Virtual Mərkəzləşdirilmiş Elektron Kitabxana

Sisteminin təqdimatı keçirilmişdir

Noyabrın 28-də Muzey Mərkəzində Mədəniyyət və Turizm Nazirliyinin sifarişi ilə "Ultra" şirkəti tərəfindən hazırlanmış Virtual Mərkəzləşdirilmiş Elektron Kitabxana Sisteminin (ALİSA) təqdimatı keçirilmişdir.

Tədbirə Azərbaycanda kitabxana sistemlərinin inkişafından bəhs edən filmin təqdimatı ilə başlanılmışdır.

Təqdimat mərasimində mədəniyyət və turizm naziri Əbülfəs Qarayev çıxış edərək Azərbaycanda kitabxanaların müasirləşdirilməsi istiqamətində görülən işlərdən, həyata keçirilən layihələrdən söz açmışdır.

Bildirilmişdir ki, Azərbaycan Respublikası Prezidentinin "Azərbaycanda kitabxanaların fəaliyyətinin yaxşılaşdırılması haqqında" 2007-ci il 20 aprel tarixli sərəncamına və dövlət başçısının 2008-ci il 6 oktyabr tarixli sərəncamı ilə təsdiq edilmiş "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"na uyğun olaraq kitabxanaların maddi-texniki təminatı, informasiya texnologiyalarının tətbiqi vəziyyəti yaxşılaşdırılmışdır. Hazırda kitabxanalarda elektron kataloq, elektron kitabxana, habelə veb-saytların yaradılması işi həyata keçirilir. Bu gün təqdimatı keçirilən ALİSA sistemi məhz bu istiqamətdə görülən işlərin bariz göstəricilərindədir.

Vurğulanmışdır ki, Vahid Mərkəzləşdirilmiş Kitabxana Sistemi şərti olaraq iki hissədən - ictimaiyyətə açıq olan vahid mərkəzləşdirilmiş Kitabxana portalından və inzibati, daxili istifadə üçün nəzərdə tutulan proqram təminatından ibarətdir.

Nazir demişdir ki, bu sistem pilot layihə çərçivəsində artıq Bakı şəhərinin Xətai, Nərimanov və Səbail rayonlarının mərkəzləşdirilmiş kitabxana sistemlərində tətbiq olunmağa başlanmışdır.

Ə.Qarayev demişdir ki, bu gün müasir texnologiyalar hər gün yenilənir. Biz gərək bu istiqamətdə işimizi elə quraq ki, inkişaf etmiş ölkələr sırasından geri qalmayaq, onlarla ayaqlaşa bilək. Bu baxımdan inanıram ki, təqdimatına toplaşdığımız ALİSA sistemi milli kitabxanalarımızın dünya kitabxana sisteminə inteqrasiyasına öz dəyərli töhfəsini verəcəkdir.

Tədbirdə Mirzə Fətəli Axundzadə adına Azərbaycan Milli Kitabxanasının direktoru Kərim Tahirov və rabitə və informasiya texnologiyaları nazirinin müavini Elmir Vəlizadə yeni sistemin tətbiqini yüksək qiymətləndirmişlər.

Sonra "Ultra" şirkəti idarə heyətinin üzvi Tahir Mirkişili və şirkətin digər əməkdaşları yeni sistemin özəllikləri ilə bağlı geniş məlumat vermişlər.

Bildirilmişdir ki, sistemin bütün elementləri müasir Oracle platforması üzərində hazırlanmışdır. İstifadəçi üçün asan interfeysə malik ALİSA sisteminin tətbiqi zamanı şirkətin əməkdaşları kitabxanalarla sıx əməkdaşlıq etmişlər. Sistemin hazırlanma prosesində dünyanın ən qabaqcıl kitabxana sistemlərinin təcrübəsindən yararlanmaqla yanaşı, xüsusi kitabxana işi üzrə mütəxəssis komanda ilə işlənilmişdir. ALİSA ən son texnologiyaların tətbiqi ilə işlənmiş veb əsaslı sistemdir.

Diqqətə çatdırılmışdır ki, sistem komplektləşdirmə, kataloqlaşdırma, oxucu bazası, elektron kataloq, idarəetmə, ətraflı axtarış, onlayn əməliyyatlar, rezervasiya və digər modullardan ibarətdir.

ALİSA kompleks layihə kimi Azərbaycanın kitabxana sistemini inkişaf etdirmək üçün nəzarət mexanizmini həyat keçirir, kitabxana daxili prosesləri və kitabxana-oxucu münasibətlərini tam avtomatlaşdırır və bu proses üçün lazımi mühitin yaradılmasına təkan verir. Sistemin onlayn rejimdə çalışması, buraya dünyanın istənilən nöqtəsindən daxil olmaq imkanı yardır. Sistemdə kitabxananın bütün fəaliyyəti nəzərə alınmışdır. Buraya kataloq düzəltmə, komplektləşdirmə, kitab sifarişi, kitabların verilməsi, oxucuların qeydiyyatı və əməkdaşlar haqqında məlumatlar aiddir. Sistem həmçinin nadir axtarış sistemi və müxtəlif çeşidli hesabatlara malikdir. Yeni sistemdən istifadə etməklə kitabxana rəhbərliyi oradakı proseslərə dair istənilən hesabatı görə, Mədəniyyət və Turizm Nazirliyi isə bütün kitabxanalara nəzarət etməklə yanaşı, istənilən hesabatı əldə edə biləcəkdir.

Vurğulanmışdır ki, layihə çərçivəsində xüsusi portal yaradılmış və burada ölkənin bütün kitabxanalarının saytları yer almışdır.

ALİSA sisteminin vasitəsilə 50 saniyəyə əldə olunan ilk oxucu bileti - plastik kart mədəniyyət və turizm naziri Əblüfəs Qarayevə təqdim edilmişdir.

Azərbaycan.-2013.- 29 noyabr.- S.8.