Karnegi Fondunda «Azərbaycanın gələcəyinə

baxaraq» mövzusunda «dəyirmi masa» keçirilmişdir

Oktyabrın 11-də Vaşinqtondakı Karnegi Fondunda "Azərbaycanın gələcəyinə baxaraq" mövzusunda "dəyirmi masa" keçirilmişdir. Tədbirdə Azərbaycanda keçirilmiş prezident seçkiləri, ölkənin son onillikdəki inkişafı və qarşıdakı beş il üçün proqnozlar müzakirə edilmişdir.

Karnegi Fondunun Avrasiya və Rusiya üzrə proqramları direktoru və baş elmi işçisi Ceyms Kollinzin sədrliyi ilə keçilmiş "dəyirmi masa"da Karnegi Fondunun Avrasiya və Rusiya üzrə proqramlarının baş elmi işçisi Tomas de Vaal, Corctaun Universitetinin Avrasiya, Rusiya və Şərqi Avropa Araşdırmaları Mərkəzinin baş elmi işçisi Brenda Şaffer və Beynəlxalq Strateji Araşdırmalar Mərkəzinin enerji və milli təhlükəsizlik proqramlarının baş elmi işçisi Edvard Çou çıxış etmişlər.

Tomas de Vaal iqtisadiyyatın inkişafından, Azərbaycanda siyasi həyatın problemlərindən və perspektivlərindən danışmışdır. Prezident seçkilərindən danışan natiq qeyd etmişdir ki, Azərbaycanın hazırkı Prezidenti İlham Əliyev son onillikdə ölkədə iqtisadi inkişaf göstəriciləri sayəsində istənilən halda seçkilərdə qalib gələrdi. Tomas de Vaal demişdir ki, sonuncu dəfə o, Azərbaycanda olanda ölkənin ümumi milli məhsulu üç milyard dollar təşkil edirdi, hazırda isə bu rəqəm 70 milyard dollardır.

Tomas de Vaalın sözlərinə görə, bəzi təşkilatların bəyanatlarında ifadə olunmuş müəyyən problemlərə baxmayaraq, o, Azərbaycanda demokratikləşməyə və gələcək inkişafa optimist baxır.

Doktor Brenda Şaffer çıxışında oktyabrın 9-da keçirilmiş prezident seçkilərini, eləcə də ABŞ Dövlət Departamentinin, AŞ PA-nın, ATƏT-in pozitiv və neqativ bəyanatlarını müzakirə etmişdir. Corctaun Universitetinin professoru vurğulamışdır ki, Dövlət Departamentinin bəyanat verməsi faktı, həqiqətən, yaxşı əlamətdir. Birincisi, ona görə ki, ABŞ Azərbaycana həssaslıqla yanaşır, ikincisi, bu, özlüyündə maraqlanan tərəflərin hamısı üçün informasiyanın tamamilə əlyetərli olduğu Azərbaycanda açıq cəmiyyətin mövcudluğu faktıdır. Brenda Şaffer demişdir ki, bu yaxınlarda İranda H.Ruhaninin Prezident seçildiyi, eləcə də heç bir beynəlxalq müşahidəçilər missiyasının və müvafiq seçki prosesinin olmadığı prezident seçkilərində beynəlxalq təşkilatlar və ya hökumətlər tərəfindən hər hansı bəyanatın verilməsi üçün şərait yaradılmamışdır. Ona görə də Azərbaycandakı demokratik seçki prosesi özlüyündə ABŞ və Avropa üçün maraq kəsb edir. Biz son 24 saatda bir çox bəyanatların şahidi olmuşuq.

Doktor Brenda Şaffer auditoriyaya müraciət edərək bildirmişdir ki, o, KİV-lərin hər hansı tənqidi ilə razılaşmır. Məsələn, Rüstəm İbrahimbəyovun ikili vətəndaşlığı varsa və o, Azərbaycanda yaşamırsa, onun prezidentliyə namizədliyini necə qeydiyyata almaq olardı? Doktor B.Şaffer Almaniyada doğulmuş və Amerika Konstitusiyasına görə ABŞ Prezidenti seçilmək hüququ olmayan məşhur amerikalı siyasətçi Henri Kissinceri nümunə gətirərək vurğulamışdır ki, qanun istər ABŞ-da, istərsə də Azərbaycanda ali olmalı və ona riayət edilməlidir.

Tədbirdə çıxış edən Edvard Çou son on ildə Azərbaycanda baş vermiş iqtisadi artımdan və dramatik dəyişikliklərdən söz açmışdır. Beynəlxalq Strateji Araşdırmalar Mərkəzinin təmsilçisi demişdir ki, baxmayaraq Bakı və rayonların inkişafındakı fərqlər göz qabağındadır, resursların bölüşdürülməsi ilə bağlı analoji vəziyyəti, məsələn, Kaliforniya və Luiziana regionlarını müqayisə etməklə, ABŞ-da da görmək olar.

Sonra Edvard Çou Azərbaycanın hazırkı enerji layihələrindən, o cümlədən "Cənub dəhlizi" layihəsindən bəhs etmiş, Azərbaycanın təşəbbüsü ilə həyata keçirilən layihələrin hesabına ölkənin və geniş regionun inkişaf perspektivlərindən danışmışdır.

Çıxışlardan sonra panel iştirakçılarına suallar verilmişdir. Erməni diasporu təmsilçilərinin təxribat xarakterli bəyanatlarına baxmayaraq, Azərbaycanın ABŞ-dakı səfirliyinin nümayəndələri Azərbaycanı tənqid edənlərin əsassız iddialarına layiqli cavab vermişlər. Səfirliyin nümayəndələri Azərbaycanda prezident seçkilərinin şəffaflığı və tam legitimliyi ilə bağlı bəyanat vermişlər. Seçkilərin nəticələri xalqın iradəsini nümayiş etdirmişdir. ABŞ Dövlət Departamenti və bəzi müşahidəçilər diqqəti yalnız əhəmiyyətsiz hadisələrə cəlb etməməli, Azərbaycanda demokratik inkişafın geniş mənzərəsinə baxmalıdırlar.

Tədbirdə Vaşinqtonun akademik dairələrinin, elmi-tədqiqat mərkəzlərinin, şəhərin azərbaycanlı icmasının nümayəndələri, tələbələr iştirak etmişlər.

Yusif BABANLI,

AzərTAc-ın xüsusi müxbiri

Vaşinqton

Azərbaycan.- 2013.- 13 oktyabr.- S.5.