Beynəlxalq incəsənət sərgisi

Çexiyanın Lidise şəhərində keçirilən 41-ci Beynəlxalq Uşaq İncəsənət Sərgisində Azərbaycanın balaca rəssamları da iştirak ediblər. Bəllidir ki, İkinci Dünya müharibəsi zamanı Lidise kəndində alman faşistləri tərəfindən kütləvi surətdə uşaqlar qətlə yetirilib. Həmin uşaqların xatirəsini yad etmək üçün uzun illərdir ki, bu şəhərdə sərgi keçirilir. Əvvəllər, sadəcə, Çexiya üçün nəzərdə tutulan bu tədbir 1973-cü ildən başlayaraq beynəlxalq xarakter alıb.

İndi böyük beynəlxalq incəsənət sərgisinə çevrilmiş bu tədbirdə dünyanın əksər ölkələri öz balaca rəssamlarının əsərləri ilə iştirak edirlər. 2001-ci ildən Çexiya Mədəniyyət, Xarici işlər, Təhsil, Gənclər və İdman nazirliklərinin UNESCO üzrə Çexiya komissiyasının himayəsi altında gerçəkləşən builki sərgiyə 68 ölkədən 24 min 593 əsər göndərilib. Azərbaycandan sərgiyə iş göndərmiş 45 iştirakçıdan 5-i mükafatlandırılıb. Abşeron rayonu Saray qəsəbə uşaq incəsənət məktəbinin şagirdi Rəna Abdullayeva (10 yaş) sərginin ən yüksək mükafatı - "Lidise qızılgülü" medalına layiq görülüb. Rəhman Əliyev (13 yaş, Quba), Nigar Müslümova (13 yaş, Rusiya Mədəniyyət Mərkəzi), Elvina Nəbiyeva (15 yaş, Bakı), Adil Baxşəliyev (11 yaş, Bakı) fəxri fərmanlarla təltif olunublar.

Azərbaycan.-2013.- 15 noyabr.- S.7.