Üçüncü Bakı Beynəlxalq Humanitar Forumunun

iştirakçıları Azərbaycanın bölgələrində olmuşlar

Şəki

Noyabrın 3-də Üçüncü Bakı Beynəlxalq Humanitar Forumu iştirakçılarının bir qrupu Şəkidə olmuşdur. AzərTAc xəbər verir ki, 135 nəfərlik qrup dünyanın bir sıra ölkələrini, beynəlxalq qurumları təmsil edən tanınmış ictimai-siyasi xadimlərdən, elm adamlarından ibarət olmuşdur.

Şəkiyə səfərləri çərçivəsində qonaqlar şəhərin görməli yerlərini gəzmiş, tarixi-memarlıq abidələri ilə tanış olmuşlar.

Azərbaycan memarlığının nadir incilərindən olan Şəki xanlarının sarayı ilə tanışlıq forum iştirakçılarının böyük marağına səbəb olmuşdur. Milli geyimli qızlar sarayın girişində qonaqlara şərbət paylamışlar. Məlumat verilmişdir ki, XVIII əsrə aid dünya əhəmiyyətli nadir tarixi-memarlıq abidəsi olan bu saray Azərbaycanda ilk müstəqil xanlığın əsasını qoyan Hacı Çələbi xanın nəvəsi Hüseyn xan Müştağın dövründə - təqribən 1761-1762-ci illərdə tikilmişdir. Üç yüz kvadratmetr sahəsi olan ikimərtəbəli sarayda 6 otaq, 4 dəhliz və 2 güzgülü eyvan vardır. İnşaat texnologiyasına görə bənzəri olmayan bu sarayın tikintisində mismar və yapışqandan istifadə olunmamışdır.

Qonaqların diqqətinə çatdırılmışdır ki, düz 250 ildir ki, Şəki xanlarının sarayı öz bənzərsiz gözəlliyi ilə dünyanın müxtəlif ölkələrindən gələn qonaqları özünə cəlb edir. Ötən ilin iyulunda sarayın 250 illik yubileyi böyük təntənə ilə qeyd olunmuşdur.

Sarayın həyətindəki 500 ilə yaxın yaşı olan qoşa Xan çinarları forum iştirakçılarında xüsusi maraq oyatmışdır. Qonaqlar sarayın qarşısında xatirə şəkilləri çəkdirmişlər.

Şəkiyə səfərləri çərçivəsində forum iştirakçıları Kiş kəndində yerləşən qədim alban məbədini də ziyarət etmişlər. Məlumat verilmişdir ki, məbəd eramızın birinci əsrində Qafqaz Albaniyasında geniş yayılan Ay məbədinin özülü üzərində inşa edilmişdir. Əhəng daşından tikilən bu abidə erkən orta əsrlərdə yaranan ilk günbəzli, zal tipli məbəddir. Məbədin içərisindəki Yaloylutəpə mədəniyyətinə (eramızdan əvvəl birinci -bizim eranın birinci əsrləri) aid nümunələr, orta Tunc-antik dövrə aid saxsı qablar, Qafqaz Albaniyasının tarixi xəritəsi və digər eksponatlar, həmçinin məbədin həyətindəki ilkin orta əsrlərə aid sərdabələr qonaqların böyük marağına səbəb olmuşdur.

XVIII əsrin sonu-XIX əsrin əvvəllərində inşa edilmiş "Yuxarı Karvansaray" mehmanxana kompleksi ilə tanışlıq zamanı forum iştirakçılarının diqqətinə çatdırılmışdır ki, ümumi sahəsi 6 min kvadratmetr olan bu kompleksdə 300-ə yaxın otaq və zirzəmi vardır. XVIII-XIX əsrlərdə Yaxın və Orta Şərq ölkələrindən gələn tacirlər əsasən bu karvansarayda qalır, ticarətlə məşğul olurdular. Hazırda bu tarixi abidə mehmanxana kompleksi kimi fəaliyyət göstərir.

Şəkiyə səfərləri çərçivəsində qonaqlar XIX əsrə aid tarixi-memarlıq abidəsi Şəki Cümə Məscidini də ziyarət etmişlər.

Üçüncü Bakı Beynəlxalq Humanitar Forumunun iştirakçıları Şəkidən xoş təəssüratlarla ayrılmışlar.

Qəbələ

Üçüncü Bakı Beynəlxalq Humanitar Forumunun iştirakçılarından bir qrupu Qəbələ rayonunda olmuşdur.

AzərTAc xəbər verir ki, Qəbələ Beynəlxalq Hava Limanında yüksək səviyyədə qarşılanan qonaqlara rayonun tarixi, mədəniyyəti, iqtisadiyyatı, kənd təsərrüfatı, əhalinin məşğuliyyəti, son zamanlar Qəbələdə aparılan geniş abadlıq-quruculuq işləri barədə ətraflı məlumat verilmişdir. Qeyd olunmuşdur ki, Qəbələ rayonu irimiqyaslı yerli və beynəlxalq tədbirlərə ev sahibliyi edir. Rayonda sənaye müəssisələri ilə yanaşı, turizm sektorunun inkişafı istiqamətində də mühüm işlər görülür.

Qonaqlar "Gilan piano" MMC-nin "Beltmann" piano fabriki ilə tanış olmuşlar. Burada forum iştirakçılarına məlumat verilmişdir ki, 2009-cu ildən fəaliyyətə başlayan fabrik hazırda dünyada "Beltmann" markalı pianolar istehsal edən yeganə müəssisədir. Fabrikdə ildə 1200-1500 piano istehsal edilir.

Səfər çərçivəsində qonaqlar rayon Tarix-Diyarşünaslıq Muzeyində də olmuşlar. Diqqətə çatdırılmışdır ki, 1980-ci ildən fəaliyyət göstərən bu muzeyin əsas fondunda Qəbələnin 2500 illik tarixini əks etdirən 12 mindən çox tarixi və elmi əhəmiyyətə malik eksponat mühafizə olunur. Arxeoloji, etnoqrafik, numizmatik materiallar, xalq tətbiqi sənəti nümunələri, qədim əlyazma və çap məhsulları diqqəti xüsusilə cəlb edir. Doqquz yüz kvadratmetr ərazisi olan muzeydə 13 ekspozisiya zalı, Heydər Əliyev xatirə guşəsi, şəkil qalereyası, zəngin elmi kitabxana, qədim daş abidələrdən təşkil olunmuş sərgi meydançası vardır.

Sonra forum iştirakçıları Qafqaz Albaniyasının paytaxtı olmuş qədim Qəbələ şəhərinin xarabalıqları ilə tanış edilmişlər. Qonaqlar indiki Çuxur Qəbələ kəndi ərazisində arxeoloji ekspedisiya tərəfindən aşkar edilmiş qədim Qəbələ şəhərinin müdafiə istehkamları, şəhərin su təchizatı, məişət və təsərrüfat tikililəri, müxtəlif maddi-mədəniyyət nümunələri ilə tanış olmuşlar.

Daha sonra qonaqlar "Qəbələnd" İstirahət və Əyləncə Mərkəzi, beşulduzlu "Qafqaz Riverside", "Qafqaz Resort", "Qafqaz Sport", "Qafqaz Karvansaray" otelləri, Nohur gölü və "Yengicə" istisu sanatoriyası ilə tanış olmuşlar. Qəbələ ilə tanışlıq, rayonda aparılan tikinti-quruculuq və abadlıq işləri forum iştirakçılarında zəngin təəssürat yaratmışdır.

Qonaqlar Azərbaycanın dünyada turizm ölkəsi kimi tanınması üçün böyük potensiala malik olduğunu və bu istiqamətdə mühüm işlər görüldüyünü söyləmiş, ölkəmizin sosial-iqtisadi inkişafının, bölgələrdə müasir texnologiyaya əsaslanan infrastrukturun, sürətlə inkişaf edən turizm sektorunun iqtisadiyyatımıza verdiyi töhfələri yüksək qiymətləndirmiş və Qəbələyə səfərdən məmnunluqlarını ifadə etmişlər.

Lerik

Üçüncü Bakı Beynəlxalq Humanitar Forumu iştirakçılarından bir qrupu Lənkəran rayonu ilə tanışlıqdan sonra noyabrın 3-də Lerik rayonuna gəlmişdir.

AzərTAc xəbər verir ki, qonaqları rayonun rəhbər işçiləri yüksək ehtiramla qarşılamışlar.

Beynəlxalq Forumun iştirakçıları Lerik Rayon Tarix-Diyarşünaslıq və "Uzunömürlülər" muzeylərində nümayiş etdirilən eksponatlara və fotoşəkillərə maraqla baxmış, "Relax" turizm və istirahət mərkəzində olmuşlar. Qonaqlar cənub bölgəsinin təbiətinə heyran olduqlarını vurğulayaraq hər iki rayonla tanışlıqdan razı qaldıqlarını bildirmişlər. Həmin gün Üçüncü Bakı Beynəlxalq Humanitar Forumunun iştirakçıları Lənkəran Beynəlxalq Hava Limanından Bakı şəhərinə yola düşmüşlər.

Göygöl

Üçüncü Bakı Beynəlxalq Humanitar Forumunun Gəncəyə səfər edən bir qrup iştirakçısı noyabrın 3-də Göygöl rayonunda olmuşdur.

AzərTAc xəbər verir ki, yüksək qonaqpərvərliklə qarşılanan forum iştirakçıları İkinci Dünya müharibəsindən əvvəl almanlar tərəfindən salınmış küçələrdə inşa olunmuş alman evlərinə baxmış, yerli sakinlərlə söhbət etmişlər.

Rayon icra hakimiyyətinin başçısı Arif Seyidov qonaqlara məlumat vermişdir ki, bir əsrə yaxın yaşı olan bu evlər keçən il əsaslı şəkildə bərpa edilmiş, küçələrdə geniş abadlıq və yenidənqurma işləri aparılmışdır.

Sonra qonaqlar 1857-ci ildə inşa edilmiş Lüteran kilsəsində olmuşlar. Bildirilmişdir ki, alman məbədi olan bu dini məkan da dövlətimizin diqqət və qayğısı sayəsində təmir edilmiş, ona ikinci həyat verilmişdir.

1860-cı ildə Forel qardaşları tərəfindən inşa edilən və hazırda Şərab Zavodu kimi fəaliyyət göstərən müəssisədə istehsal prosesi ilə yaxından tanış olan forum iştirakçıları burada hazır məhsulların dadına baxmışlar.

Göygölə səfər qonaqlarda xoş təəssüratlar yaratmışdır.

Azərbaycan.-2013.- 5 noyabr.- S. 6.