Azərbaycan Prezidenti İlham Əliyev Gürcüstanın daxili işlər nazirini qəbul
etmişdir
Azərbaycan
Respublikasının Prezidenti İlham Əliyev mayın 21-də
Gürcüstanın daxili işlər naziri İrakli
Ğaribaşvilini qəbul etmişdir.
Daxili
işlər naziri İrakli Ğaribaşvili
Gürcüstanın Baş naziri Bidzina İvanişvilinin
salamlarını dövlət başçısına
çatdırdı. Nazir vəzifəsində ölkəmizə
ilk dəfə səfər etdiyini vurğulayan İrakli
Ğaribaşvili Gürcüstanın Azərbaycan ilə
strateji tərəfdaşlığa xüsusi önəm
verdiyini dedi. O, Gürcüstanın yeni hökumətinin səyləri
sayəsində ölkələrimiz arasında strateji tərəfdaşlığın
və dostluq münasibətlərinin bütün sahələrdə
daha da genişlənəcəyinə və dərinləşəcəyinə
əmin olduğunu bildirdi. İrakli Ğaribaşvili
Gürcüstanın Baş naziri Bidzina İvanişvilinin ilk
səfərlərindən birini Azərbaycana etməsini bunun
yaxşı göstəricisi kimi dəyərləndirdi.
Azərbaycan
ilə Gürcüstan arasında qədim tarixi əlaqələrin,
dostluq və qardaşlıq münasibətlərinin mövcud
olduğunu vurğulayan Prezident İlham Əliyev
Gürcüstanın yeni hökumətinin ölkələrimiz
arasında dostluq və strateji tərəfdaşlıq əlaqələrinin
daha da genişləndirilməsinə böyük önəm
verməsindən məmnunluğunu ifadə etdi. Dövlət
başçısı Azərbaycanın da öz növbəsində
ikitərəfli münasibətlərimizin daha da möhkəmləndirilməsi
və geniş sahələri əhatə etməsi
üçün səylərini əsirgəməyəcəyini
qeyd etdi. Hüquq-mühafizə orqanları arasında əməkdaşlığa
toxunan Prezident İlham Əliyev cinayətkarlığa
qarşı birgə mübarizəni və informasiya
mübadiləsini daha da genişləndirməyin önəmini
vurğuladı.
Dövlət
başçısı Baş nazir Bidzina İvanişvilinin
salamlarına görə minnətdarlığını
bildirdi, onun da salamlarını Gürcüstanın Baş
nazirinə çatdırmağı xahiş etdi.
AzərTAc
Azərbaycan.-2013.- 22 may.- S.1.