Dövlət Neft Şirkətində Fransa nümayəndə heyəti ilə görüş keçirilmişdir

Azərbaycan Respublikası Dövlət Neft Şirkətində (ARDNŞ) İkinci Mədəniyyətlərarası Dialoq Forumunda iştirak etmək üçün Bakıya gələn Fransa nümayəndə heyəti ilə görüş keçirilmişdir.

AzərTAc xəbər verir ki, ARDNŞ-in prezidenti Rövnəq Abdullayev Azərbaycan-Fransa münasibətlərinin inkişafında qarşılıqlı səfərlərin, görüş və fikir mübadilələrinin mühüm rol oynadığını qeyd etmiş və iki ölkə arasında dialoqun gücləndirilməsi baxımından Bakı Forumunun əhəmiyyətini xüsusi vurğulamışdır.

Fransa Milli Assembleyasında Azərbaycan-Fransa dostluq qrupunun vitse-prezidenti Jean-Luc Reitzer Fransa ilə Azərbaycan arasında əlaqələrin getdikcə möhkəmləndiyini qeyd etmiş, Avropanın enerji təhlükəsizliyi baxımından ölkəmizin rolunu yüksək qiymətləndirmişlər. Fransalı deputatlar Heydər Əliyev Fondu tərəfindən təşkil edilən bu səfərin onlara Azərbaycanın zəngin tarixi və mədəniyyəti, ölkədə gedən müasirləşmə və quruculuq işləri ilə yaxından tanış olmaq imkanı verdiyini bildirmiş, Azərbaycan xalqının qonaqpərvərliyinə heyran qaldıqlarını söyləmişlər.

Azərbaycan.- 2013.- 31 may.- S. 6.