Əlimərdan bəy Topçubaşovun
xatirəsi bütün türk xalqları tərəfindən
minnətdarlıqla yad olunur
Mayın
30-da Azərbaycan Mətbuat Şurasının və
"Kaspi" qəzetinin təşkilatçılığı
ilə Azərbaycan Xalq Cümhuriyyətinin banilərindən
olan Əlimərdan bəy Topçubaşovun 150 illik yubileyi
ilə bağlı elmi konfrans keçirilmişdir.
AzərTAc
xəbər verir ki, Mətbuat Şurasının sədri Əflatun
Amaşov Azərbaycan Prezidentinin "Əlimərdan bəy
Topçubaşovun 150 illik yubileyinin keçirilməsi
haqqında" 2013-cü il 25
fevral tarixli sərəncamını
diqqətə çatdırmışdır.
Ə.Amaşov
Azərbaycan Xalq Cümhuriyyəti hökumətinin
qurucularından biri, Cümhuriyyət parlamentinin ilk sədri Ə.Topçubaşovun
xalqımızın diplomatiya tarixində müstəsna xidmətlərindən
danışmışdır.
Qeyd
edilmişdir ki, Ə.Topçubaşov təkcə Azərbaycan
xalqının deyil, bütün Rusiya müsəlmanlarının
milli azadlıq hərəkatı tarixində əvəzsiz
xidmətləri olmuş nadir şəxsiyyətlərdən
biridir. O, dövrünün yüksək təhsil
almış hüquqşünası, elm və ictimai xadimi,
milli ruhlu naşiri olmuşdur.
Elmi
konfransda "Kaspi" qəzetinin təsisçisi Sona Vəliyeva
"Əlimərdan bəy Topçubaşov və azərbaycançılıq
məfkurəsi" mövzusunda məruzə etmişdir.
S.Vəliyeva
bildirmişdir ki, XIX əsrin sonu, XX əsrin əvvəllərində
Əlimərdan bəy Topçubaşovun həyat və fəaliyyəti
haqqında hər bir tədqiqat materialı yeni faktların
üzə çıxmasına şərait yaradır. Ə.Topçubaşovun
yaradıcılığı ilə tanışlıq Azərbaycan
xalqının tarixi keçmişinin ən vacib məqamlarının
mənzərəsini əks etdirir.
Məruzəçi
Ə.Topçubaşovun ictimai-siyasi fəaliyyətinin
püxtələşməsində məktəb rolunu oynayan
"Kaspi" qəzetini xüsusilə vurğulayaraq
demişdir: "Kaspi" qəzeti 1898-ci ildən - Ə.Topçubaşovun
bu qəzetə redaktor təyin
olunduğu vaxtdan "müsəlman Kaspisi"
adlandırılmışdır. Onun redaktorluğu
dövründə qəzetin gündəlik tirajının on
minə çatması, Rusiya imperiyasının bütün ərazisində
yaşayanlara, xüsusilə türkdilli və müsəlman
dininə məxsus xalqlara göndərilərək onları
birliyə səsləməsi Əlimərdan bəyi
ümummüsəlman lideri kimi yüksək dəyərləndirirdi".
Sona
Vəliyeva diqqətə çatdırmışdır ki, Azərbaycan
xalqının milli şüurunun oyanmasında, müstəqillik
uğrunda mübarizədə, dövlətçilik məfkurəsinin
formalaşmasında Ə.Topçubaşovun misilsiz xidmətləri
olmuşdur və bu gün onun böyük əhəmiyyətə
malik çoxşaxəli fəaliyyəti geniş tədqiqat mövzusu kimi
işlənməlidir.
Milli
Arxiv İdarəsinin rəisi Ataxan Paşayev və BDU-nun
jurnalistika fakültəsinin dekanı, professor Şamil Vəliyev
mövzu ilə bağlı məruzələr etmişlər.
Qeyd olunmuşdur ki, Ə.Topçubaşov ömrünün
sonunadək xaricdə olan mühacirlərlə birlikdə Azərbaycanın
müstəqilliyi uğrunda mübarizəni davam
etdirmişdir.
Həyatını
yalnız öz xalqının deyil, həm də bütün
Rusiya müsəlmanlarının azadlığı uğrunda
mübarizəyə həsr etmiş Əlimərdan bəy
Topçubaşovun xatirəsi bu gün təkcə Azərbaycan
xalqı tərəfindən deyil, eyni zamanda, bütün
türk xalqları tərəfindən minnətdarlıqla yad
edilir.
Sonra
məruzələr ətrafında çıxışlar
olmuş, müzakirələr aparılmışdır.
Azərbaycan.-2013.- 31 may.- S.8.