Heydər Əliyev Mərkəzində «Əbədi sevgi» qala-konserti keçirilmişdir

Azərbaycanın birinci xanımı Mehriban Əliyeva konsertdə olmuşdur

Noyabrın 2-də Heydər Əliyev Mərkəzində Rusiya Federasiyasının xalq artisti Dmitri Bertmanın quruluşunda "Əbədi sevgi" qala-konserti Azərbaycan tamaşaçılarına təqdim edilmişdir.

Azərbaycanın birinci xanımı Mehriban Əliyeva və qızları konsertdə olmuşlar.

Heydər Əliyev Mərkəzinin mədəniyyətin inkişafına dəstək, dünya incəsənəti nümunələrinin Azərbaycanda təbliği layihəsi çərçivəsində keçirilən konsertdə ötən əsrin dünyada ən məşhur və sevilən romantik mahnıları səslənmişdir.

Heydər Əliyev Mərkəzində "Kuin" qrupunun "I was born to love you", Endi Uilyamsın "Moon river", Selin Dionun "My heart will go on", Elvis Preslinin "Love me tender", Uitni Hyustonun "I will always love you", Demis Russosun "Souveniers", Merilin Monronun "I Wanna Be Loved By You", Elton Conun "I Believe In Love", "Bitlz" qrupunun "All you need is love" kimi ürəkləri fəth etmiş mahnılar rusiyalı artistlərin ifasında təqdim olunmuşdur.

Heydər Əliyev Mərkəzində keçirilən konsert rəngarəng səhnə tərtibatı, bir-birindən gözəl nəğmələrin maraqlı təqdimatları ilə yadda qalmışdır.

Konsertdən sonra səhnəyə çıxan Rusiya Federasiyasının xalq artisti Dmitri Bertman bildirmişdir ki, onların teatrı Azərbaycanda artıq dəfələrlə olmuşdur. Azərbaycana pərəstiş etdiklərini bildirən görkəmli rejissor hər dəfə bu ölkəyə gələndə gördükləri dəyişikliklərdən heyran qaldıqlarını demişdir. Nadir memarlıq abidəsi olan Heydər Əliyev Mərkəzi, dənizin sahili, şəhərdə baş verən yeniliklər insanı məftun edir. Azərbaycanda mədəniyyətə, gözəlliyə, estetikaya böyük diqqət yetirilir ki, bütün bunlar dünyanı xilas edəcəkdir.

Ölkəmizə gəlməklərindən çox şad olduqlarını bildirən Dmitri Bertman Azərbaycanın birinci xanımı Mehriban Əliyevaya dərin təşəkkürünü bildirmiş, onun həyata keçirdiyi missiyanı yüksək qiymətləndirmiş və buna dərin hörmət bəslədiklərini vurğulamışdır. O demişdir ki, bu missiya dünya tarixinə daxil olacaqdır.

AzərTAc

Azərbaycan.-2013.- 3 noyabr.- S.3.