Qolf Federasiyası Azərbaycan idmanına öz töhfəsini verəcək

Oktyabrın 2-də Azərbaycan Qolf Federasiyasının (AQF) və Qolf Akademiyasının (QA) inzibati binasının açılış mərasimi keçirilib. Mərasimdə Milli Məclisin deputatları, Olimpiya çempionları və idman ictimaiyyətinin nümayəndələri iştirak ediblər.

Açılış mərasimində çıxış edən gənclər və idman naziri Azad Rəhimov bildirib ki, AQF-nin yaradılması, gənclərin bu növə cəlb olunması və bu sahədə idmançıların yetişdirilməsi böyük nailiyyətdir. Ümid edirik ki, 2016-cı ildə Olimpiya Oyunlarında bu növdə də ölkəmizi təmsil edən idmançımız olacaq.

Azərbaycan Qolf Federasiyasının prezidenti Anar Məmmədov çıxış edərək federasiyanın missiyası və hədəfləri barədə danışıb. Qeyd edib ki, binanın tikintisinə 2012-ci ilin aprelindən başlanıb və ümumi sahəsi 2400 kvadratmetrdir. Binanın tikintisi zamanı Avropanın aparıcı qolf akademiyalarının təcrübələrindən istifadə olunub. Binada yeraltı parkinq, soyunma otaqları, duş, iki qolf simulyator otağı və kafe fəaliyyət göstərir. Azərbaycan Qolf Federasiyası da qeyd olunan binada yerləşir. Akademiyanın ərazisində həmçinin "Championship 8 hole mini golf" konsepsiyasında dizayn edilmiş və son nəsil sintetik ot örtüyündən ibarət qolf meydançası yerləşir. Meydançada PGA (Professional Golf Association) dərəcəli instruktorlar qolfla maraqlananlara qolf təlimləri keçir. Bundan başqa akademiyanın meydançası qolf oynamaq istəyənlər üçün də açıqdır. Meydançanın ümumi sahəsi 14 min kvadratmetrdir ki, onun da 6700 kvadratmetri Hollandiya istehsalı olan sintetik otla örtülüb. Ümumilikdə kompleksin dizaynını Hollandiyanın dünyaca məşhur "European Golf Group" şirkəti hazırlayıb.

A.Məmmədov qeyd edib ki, bütün bunlar Azərbaycanda idmanın kütləviliyinin artırılması istiqamətində həyata keçirilən köklü islahatların real nəticələridir. Regionlarda idmanla məşğul olanların sayının sürətlə artması müşahidə olunur. İndi bölgələrdə müasir idman infrastrukturu yaradılır, yenilərinin təməli qoyulur. Azərbaycanda idmanın bütün növlərinin ikişafı diqqət mərkəzindədir. Qubada Milli Qolf Klubunun yaradılması bunun əyani təsdiqidir. Milli Qolf Akademiyası isə peşəkar qolfçuların və həvəskarların hazırlanması üzrə aparıcı mərkəz olacaq.

Sonda federasiyanın inzibati binasına baxış olub.

Elçin CƏFƏROV,

Azərbaycan.-2013.- 3 oktyabr.- S. 7.