının sonunda gələn həftə Leqldə "Qafqazın mirvarisi olan Azərbaycanın mədəni dəyərləri" layihəsi çərçivəsində Azərbaycan günlərinin keçiriləcəyini bildirmişdir.

Naftalan şəhərinin icra başçısının müavini Arzu Məmmədov Leql ilə Naftalan arasında qardaşlaşmaya dair razılıq protokolu imzalandığı gündən etibarən Azərbaycanın Dövlət bayrağının Leql şəhər bələdiyyə binasının qarşısında dalğalanmasını mühüm tarixi hadisə olduğunu diqqətə çəkmiş, qədim tarixi şəhər olan Leqllə 45 illik tarixə malik Naftalanın qardaşlaşmasını mühüm hadisə kimi dəyərləndirmiş, Leql və Naftalanın nümayəndə heyətlərinin qarşılıqlı səfərlər etdiyini, qardaşlaşmanın kağız üzərində qalmayaraq əməli fəaliyyət sahələrini əhatə edəcəyinə əminliyini ifadə etmişdir. Naftalan şəhərinin 10 min əhalisi olduğunu xatırladan A.Məmmədov məşhur Naftalan neftinin dünyada analoqu olmadığını qeyd etmiş, onun xüsusi müalicəvi əhəmiyyətindən, digər sahələrdə hər iki şəhər arasında gələcək əməkdaşlıq imkanları barədə danışmışdır.

Azərbaycanın Fransadakı səfiri Elçin Əmirbəyov iki şəhərin qardaşlaşmasına dair rəsmi sənədlərin imzalanmasını Azərbaycan üçün tarixi bir an kimi dəyərləndirmiş, bunun Azərbaycan və Fransa şəhərləri arasında qardaşlaşma istiqamətində ilk addım olduğuna diqqət çəkmiş, iki xalqın daha da yaxınlaşmasında bu cür addımların mühüm əhəmiyyətini vurğulamışdır.

Fransanın Azərbaycanla tərəfdaşlıqda ikinci olduğunu xatırladan səfir iki ölkə arasında iqtisadi əməkdaşlığın daim inkişaf etdiyini, siyasi sahədə də əlaqələrin yeni mərhələyə daxil olduğunu, Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə "Qafqazın mirvarisi olan Azərbaycanın mədəni dəyərləri" çərçivəsində Fransada keçirilən Azərbaycan günləri sayəsində fransızların artıq ölkəmiz barədə müəyyən məlumatlar əldə etdiyini, belə bir tədbirin gələn həftə Leqldə təşkil olunacağını bildirmişdir.

Orn departamentindən senator seçilən Natali Qule bu gün Azərbaycanın Dövlət himninin Leqldə səslənməsinin təsiri altında olduğunu bəyan etmiş, ölkəmizi Fransaya yaxın dost kimi dəyərləndirmiş, Azərbaycanın 20 ildən artıq bir dövrdə müharibə vəziyyətində yaşamasına, ərazisinin 20 faizinin işğal olunmasına baxmayaraq, iqtisadiyyatının sürətlə inkişaf etdiyini diqqətə çəkmiş , Heydər Əliyev Fondunun Vatikanda əlyazmaların və Strasburqda katedralın bərpasına göstərdiyi yardımı yüksək qiymətləndirmiş, Fransa ilə Azərbaycan arasında dostluq əlaqələrinin inkişafından bəhs etmiş, Leqllə Naftalanın qardaşlaşmasını iki ölkə arasında əlaqələr istiqamətində böyük uğur kimi dəyərləndirmişdir.

Əsgər ƏLİYEV,

AzərTAc-ın xüsusi müxbiri

Leql

Azərbaycan.-2013.- 12 may.- S.6.