Azərbaycan: geosiyasi səhnədə yeni
çağırışların işığında
Üçüncü minillik qlobal geosiyasi səhnəyə çoxqütblü dünya nizamının formalaşmasına aparan yol kimi daxil olmuşdur. XX əsrin sonlarından başlayan dünyanın bir qütbdən idarə olunması qlobal miqyasda müxtəlif istiqamətli radikal meyillərin artmasına səbəb oldu və bunun qarşılığında ortaya atılan "fobiya"lar geosiyasi mühitdə əsas trendə çevrildi. Hazırda davam etməkdə olan qlobal iqtisadi böhranı və bəşəriyyətin qarşılaşdığı mənəvi tənəzzülü də bura əlavə etsək, təkqütblü dünya nizamının uzun müddət davam gətirə bilməyəcəyini aydın görmək mümkündür.
Yeni dövrün geosiyasi mənzərəsində
Qafqaz
Artıq çoxqütblü
dünya nizamının formalaşması istiqamətində
yeni bir proses gedir. Bu isə geosiyasi həssas regionlarda daha
çox hiss olunur. Baş verməkdə olan proseslər
böyük-kiçikliyindən asılı olmayaraq
bütün ölkələr üçün müstəsna
əhəmiyyət kəsb edir. Yeni dövrün tələblərinə
uyğun olaraq ölkələrin təbii ehtiyatları,
coğrafi mövqeyi, insan resursları, iqtisadi potensialı ilk
növbədə dövlətin geosiyasi çəkisi ilə
müqayisədə hər hansı bir rola malikdir. Doğrudur,
sadaladığımız amillər hər bir ölkənin
inkişafı üçün vacibdir. Lakin milli maraqlara
söykənən müstəqil xarici siyasəti olmadan həmin
ölkə geosiyasi çəkiyə yiyələnə bilməz.
Hansı siyasi dayağa və ya iqtisadi potensiala malik
olmasından asılı olmayaraq müstəqil xarici siyasət
kursu olmayan forpost ölkələrin geosiyasi çəkisi də
ola bilməz.
Digər
tərəfdən, çoxqütblü dünyada müxtəlif
güc mərkəzlərinin rəqabəti və nüfuz
müharibəsi ilə müşayiət olunması təbii
prosesdir. Bu isə geosiyasi həssas regionlarda öz təsirini
daha çox göstərir. Henri Kissencer, Zbiqnev Bjezinski, Samuel
Hantinqton da daxil olmaqla bir çox məşhur siyasi təhlilçilər
Qafqaz regionunu belə geosiyasi bölgələr sırasına
daxil edirlər. Müxtəlif sivilizasiyaların, mədəniyyətlərin,
dinlərin təmsilçilərinin yanaşı
yaşaması regionun həssaslığını bir az da
artırır. Müqayisə üçün qeyd etmək
olar ki, Avrasiya materikində Qafqaz qədər həssas region
olaraq yalnız Balkan və Mərkəzi Asiya
regionlarını göstərmək olar. Təsadüfi deyil
ki, qlobal geosiyasi mühitdə transformasiya mərhələsi
yaşayan yeni dünya nizamında hər üç region
qaynar bölgə hesab olunur və etnik-dini münaqişələr
davam edir.
Qafqaz
yeni dünya nizamında xüsusi əhəmiyyətə malik
regiondur. Qlobal və regional güc mərkəzləri Qafqazda
öz təsir dairələrini yaratmağa
çalışırlar. Belə bir şəraitdə
müstəqil və balanslaşdırılmış xarici
siyasət yeritmək olduqca çətindir. Bu prizmadan
yanaşdıqda yalnız havadarlarının siyasi xəttini
yerinə yetirən və bu missiyasından öz mənafeyi
üçün istifadə etməyə çalışan
Ermənistan forpost ölkədir. Əhalisinin yüksək
sürətlə ölkədən qaçması, strateji
iqtisadi subyektlərinin xaricilərin əlində olması Ermənistanın
geosiyasi tərəzidə heç bir çəkiyə malik
olmayan mövqeyini müəyyənləşdirir.
Gürcüstan isə xarici siyasət kursunda ifrat dərəcədə
bir qütbə meyilli olduğu üçün problemlərlə
qarşılaşır. Regionda
balanslaşdırılmış xarici siyasət,
çoxvektorlu əməkdaşlıq, bərabərhüquqlu
tərəfdaşlıq və milli maraqlara söykənən
müstəqil siyasi kurs Azərbaycanı Qafqazda geosiyasi
çəkisinə görə fərqləndirir.
Azərbaycanın xarici siyasəti
qarşısında yeni çağırışlar
Azərbaycan
Respublikasının Prezidenti İlham Əliyev Nazirlər
Kabinetinin 2013-cü ilin birinci rübünün sosial-iqtisadi
inkişafının yekunlarına həsr olunmuş
iclasında ölkəmizin
xarici siyasəti qarşısında açılan
üfüqlərlə bağlı məsələlərə
də toxunmuşdur. Etibarlı tərəfdaşlıq,
regional mərkəz, bərabərhüquqlu münasibətlər
Azərbaycanın xarici siyasətinin əsas prinsipləridir.
Bundan əlavə, dünyada resurslar uğrunda mübarizə,
milli iqtisadi təhlükəsizliyin yeni komponentləri, ərzaq
təhlükəsizliyi kimi qlobal trendlər də
müşavirədə diqqət mərkəzinə çəkilmişdir.
İqtisadi sahədə isə prioritet olaraq diversifikasiya,
xarici bazarlara çıxış, rəqabət qabiliyyətli
məhsul ixracı, çoxmərkəzli sənaye strukturu
kimi aktual mövzular ölkə başçısı tərəfindən
səsləndirilmişdir.
Prezident
İlham Əliyev Azərbaycanın qlobal səhnədə
geosiyasi çəkisinin artmasının səbəblərini
çox aydın şəkildə göstərmişdir:
"Azərbaycan beynəlxalq arenada öz mövqeyini
müdafiə etmək iqtidarındadır. Azərbaycan
dünya miqyasında çox böyük hörmətə
layiq olan bir ölkədir. Çünki sözümüz də,
əməlimiz də birdir. Azərbaycan etibarlı tərəfdaşdır."
Aydındır
ki, beynəlxalq münasibətlərdə etibarlılıq
ölkənin geosiyasi çəkisini müəyyənləşdirən
əsas amillərdən biridir. Dəfələrlə
şahid olmuşuq ki, siyasi, iqtisadi, hərbi cəhətdən
qüdrətli dövlətlər beynəlxalq və ya ikitərəfli
layihələrin icrasında öz üzərlərinə
düşən öhdəlikləri yerinə yetirməmişlər.
Yaxud bir neçə dövlətin birgə
başladıqları layihələr elə layihə olaraq da
qalmışdır. Ermənistanın timsalında biz belə
hadisələrlə tez-tez qarşılaşırıq. Azərbaycan
isə artıq əfsanəni reallığa çevirə
bilmiş ölkədir. Ulu öndər Heydər Əliyevin
memarı olduğu Bakı-Supsa, Bakı-Tbilisi-Ceyhan,
Bakı-Tbilisi-Ərzurum ixrac boru kəmərləri, cənab
İlham Əliyevin prezidentliyi dövründə həyata
keçirilən
Bakı-Tbilisi-Qars, TANAP kimi geoiqtisadi layihələr məhz
bu qəbildəndir.
Azərbaycan
tərəfdaşları və qonşuları ilə
münasibətlərdə öz
etibarlılığını hər zaman göstərmişdir.
Gürcüstan enerji böhranı ilə
qarşılaşarkən, Türkiyə Azərbaycanla birgə
enerji dəhlizi yaradarkən, ABŞ antiterror əməliyyatları
zamanı, Rusiya Şimali Qafqazda əməliyyat keçirərkən,
İran bütün sanksiyalara baxmayaraq hər zaman Azərbaycanın
etibarının şahidi olmuşlar. Bu gün Azərbaycanın
şaxələndirilmiş enerji marşrutlarının əsas
istiqamətlərindən biri Avropadır. Ölkəmiz
keçən dövr ərzində həm burada fəaliyyət
göstərən böyük neft şirkətlərinə,
həm də avropalı alıcılara münasibətdə hər
zaman üzərinə götürdüyü öhdəlikləri
lazımınca yerinə yetirmişdir. Beləliklə, Azərbaycanın
geosiyasi mövqeyi Prezident İlham Əliyevin rəhbərlik
etdiyi siyasi kursun etibarlı tərəfdaş imicini
qazanması sayəsində mümkün olmuşdur.
Azərbaycanın
müstəqil xarici siyasəti bütün tərəfdaşlarla
qarşılıqlı bərabərhüquqlu münasibətlərə
söykənir. Azərbaycan heç bir dövlətin daxili
işlərinə qarışmır və heç bir
qüvvənin ölkəmizin daxili işlərinə müdaxilə
etməsinə yol vermir. Beynəlxalq hüquq normalarına əsaslanan
bu prinsip Azərbaycanın geosiyasi səhnədə çəkisinə
də təsir göstərən amildir. Bu xüsusiyyət
forpost ölkələrə şamil oluna bilməz. Lakin
geosiyasi mühitdə məhz müstəqil dövlətlərə
qarşı daha çox təzyiqlər hiss olunur. Müstəqil
olmayan dövlətlər artıq hansısa bir güc mərkəzinin
nəzarətində olduqları üçün belə təzyiqlərlə
üzləşmirlər. Müstəqil xarici siyasət aparan
Azərbaycan Respublikası isə geosiyasi mühitdə üzləşdiyi
təzyiqlərə öz əməli addımları ilə
cavab verir. Beləliklə, Azərbaycan bütün ölkələrlə
bərabərhüquqlu münasibətlərin
inkişafında maraqlıdır və bu da ölkənin
geosiyasi çəkisinə xüsusi dəyər gətirir.
Regional mərkəz - Azərbaycan
Azərbaycan
regional mərkəzə çevrilmiş və artıq bu
regional çərçivə Qafqazın
hüdudlarını aşmışdır. Məlum olduğu
kimi, respublikamızın iqtisadiyyatı Cənubi Qafqaz
iqtisadiyyatının 75 faizini təşkil edir. Ölkəmiz
Qara dəniz regionunda təsir imkanlarına yiyələnmişdir.
Bu gün Gürcüstan, Ukrayna, Moldova və Rumıniyada Azərbaycan
iqtisadiyyatı önəmli faktora çevrilmişdir. Azərbaycan Dövlət Neft
Şirkəti bu gün
Türkiyədə neft, neft-kimya sahələrində əsas
sərmayədardır. Hətta İsrail neft
axtarışlarını Azərbaycan şirkətləri ilə
birgə həyata keçirir. Beləliklə, Yaxın Şərq
regionunda Azərbaycan önəmli yerə sahibdir. Mərkəzi
Asiya ölkələrinin də enerji resurslarının
Avropaya mümkün tranzit marşrutlarının biri Azərbaycan
üzərindəndir. Bu, eyni zamanda, Şərq-Qərb enerji
və nəqliyyat dəhlizinin mühüm şaxəsi
olduğundan qlobal əhəmiyyət kəsb edir.
Prezident
İlham Əliyevin Azərbaycanın regional mərkəz
olması ilə bağlı səsləndirdiyi fikirlər
ölkəmizin beynəlxalq arenada yerini müəyyən etmək
üçün xüsusi əhəmiyyət
daşıyır: "Beynəlxalq aləm Bakını
regional mərkəz kimi tanıyır. Bu, reallıqdır.
Ancaq bununla bərabər, mən bir daha demək istəyirəm
ki, bizim istəyimiz də, niyyətimiz də və artıq
görülən işlər də regional çərçivələrdən
çoxdan çıxıbdır. Azərbaycanda həll
olunan məsələlər, qəbul edilən qərarlar nəinki
regionun inkişafına, qitədə gedən bəzi proseslərə
də öz təsirini göstərir. Biz artıq ciddi beynəlxalq
amilə çevrilmişik. Siyasi təşəbbüslər
bizim razılığımız olmadan, bizim
maraqlarımız təmin edilmədən öz həllini tapa
bilmir."
Bu
gün Azərbaycan regionda öz tərəfdaşları ilə
birgə geosiyasi mühitə təsir edə biləcək
gücdədir. Bunun parlaq nümunəsi Bakı-Tbilisi-Qars
layihəsinin timsalında aydın görünür. Məlum
olduğu kimi, bu layihə irəli sürülərkən
dünya erməni lobbisinin təhriki ilə Qərb dövlətləri
Ermənistan kənar qalıb deyə bu layihəyə müəyyən
təzyiqlər göstərdilər. Kreditor və donor təşkilatlar
layihənin maliyyələşdirilməsində iştirak etmədilər.
Digər tərəfdən, Qərbin media monopoliyası da
öz əks-təbliğatını işə
salmışdı. Geosiyasi mühit və maliyyə şərtləri
heç bir halda Azərbaycanın xeyrinə deyildi. Dünyada
erməni havadarları bu layihənin gerçəkləşməyəcəyini
düşünür və bunun üçün əllərindən
gələni edirdilər. Ancaq Azərbaycan öz iradəsini
göstərə bildi. Artıq Bakı-Tbilisi-Qars layihəsi
yekunlaşmaq üzrədir. Azərbaycan nəinki öz üzərinə
düşən maliyyə öhdəliyini yerinə yetirdi, hətta
bu məqsədlə Gürcüstan tərəfinə
uyğun şərtlərlə kredit ayırdı. Əvvəllər
bu layihəni rentabelsiz hesab edənlər indi "Dəmir
İpək Yolu" adlandırılan bu nəqliyyat dəhlizinə
ciddi maraq göstərirlər. Bakı-Tbilisi-Qars marşrutu
Pekin-London nəqliyyat dəhlizində əsas halqa hesab edilir.
Beləliklə,
Azərbaycanın ilk dəfə öz maliyyə imkanları
hesabına Türkiyə və Gürcüstanla birgə həyata
keçirməkdə olduğu layihə onun geosiyasi səhnədə
üstün mövqeyini göstərir. Bu, Azərbaycanın
öz tərəfdaşları ilə birgə dünya erməni
lobbisi üzərində əhəmiyyətli qələbəsi
olmaqla bərabər, həm də geosiyasi səhnədə
regional mərkəz statusunu təsdiqləyən mühüm
addımdır.
Azərbaycan
geosiyasi ağırlığını hər keçən
gün daha da artırmaqdadır. Trans-Anadolu (TANAP) qaz kəməri
layihəsini növbəti addım hesab etmək olar. Məlum
olduğu kimi, Xəzər hövzəsindən Avropaya enerji
daşıyıcılarının nəqli marşrutu ilə
bağlı mürəkkəb geosiyasi proseslər
başlamışdır. "Nabukko" adlı konsorsium
yaradılmışdı və zaman-zaman regionda müxtəlif
qonşularımızı qıcıqlandıran bəyanatlar
verilirdi. Azərbaycan isə keçən illər ərzində
hər zaman öz təmkinli mövqeyini qoruyurdu. Azərbaycan
müxtəlif istiqamətlərdə enerji nəqlinə və
bunun üçün bütün maraqlı tərəflərlə
əməkdaşlıq etməyə hazır olduğunu
praktik addımlarla göstərirdi.
Amma
Avropaya birbaşa qaz nəqli reallaşmalı olduğu vaxtda
"Nabukko" üzrə tərəfdaşlar xəyali layihədən
real maliyyələşdirməyə doğru addım
atmadı. Artıq yeni nəql marşrutları, yeni tərkibdə
konsorsiumlar dövriyyəyə daxil oldu. Belə olan halda Azərbaycan
yenə geosiyasi ağırlığını ortaya qoya bildi.
Azərbaycanla Türkiyə öz təşəbbüsləri
ilə "Trans-Anadolu" layihəsini həyata keçirməklə
əlaqədar Saziş imzaladı. Beləliklə, Prezident
İlham Əliyevin bildirdiyi kimi: "Biz enerji diplomatiyası
istiqamətində bir çox hallarda vacib qərarların təşəbbüskarıyıq.
Bu sahədə gedən proseslər bizim qərarımızdan
asılıdır. İqtisadi əməkdaşlıq, nəqliyyat
məsələlərinin həlli, Asiyanı Avropa ilə birləşdirən
dəhlizlərin fəaliyyət göstərməsi ilə
bağlı bizim sözümüz həlledicidir. Bu söz təşəbbüslərin
irəli sürülməsidir və bu təşəbbüslərin
həyata keçirilməsidir".
Beynəlxalq bazarlara
çıxış
Prezident
İlham Əliyev müşavirədə iqtisadi sahədə
də ölkə qarşısında yeni vəzifələr
qoydu və qlobal trendlərin işığında Azərbaycanın
qarşılaşdığı
çağırışlara münasibət bildirdi. Rəqabət
qabiliyyətli məhsul istehsalı, texnoparklara əsaslanan
çoxmərkəzli sənaye strukturu və xarici bazarlara
çıxış. Bu gün ölkə iqtisadiyyatı
qarşısında ən mühüm vəzifələrdən
biri xarici bazarlarda böyük mövqelərə yiyələnməkdir.
Artıq
bir neçə ildir ki, ardıcıl sürətlə
artmaqda olan milli iqtisadiyyat xarici bazarlara
çıxışı təmin etməyi zəruri edir.
Çünki hələlik Azərbaycanın daxili
bazarının potensialı kifayət qədərdir və
milli iqtisadiyyat bir çox sahələrdə bu tələbatı
ödəməyə yönəlmişdir. Hazırkı
artım sürətini nəzərə alsaq, müəyyən
müddətdən sonra milli iqtisadiyyatın istehsal
potensialı daxili bazarı üstələyəcəkdir. Bu
isə inkişaf tempinə təsir edə bilər. Belə
olan halda ölkə daxilində rəqabət qabiliyyətli məhsul
istehsalının təşkili, xarici bazarlarda isə yeni
mövqelər qazanmaq lazımdır.
Ölkədə
rəqabət qabiliyyətli istehsal hər keçən
gün daha da güclənir. Hər il ixrac nomenklaturasına
yeni məhsullar daxil olur və keyfiyyət artımı baş
verir. Digər bir məsələ isə xarici bazarlara daxil
olmaqla bağlıdır.
Müasir
dövrdə dünya bazarlarına çıxmaq və konkret
sahə və ya məhsul üzrə yer tutmaq olduqca çətindir.
Bunun isə başlıca səbəblərindən biri
mövcud bazarın artıq bölüşdürülməsidir
və ya başqa adla qlobal monopoliyadır. Burada obyektiv və
subyektiv səbəbləri, eləcə də beynəlxalq təcrübədə
müəyyən məqamları xatırlatmaq yerinə
düşər. Obyektiv səbəblər arasında keyfiyyətlə
yanaşı brend, reklam, marketinq kimi nüansları sadalamaq
istərdik. Qərbin aparıcı dövlətləri
artıq uzun illərdir ki, konkret ixtisaslaşdıqları məhsul
üzrə bütün sadalanan istiqamətlərdə
üstün mövqeyə yiyələnmişlər. Belə
olan halda yeni ölkələrə həmin Qərb məhsullarının
olduğu bazarlara daxil olmaq olduqca çətindir.
Subyektiv
səbəblər arasında isə inkişaf etmiş ölkələrin
bazarları öz inhisarında saxlamasını qeyd etmək
olar. Avropa İttifaqının təcrübəsində biz
qeyd olunan proseslərin şahidiyik. Sadə bir misal çəkək.
Avropada əsas süd məhsulları
istehsalçıları Danimarka və Hollandiyadır və bu
ölkələr vahid bazarda üstün mövqe tuturlar.
Süd məhsulları istehsalı üzrə ixtisaslaşan
Baltikyanı ölkələrdən Latviya və Litva Avropa
İttifaqına daxil olduqdan sonra bu sahədə konkret problemlərlə
üzləşdilər. Ənənəvi bazarlarını
itirən Baltikyanı ölkələr Avropa İttifaqı
daxilində Hollandiya və Danimarkaya uduzmaqla milli
iqtisadiyyatlarında əsas sahələrdən birində zərbə
aldılar.
Buna
görə də əksər dövlətlər təyinat
ölkəsinə ilkin olaraq xarici yardım proqramları ilə
daxil olmağa çalışırlar. Bu təcrübədən
ən çox Yaponiya və Koreya Respublikası istifadə
edir. Əksər Qərb ölkələrinin siyasi mahiyyətli
xarici yardım siyasətindən fərqli olaraq Yaponiya və
Koreya modeli daha çox iqtisadi xarakter daşıyır. Yapon Rəsmi
İnkişaf Yardımının (ODA) qrant, texniki yardım və
güzəştli kreditləri daha çox yapon sərmayəsinin
daxil olmaq istədiyi və Yaponiya şirkətlərinin cəlb
olunduğu layihələrin olduğu ölkələrə
yönəlir. Belə bir mənzərə formalaşır
ki, yapon sərmayəsi iri layihələrə yönəldilməzdən
əvvəl ayrılan xarici yardım hazırlıq mərhələsi
daşıyır. Yapon donor təşkilatları
ayrılmış qrant və texniki yardımın resipiyent
ölkə tərəfindən necə həyata keçirilməsini
izləyərək gələcəkdə ölkənin kredit
ödəniş qabiliyyətini öyrənirlər. Beləliklə,
xarici yardım proqramlarının Yaponiya modeli iqtisadi xarakter
daşıyır. Qeyd etməliyik ki, Asiyanın bir sıra
inkişaf etmiş ölkələri Koreya Respublikası,
Malayziya və hətta bir qədər təəccüblü
olsa da, müəyyən fərqlər olmaqla Çin Xalq
Respublikasının da həyata keçirdiyi xarici yardım
proqramları məhz bu modelin məqsəd və göstəricilərini
özündə əks etdirir.
Azərbaycan son illər donor ölkəyə
çevrilmişdir. Artıq bir sıra ölkələrdə
Azərbaycan şirkətləri ən böyük investordur.
Güzəştli kreditləri də xarici
yardım aləti hesab etsək Azərbaycan bu sahədə də
təcrübəyə malikdir. İqtisadi
inkişafımızın yeni mərhələsində
ölkəmizin xarici ölkələrə yönəlik
yardım layihələrinin bu ölkə bazarlarında
mövqe tutmağa istiqamətlənməsi perspektivli hesab edilə
bilər. Buna görə də yaxın gələcəkdə
Azərbaycan üçün iqtisadi xarakterli xarici yardımlar
aktual olacaqdır.
Qlobal trendlər
Prezident İlham Əliyev müşavirədə qlobal
trendlər və bununla əlaqədar Azərbaycan
Respublikasının qarşısında dayanan
çağırışlara da toxunmuşdur. Resurslar uğrunda
qlobal miqyasda mübarizə və ərzaq təhlükəsizliyi
kimi qlobal trendlərin aktuallığı səsləndirilmişdir.
Prezident bildirmişdir ki, "Dünyada indi resurslar uğrunda
mübarizə gedir: enerji, su resursları uğrunda... Ərzaq təhlükəsizliyi enerji təhlükəsizliyi
kimi, bəlkə də ondan da vacib olan məsələdir.
İstisna edilmir ki, gələcək illərdə
bu, əsas məsələlərdən birinə çevriləcəkdir.
Çünki qlobal meyillər bunu göstərir."
Müasir dövrümüzdə içməli su mənbələrinin
çatışmazlığı dünyanı təhdid edən
qlobal problemlərdən biridir. Hesablamalara görə, hazırda
dünyada təxminən 1,5 milyard nəfər
içməli su çatışmazlığından əziyyət
çəkir. BMT-nin 1998-ci ildə bununla
bağlı hazırladığı hesabatda göstərilir
ki, 2050-ci ildə 65 ölkədə 10 milyard nəfərə
yaxın əhali bu problemlə qarşı-qarşıya
qalacaqdır.
Su problemi yeni minillikdə geosiyasi faktora
çevrilmişdir. XXI əsrdə su geostrateji əhəmiyyətinə
görə neftin XX əsrdəki yerini tuta bilər. Neft
uğrunda aparılan gizli və açıq mübarizələrin
və hətta müharibələrin yeni minillikdə su
uğrunda olma ehtimalı da var. ABŞ-ın Mərkəzi Kəşfiyyat
İdarəsinin proqnozlarına görə, 2020-ci ilədək
inkişaf etmiş ölkələrin bir-biriləri ilə
enerji resursları üstündə deyil, məhz içməli
su üstündə müharibə ehtimalı daha
böyükdür.
Artıq dünyada su ehtiyatlarının
yaratdığı dövlətlərarası gərginlik
nöqtələri mövcuddur. İsraildən
Hindistana, Türkiyədən Botsvanaya qədər su
uğrunda mübahisələr münaqişələrə
çevrilmək üzrədir. Yaxın
Şərqdə Nil hövzəsində Misir-Sudan-Efiopiya,
İordan çayı hövzəsində İsrail-Suriya-İordaniya,
Dəclə və Fərat hövzəsində Türkiyə-Suriya-İraq
və İran-İraq, Mərkəzi Asiya ölkələri
arasında su münaqişələri daha aktualdır.
Su resursları isə ərzaq təhlükəsizliyi ilə
birbaşa əlaqəlidir. Bu baxımdan qlobal
arenada yeni minilliyin ən böyük təhdidlərindən
olan ərzaq çatışmazlığı hər bir
dövlət üçün aktualdır.
Beləliklə,
ölkəmiz geosiyasi səhnədə hər keçən
gün öz mövqelərini daha da gücləndirir. Artıq
Azərbaycanın iştirakı olmadan regionda heç bir layihə
həyata keçirilə bilməz. Azərbaycanın mövqeyi
regional çərçivəni aşaraq daha böyük əhatə
dairəsinə doğru genişlənməkdədir. Geosiyasi
səhnədə yüksələn Azərbaycan qlobal trendlərə
uyğun çevik xarici siyasət həyata keçirir və
artıq xüsusi geosiyasi çəkiyə malik ölkəyə
çevrilməkdədir. Azərbaycan Respublikasının
Prezidenti İlham Əliyevin ardıcıl, səmərəli
və düşünülmüş fəaliyyəti sayəsində
respublikamız yeni geosiyasi və iqtisadi üfüqlər fəth
etmək əzmindədir.
Ərəstü HƏBİBBƏYLİ,
Azərbaycan Respublikası
Prezidentinin Administrasiyasının
Xarici əlaqələr şöbəsinin
Analitik informasiya sektorunun
müdiri, iqtisad elmləri üzrə
fəlsəfə doktoru
Azərbaycan.-2013.- 16 may.- S.3.