Odessada Ukrayna Azərbaycanlı
Gənclər Birliyinin III Ümumukrayna forumu öz işini
uğurla başa çatdırmışdır
Forumda prezident seçkilərində
dövlət başçısı İlham Əliyevin namizədliyinin
dəstəklənməsi barədə bəyanat qəbul
edilmişdir
Mayın
21-də Odessada Ukrayna Azərbaycanlı Gənclər Birliyinin
(UAGB) III Ümumukrayna forumu öz işini uğurla başa
çatdırmışdır.
İkigünlük
forumda 15 ölkədən, o cümlədən Azərbaycan,
Ukrayna, Avropa dövlətlərindən 400 nümayəndə
iştirak etmişdir.
Forumun
ikinci iş günü Odessanın "Bristol"
mehmanxanasının konfrans salonunda Azərbaycanın və
Ukraynanın gənclər təşkilatlarının
görüşü ilə açılmışdır.
"İrəli" İctimai Birliyinin sədri Rauf Mərdiyev
və layihələrin rəhbəri Arzu Bəbirova, Ukrayna Gənclər
Forumu başçısının müavini Anatoli Polovinets,
Azərbaycan Könüllülər İctimai Birliyinin rəhbəri
İmaməddin Quliyev, Azərbaycan Respublikasının
Prezidenti yanında Vətəndaşlara Xidmət və Sosial
İnnovasiyalar üzrə Dövlət Agentliyinin əməkdaşı
Məhəmmədəli
Xudaverdiyev, UAGB sədrinin müavini İlhamə Allahverdiyeva,
Ümumukrayna Gənclər Assambleyasının
başçısı Yana Şıxəliyeva təqdimatlarla
çıxış etmişlər.
Sonra
Ermənistan-Azərbaycan, Dağlıq Qarabağ
münaqişəsinə həsr olunmuş
üçüncü iclas
keçirilmişdir. İclasda Milli Məclisin deputatı
Ceyhun Osmanlı, ölkəmizin Ukraynadakı səfiri Eynulla Mədətli,
Azərbaycanın gənclər və idman nazirinin müavini
İntiqam Babayev, Ümumrusiya Azərbaycan Konqresinin
icraçı direktoru Nemət Nağdəliyev və
ASAİF-in baş katibi Vüsal Qurbanov çıxış
etmişlər.
"Azərbaycan
Respublikası Dağlıq Qarabağ Bölgəsinin Azərbaycanlı
İcması" İctimai Birliyi Əlaqələndirmə
Şurasının sədri Orxan Əkbərovun moderatoru
olduğu iclasda münaqişənin tarixi,
danışıqlar prosesinin cari vəziyyəti və
perspektivlər müzakirə
edilmişdir. Dağlıq
Qarabağ bölgəsinin azərbaycanlı
icmasının fəaliyyət
prinsipləri və onun işində gənclərin rolu da
müzakirə olunmuşdur.
İclas iştirakçıları Azərbaycan və Ukrayna gənclərinin
mövzuya dair çoxsaylı
suallarını cavablandırmışlar.
Tədbirin
sonunda UAGB-nin sədri Anar Tahirov Azərbaycanda növbəti
prezident seçkilərində dövlət
başçısı İlham Əliyevin namizədliyinin dəstəklənməsi
haqqında forum iştirakçıları tərəfindən
yekdilliklə qəbul edilmiş bəyanatın mətnini
oxumuşdur.
Sürəkli
alqışlarla qarşılanmış sənəddə Azərbaycanın
son on ildə əldə etdiyi uğurlar, ölkəmizin həyata
keçirdiyi regional layihələr xüsusi
vurğulanmışdır. Bəyanatda deyilir: "Biz - Şərqi
Avropa və Ukraynada təhsil alan 350-dən çox azərbaycanlı
gəncin qatıldığı
forum iştirakçıları dövlət
başçısının yürütdüyü daxili və
xarici siyasəti alqışlayır, qarşıdan gələn
prezident seçkilərində birmənalı olaraq İlham Əliyevin
namizədliyini dəstəkləyəcəyimizi bəyan
edirik. Əminik ki, möhtərəm Prezident İlham Əliyevin
rəhbərliyi altında müstəqil Azərbaycan dövləti
növbəti beş ildə də böyük inkişaf yolu
keçərək dünyanın ən qüdrətli ölkələri
sırasında mövqeyini möhkəmləndirəcək,
xalqımızın rifah halının yüksəldilməsi
istiqamətində mühüm uğurlara imza
atacaqdır".
Bununla
da UAGB-nin III Ümumukrayna forumu bağlı elan edilmişdir.
Zeynal AĞAZADƏ,
AzərTAc-ın xüsusi müxbiri
Odessa
Azərbaycan.-2013.- 22 may.- S.8.