Nyu-Yorkda İslam Əməkdaşlıq Təşkilatına üzv

dövlətlərin xarici işlər nazirlərinin illik

əlaqələndirmə iclası keçirilmişdir

Azərbaycanın xarici işlər naziri Elmar Məmmədyarov Nyu-Yorka səfəri çərçivəsində İslam Əməkdaşlıq Təşkilatına (İƏT) üzv dövlətlərin xarici işlər nazirlərinin illik əlaqələndirmə iclasında iştirak etmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, E.Məmmədyarov iclasda çıxış edərək Azərbaycanın İƏT-in Nizamnaməsinə sadiq qaldığını və təşkilatın 10 illik fəaliyyət planını dəstəklədiyini söyləmişdir. E.Məmmədyarov Azərbaycanın keçən il təşkilatın büdcəsinə üç milyon dollar məbləğində könüllü yardım etdiyini və bu il xarici işlər nazirlərinin müqəddəs Qüds şəhərinə dəstək məqsədilə şəhərin inkişaf etdirilməsi üçün Strateji Sektor Planının maliyyələşdirilməsinə dair donor və Fələstin Dövlətinə yardım məqsədilə İslam Maliyyə Təhlükəsizlik Şəbəkəsinin təsis konfranslarının Bakıda keçirildiyini xatırlatmışdır. E.Məmmədyarov 2013-cü ilin oktyabrında BMT Təhlükəsizlik Şurasına sədrliyi dövründə rəsmi Bakının BMT ilə İƏT arasında tərəfdaşlığın gücləndirilməsi məqsədilə yüksək səviyyəli görüş təşkil etmək niyyətində olduğunu demiş, Suriyada baş verən hadisələrə münasibətdə də Azərbaycanın narahatlığını diqqətə çatdırmışdır.

E.Məmmədyarov Ermənistanın hərbi gücdən istifadə edərək Azərbaycan torpaqlarının bir hissəsini işğal altında saxladığını və bir milyondan artıq azərbaycanlı qaçqın və məcburi köçkünün öz yurd-yuvalarına geri dönmək hüququndan məhrum etdiyini bildirmişdir.

Azərbaycanın işğal olunmuş ərazilərində tarixi, mədəni və dini abidələrin məhv edildiyini deyən nazir təəssüflə demişdir ki, müharibə cinayətləri və insanlıq əleyhinə cinayət törədən, Azərbaycan xalqına qarşı soyqırımı əməllərinə görə məsuliyyət daşıyan şəxslər Ermənistan tərəfindən cəmiyyətdə qəhrəmanlaşdırılır.

E.Məmmədyarov Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsipləri, xüsusilə də BMT Təhlükəsizlik Şurasının və İƏT-in qətnamələri əsasında həllinin vacibliyini vurğulamış, Azərbaycanın ərazi bütövlüyünə davamlı dəstək göstərdiklərinə və Ermənistanın təcavüzkar siyasətini qətiyyətlə pislədiklərinə görə üzv dövlətlərə təşəkkür etmişdir.

"İslamofobiya" meyillərinin güclənməsinə münasibətdə Azərbaycanın narahatlığını ifadə edən E.Məmmədyarov rəsmi Bakının dini zəmində nifrətin aradan qaldırılması, dinlər və mədəniyyətlərarası dialoqun gücləndirilməsi istiqamətində səylərini bundan sonra da davam etdirəcəyini diqqətə çatdırmışdır.

Azərbaycan.-2013.- 1 oktyabr.- S.5.