«Azərbaycan ailəsi» film festivalının yubileyi qeyd olunmuşdur

Mayın 22-də Bakıda Heydər Əliyev Fondunun, Ailə, Qadın və Uşaq Problemləri üzrə Dövlət Komitəsinin (AQUPDK) və BMT-nin Əhali Fondunun birgə layihəsi əsasında təşkil olunan "Azərbaycan ailəsi" film festivalının yubiley mərasimi keçirilmişdir.

Tədbir ümummilli lider Heydər Əliyevin 90 ilik yubileyinə həsr olunmuşdur.

AzərTAc xəbər verir ki, tədbirdə çıxış edən AQUPDK-nın sədri Hicran Hüseynova ümummilli lider Heydər Əliyevin əsası qoyulmuş dövlət ailə siyasətinin bu gün uğurla davam etdirildiyini bildirmişdir. Qeyd olunmuşdur ki, Azərbaycanın birinci xanımı, Heydər Əliyev Fondunun prezidenti Mehriban Əliyeva ailələrin rifahının yaxşılaşdırılması sahəsində bir sıra mühüm layihələr reallaşdırır.

Artıq beşinci dəfə keçirilən "Azərbaycan ailəsi" film festivalının ictimaiyyət tərəfindən maraqla qarşılandığını deyən komitə sədri bildirmişdir ki, layihənin əsas məqsədi ailə institutunu möhkəmləndirmək, cəmiyyətdə ailənin nüfuzunu yüksəltmək, milli ailə dəyərlərinin təbliği və yaşadılmasıdır. Festival sənətdə ilk addımlarını atan gənc rejissorların öz istedadlarını və yaradıcılıq imkanlarını nümayiş etdirmələri və işlərini geniş tamaşaçı kütləsinə təqdim etmələri üçün gözəl məkandır. Bu layihənin bir mühüm cəhəti də milli kino sənətinin inkişafına xidmət etməsi ilə bağlıdır.

Heydər Əliyev Fondunun əməkdaşı Fərid Ağamalıyev film festivalının iştirakçılarını yubiley münasibətilə təbrik etmiş, onlara gələcək fəaliyyətlərində uğurlar arzulamışdır.

BMT-nin Əhali Fondunun ölkəmizdəki nümayəndəliyinin baş müşaviri Fərid Babayev təmsil etdiyi qurumun gender bərabərliyinin təmin olunması sahəsində Azərbaycan dövlətinin məqsədyönlü fəaliyyətini daim dəstəklədiyini bildirmişdir.

İctimai Televiziya və Radio Yayımları Şirkətinin baş direktoru, əməkdar incəsənət xadimi Cəmil Quliyev "Azərbaycan ailəsi" film festivalının beynəlxalq status aldığını diqqətə çatdırmış, layihədə bir sıra ölkələri təmsil edən istedadlı gənc rejissorların iştirak etdiyini söyləmişdir. Bildirmişdir ki, münsiflər heyəti qalibləri seçərkən ailə problemlərinin kinematoqrafiyanın imkanlarından istifadə edərək peşəkarlıqla açılması prinsiplərinə xüsusi diqqət yetirmişdir.

Azərbaycan Respublikası Kinematoqrafçılar İttifaqının sədri, xalq artisti Şəfiqə Məmmədova hər il olduğu kimi, bu il də festivala maraqlı işlərin təqdim olunduğunu bildirmişdir.

Film festivalının əhəmiyyətini qeyd edən Ş.Məmmədova demişdir ki, televiziya filmlərinə böyük maraq vardır və film çəkilərkən daha çox müsbət və ümidverici mövzulara müraciət olunmalıdır. Yerli cizgi filmlərinin sayının az olduğu üçün animasiya filmlərinin istehsalına geniş yer verilməlidir.

Sonda ictimaiyyətin tanınmış nümayəndələrindən ibarət münsiflər heyəti tərəfindən seçilmiş "Ən yaxşı film", "Ən yaxşı xarici film", "Ən yaxşı sosial çarx" nominasiyaları və nazirliklərin fəaliyyət istiqamətlərinə uyğun seçilmiş filmlər üzrə qaliblər mükafatlandırılmışlar.

Azərbaycan.-2013.- 23 may.- S.8.