Amerikalı siyasi texnoloq Cim Messina: Azərbaycan ABŞ-ın strateji tərəfdaşıdır

Bakıda keçirilən "Gələcəyə baxış" Azərbaycan-ABŞ Forumu çərçivəsində mayın 29-da "ABŞ-ın daxili və xarici siyasəti" mövzusunda xüsusi sessiya olmuşdur.

Moderatoru "Turquoise" Amerika-Avrasiya Şurasının prezidenti Kamal Öksüz olan sessiyada ABŞ seçki qanunvericiliyi, seçki texnologiyaları, prezident seçkiləri kampaniyasının keçirilməsi məsələləri müzakirə edilmişdir.

ABŞ Prezidenti Barak Obama Administrasiyası rəhbərinin operativ məsələlər üzrə keçmiş müavini Cim MESSİNA "Prezidentliyin formalaşması, prezidentin seçilməsi: Amerikanın baş siyasi strateqinin şərhləri" mövzusunda məruzə ilə çıxış etmişdir. C.Messina qeyd etmişdir ki, Azərbaycana və bu regiona ilk dəfə gəlmişdir. Onun sözlərinə görə, Amerika yaxşı başa düşür ki, Cənubi Qafqazda mühüm rol oynayan Azərbaycan ABŞ-ın strateji tərəfdaşdır. O vurğulamışdır ki, bu forum ABŞ ilə Azərbaycan arasında münasibətlərin möhkəmlənməsinə kömək edəcəkdir.

C.Messina ABŞ-da seçki kampaniyası keçirilməsinin xarakteri barədə fikirlərini bölüşərək, Prezident Barak Obamanın seçkiqabağı kampaniyası və seçki texnologiyaları barədə söhbət açmışdır. Onun sözlərinə görə, Amerikada seçki qanunvericiliyi daim yenilənir, bu sahədə islahatlar aparılır.

Prezident kampaniyasının keçirilməsində sosial medianın rolu məsələsinə toxunan C.Messina qeyd etmişdir ki, sosial media bu prosesdə böyük əhəmiyyət kəsb edir. O demişdir: "Sosial media daha çox insanı əhatə etməyə imkan verir. 2012-ci ildə Barak Obamanın seçkiqabağı kampaniyası dövründə biz sosial mediadan istifadə etdik və bunun böyük səmərəsini gördük. Məsələn, biz "Facebook" sosial şəbəkəsində daha çox məlumat yaymağa, Barak Obamanın tərəfdarlarını maraqlandırmağa, seçicilərlə dialoq aparmağa müvəffəq olduq".

C.Messina qeyd etmişdir ki, Prezident Barak Obamanın seçkiqabağı kampaniyası dövründə onunla müxtəlif mövzularda, məsələn, qanunvericilik aktları, dünyada və konkret regionlarda münaqişələr barədə müzakirələr aparılır. Onun sözlərinə görə, Ermənistan-Azərbaycan, Dağlıq Qarabağ münaqişəsi də xüsusi diqqət tələb edən məsələlərdən biridir.

Azərbaycan.-2013.- 30 may.- S.8.