«Gələcəyə baxış» ABŞ - Azərbaycan Forumunun iştirakçıları Qobustan Milli Tarix Bədii Qoruğunda olmuşlar

Azərbaycanın Dostları Assambleyası, Amerika və Avrasiya Türk Şurasının təşkilatçılığı ilə Bakıda işə başlayan "Gələcəyə baxış" ABŞ - Azərbaycan Forumunun iştirakçıları mayın 26-da Qobustan Milli Tarix-Bədii Qoruğunda olmuşlar.

AzərTAc xəbər verir ki, qonaqlar əvvəlcə qoruğun muzeyində nümayiş etdirilən eksponatlara baxmışlar.

Forum iştirakçılarına məlumat verilmişdir ki, muzeyin rəqəmsal dizaynı Latviyanın "Dd-studio" şirkəti tərəfindən hazırlanmışdır.

Bildirilmişdir ki, Qobustan Azərbaycanın qədim tarixinin yadigarlarından biridir. Qoruq bu ərazinin üst paleolit və mezolit dövrlərinin ilk ovçu qəbilələrinin, neolit dövrünün ilk maldarlarının məskəni olmasını sübut edən abidədir. Ərazidə aparılmış tədqiqatlar nəticəsində mindən çox qayanın üzərində altı mindən artıq təsvir qeydə alınmışdır. Burada 40-dan artıq kurqan aşkar olunmuş və 105 mindən çox maddi-mədəniyyət nümunəsi tapılmışdır. Qobustan qayalarında insan, heyvan, kollektiv əmək, qayıq şəkilləri, döyüş və ov səhnələri təsvir edilmişdir. Oyma, sürtmə, çapma və cızma üsulları ilə çəkilmiş təsvirlərin ən qədimləri eramızdan əvvəl VIII minilliyə aiddir.

Diqqətə çatdırılmışdır ki, buradakı qavaldaş daş dövründə yaşamış insanların istifadə etdikləri musiqi alətidir. Qobustan qayalarında qədim Azərbaycanın "Yallı" rəqs səhnələri təsvir olunmuşdur. Bu rəqsin uğurlu ov üçün ovsun mərasimi olduğu vurğulanmışdır. Qayalardakı Roma yazısı eramızın 81-96-cı illərinə aiddir və altı sətirdən ibarətdir. Bu, Roma imperatoru Domisianın dövründə XII Roma legionunun burada olduğunu göstərir.

Qeyd edilmişdir ki, Qobustan Milli Tarix-Bədii Qoruğundakı nadir qayaüstü rəsmlərin geniş təbliğinin xüsusi əhəmiyyətini nəzərə alan dövlət başçısı İlham Əliyev qoruq muzeyinin yeni binasının tikilməsi üçün Prezidentin Ehtiyat Fondundan vəsait ayrılması ilə bağlı sərəncam imzalamışdır.

Forum iştirakçılarının diqqətinə çatdırılmışdır ki, 4 min hektardan artıq ərazidə yerləşən, dünya əhəmiyyətli tarixi abidə olan Qobustan qoruğu 2007-ci ildə UNESCO-nun maddi-mədəni irs siyahısına daxil edilmişdir.

Qədim insan məskəni ilə tanışlıqdan məmnun qalan qonaqlar ərazidə aparılmış tədqiqat işləri və tarixi eksponatlarla maraqlanmışlar.

"Gələcəyə baxış" ABŞ - Azərbaycan Forumunun iştirakçıları Qobustan Milli Tarix-Bədii Qoruğu ilə tanışlıqdan xoş təəssüratla ayrılmışlar.

Azərbaycan.- 2013.- 28 may.- S. 7.