Ana ürəyi
Mən ömrümün 50 ilini İkinci Dünya müharibəsində vuruşan azərbaycanlılarla bağlı araşdırmalara, axtarışlara həsr etmişəm. Bu dəfə sizə yaddaşıma əbədi həkk olunan təsirli bir əhvalatı danışmaq istəyirəm.
1943-cü ilin yanvarında Rəna adlı bakılı qadın yeganə oğlu Eminin ağır yaralanması xəbərini alan kimi Rusiyaya - onun yatdığı hərbi hospitala gedir. Hospitalda həkimlərə yalvarır ki, oğluna özünün baxmasına icazə versinlər. 3 il döyüşdükdən sonra ağır yaralanan Emin nə hərəkət edə, nə də ki, danışa bilirdi. Müharibənin amansız qanunlarına baxmayaraq, Rəna xanıma həkim olduğu üçün bir müddət hospitalda qalmağa icazə verirlər. Onun ana kimi bütün xəstələrə baxması, hamının qayğısını oğlu kimi çəkməsi həkimlərin dilindən düşmür. O, bütün yaralı əsgərlərin, həkim və şəfqət bacılarının sevimlisinə çevrilir, hamı ona "ana" deyə müraciət edir.
Lakin nə Rəna xanımın, nə də başqa həkimlərin səyləri onun oğlunu xilas edə bilmir. Oğlu şaxtalı bir qış gecəsi anasının gözlərinə baxa-baxa əbədiyyətə qovuşur. Son nəfəsində çətinliklə: "Ana, məni apar, vətəndə dəfn elə", - deyə bilir.
Bu, mümkün idimi? O zaman bütün hospitallarda ölən əsgərləri elə o şəhərdəki qardaş qəbiristanlıqlarında təntənəli surətdə dəfn edirdilər. Hərbin qanunlarına görə, Emin də beləcə dəfn olunmalı idi. Hospitalın rəisi, həkimlər, hətta şəhər hərbi komissarı da cənazənin Azərbaycana aparılmasını mümkünsüz sayır, bunu ağıllarına belə gətirmirdilər.
Rəna xanım yalvarır, inadkarlıq edir, oğlunun son arzusunu yerinə yetirməsə, yaşaya bilməyəcəyini deyir. Ananın kəsilmək bilməyən göz yaşları, inadkarlığı hospitalın, hərbi komissarlığın və hətta şəhər partiya komitəsinin rəhbərliyinin ürəyini yumşaldır. İstisna olaraq oğlunun nəşini vətənə aparmağa icazə verirlər. Emini tabuta qoyurlar, ana üçün isə isti örtük, döşək, balınc və başqa lazım olan şeyləri hazırlayırlar. Qafqaz istiqamətində çıxan qatara əlavə vaqon qoşub Rəna xanımı oğlu ilə yola salırlar. Azərbaycanda doğulan baş serjant Yefim Abramova ananı Bakıyadək müşayiət etmək əmri verilir. Onları yola salmağa xeyli insan axışıb gəlir. Kimisi onlar üçün isti paltar, kimisi yemək, kimisi də öz çörək payını gətirir. Hospitalın rəisi, həkim və şəfqət bacıları, hərbi komissar və əhvalatdan xəbər tutanlar da onları yola salanların sırasında idi.
Müharibə
illərində dəmir yollarında iş çox
ağır və məsuliyyətli idi. Hətta bəzən hərbi
texnika, silah və ordu hissələrini daşıyan qatarlar
dayanacaqlarda saatlarla dayanmalı olurdu. Rəna xanımı
aparan qatar da belələrindən biri idi. Qatar saatlarla yol gedib
hər dəfə dayananda əsgərlər vaqonlardan
düşüb, ana olan vaqonun qabağına
toplaşırdılar. O dövrdə
döyüşçüləri cəbhəyə, yaralı
əsgərləri geriyə aparan qatarlar stansiyalarda dayananda
yerli əhali çox vaxt onları qarşılayar,
qarlı-şaxtalı günlərdə belə onlara geyim
şeyləri, hətta bəzən haradansa tapıb
gül-çiçək dəstələri gətirənlər
də olurdu. Bu dayanacaqda da az bir vaxtda eşidib-bilən xeyli
yerli adam vaqonun qabağına
yığışmışdı, hətta qışın
bu şaxtalı günündə əllərində
kiçik gül dəstələri tutanlar da var idi. Yefim yenə
də camaatın gətirdiklərini səliqə ilə bir
yerə yığıb ananın yanına qoyub, yerə
düşdü. Qatar tərpəndi. Artıq iki gün idi ki,
ana ilə balanı aparan qatar yol gedirdi. Bu iki gün ərzində
Rəna xanım nə yatdı, nə bir tikə çörək
yedi. Qatar Azərbaycana yaxınlaşanda Yefim yenə anaya
baş çəkdi. Bu dəfə o, ananı oğlunun
tabutunu qucaqlayıb yatmış görəndə tez vaqonun
qapısını örtüb, əli ilə
yığışanlara işarə etdi ki, səs
salmasınlar, ana yuxuya gedib, yatır. Bir müddət sonra
qatar yenə dayananda Yefim vaqonun qapısını
açıb yuxarı qalxdı. Ananı yatmış görəndə
narahat oldu, ona yaxınlaşıb diqqətlə baxdı. Rəna
xanım bir əlində oğlunun son döyüşdə
aldığı Qırmızı ulduz ordenini tutmuşdu, o
biri əli ilə onun tabutunu qucaqlamışdı. Ananın
uzağa dikilən baxışları donmuşdu. Onun gözlərinə
oğlunun son arzusunu yerinə
yetirməyə taqəti qalmayan bir ana nisgilinin kədəri
çökmüşdü.
Musa BAĞIROV,
tədqiqatçı jurnalist, kinematoqraf
Azərbaycan.- 2013.- 26 may.- S. 4.