«Tərcümeyi-hal davam edir: İlham Əliyev» kitabı gürcü dilində nəşr olunmuşdur

Yazıçı-dramaturq, Milli Məclisin deputatı Hüseynbala Mirələmovun Moskvanın məşhur "Molodaya qvardiya" nəşriyyatında "Görkəmli adamların həyatı" seriyası ilə nəşr etdirdiyi "Heydər Əliyev", "İlham Əliyev" və "Zərifə Əliyeva" kitabları dünyanın bir çox xalqlarının dillərinə tərcümə olunaraq çap edilməkdədir.

AzərTAc xəbər verir ki, bu günlərdə Tbilisidə də yazıçı-dramaturqun bu seriyadan "Tərcümeyi-hal davam edir: İlham Əliyev" kitabı gürcü dilində nəfis tərtibatla nəşr olunmuşdur.

Kitabın müəllifi Hüseynbala Mirələmovun arxiv sənədlərinə və materiallarına istinad edərək həyat və fəaliyyətinin bütün incəliklərini olduğu kimi oxucuya təqdim etdiyi qəhrəmanı və müasir dövrün görkəmli siyasi lideri İlham Əliyev şəxsiyyətinə Gürcüstanda da böyük maraq vardır.

Elə bu səbəbdən də tərcümeyi-halı geniş sovet və postsovet məkanının tarixi fonunda davam edən Azərbaycan Respublikasının Prezidenti İlham Əliyevin istər uşaqlıq, gənclik və tələbəlik, istərsə də əmək fəaliyyətinə başladığı illərdə siyasətçi və dövlət xadimi, ümummilli lider Heydər Əliyevin layiqli davamçısı kimi xarakterinin formalaşması mərhələlərinin dolğun təsviri gürcü oxucuları tərəfindən də rəğbətlə qarşılanmışdır.

Azərbaycan.-2013.- 16 may.- S.2.