«Şahdəniz» Xəzərdə
tək deyil...
Burada
getdikcə yeni qaz
yataqları kəşf olunur
Dünyada dəniz neftinin
erası Azərbaycandan başlanıb. 64 il
əvvəl Xəzərin "Qara daşlar" ərazisində ilk
quyunun fontan vurması
ilə "Möcüzələr adası"nda əfsanəvi
dəniz şəhərinin əsası qoyulub.
Sonralar bu yataq "Neft
Daşları" adlandırılıb və burada
polad dirəklər üstündə
salınan şəhərə də Neft
Daşları adı verilib.
Daha sonra
dənizdə bir çox
digər yataqlar kəşf olunub. "Günəşli", "Bahar" və başqaları bir
neçə onillikdir istismar
olunsalar da, onların karbohidrogen ehtiyatları hələ tükənməyib.
Son 20 ildə "Əsrin müqaviləsi"
adlanan saziş çərçivəsində
işlənən "Azəri", "Çıraq",
"Dərinsulu Günəşli" yataqları dünyaya səs salıb. Bu,
ümummilli lider Heydər
Əliyevin yeni neft
strategiyasının və Azərbaycanın neft
sənayesinin zəngin təcrübəsinin bəhrəsidir. Ulu öndər demişdir
ki, əgər "Neft
Daşları" olmasaydı, nə "Azəri"
olardı, nə "Çıraq", nə də
Bakı-Tbilisi-Ceyhan
"Əsrin
müqaviləsi", öz növbəsində,
Xəzərin Azərbaycan sektorunda yeni-yeni karbohidrogen
yataqlarının kəşfinə və işlənməsinə
yol açdı. Böyük
perspektivlərə malik olan
"Şahdəniz" qaz-kondensat
yatağı hazırda dünyanın dəniz
akvatoriyasında işlənən ən böyük
yataqlardan biridir. 80 ölkədə
çalışan, "Şahdəniz"in əməliyyatçısı
olan BP şirkətinin "portfel"ində
isə bu, ən böyük
layihədir.
"Şahdəniz"
yatağının sübut olunmuş ehtiyatları 1,2 trilyon
kubmetr qaz və 240 milyon tondan çox
kondensat həcmində qiymətləndirilir.
Yatağın
işlənməsinin birinci mərhələsi
çərçivəsində artıq 7 ildir
qaz və kondensat hasil edilir. Buradan
çıxarılan mavi yanacaq
ahəngdarlıqla Azərbaycandakı, Gürcüstandakı
və Türkiyədəki istehlakçılara
çatdırılır. 2018-ci ildə ikinci
mərhələnin qazının alınacağı gözlənilir.
İndi bütün
dünya Azərbaycanı təkcə neft diyarı kimi deyil, həm də qaz ixrac edən ölkə kimi
tanıyır. Mavi yanacağın
hasilatı artdıqca onu dünya
bazarlarına nəql edən yollar da şaxələnir. Buna
ixracın diversifikasiyası deyirlər. Yaxın
gələcəkdə Azərbaycan qazı Türkiyənin ərazisindən
TANAP (Transanadolu Qaz Boru Kəməri) vasitəsilə TAP-a (Transadriatik Qaz Boru Kəmərinə)
axıdılacaq və oradan Avropanın
müxtəlif ölkələrindəki, məsələn,
İtaliyadakı, Yunanıstandakı, Bolqarıstandakı və
s. istehlakçılara
çatdırılacaq.
Sevindirici haldır ki,
"Şahdəniz" Xəzərdə tək deyil. Əvvəl kəşf olunmuş
və hələ də məhsul verən yataqlar
öz yerində, son
illərdə onların siyahısına neçə-neçə
yeniləri də qoşulub.
"Ümid" qaz-kondensat
yatağını ARDNŞ xarici şirkətlərin
köməyi olmadan özü
sərbəst şəkildə kəşf edib
və işləyib. İndi bu yataqdan karbohidrogenlər
alınır. "Ümid"in çıxarıla bilən ehtiyatları
200 milyard kubmetr qaz və 40 milyon ton kondensat həcmində
qiymətləndirilir.
"Abşeron"u isə
ARDNŞ Fransanın "Total" və GdT şirkətləri ilə birgə işlədir.
Bu struktur Cənubi Xəzər
neftli-qazlı hövzəsinin Abşeron
arxipelaqında, Bakıdan 85-100 kilometr
şərqdə yerləşir. Azərbaycan geofizikləri
"Abşeron"u
1960-cı ildə aşkar etmişdilər.
Lakin onun
qarşısında bir sıra çətinliklər
olmuşdu. Nəhayət,
2009-cu ilin fevral
ayında ARDNŞ ilə "Total"
arasında imzalanan sazişə əsasən,
2010-cu ilin yanvarında orada
layihə dərinliyi 7.200 metr olan quyunun
qazılmasına başlandı. Həmin ilin
sentyabr ayında isə 6.558 metr dərinlikdə Fasilə lay
dəstəsi açıldı. Quyuda
aparılmış geoloji tədqiqat
işlərinin nəticəsi müsbət qiymətləndirildi.
İlkin hesablamalara əsasən,
mütəxəssislər "Abşeron"
yatağında 350 milyard kubmetr
qaz və 45 milyon ton kondensat həcmində
ehtiyatların olduğunu söylədilər.
"Şəfəq-Asiman"
perspektiv strukturuna da böyük ümidlər
bəslənilir. Məlum olduğu kimi, bu strukturun
birgə geoloji-kəşfiyyatı və işlənməsi
haqqında Hasilatın Pay Bölgüsü
Sazişi (HPBS) 2010-cu ilin
oktyabrında Bakıda imzalanıb. HPBS-nin
müddəti 30 ildir. Bu
sazişə əsasən, BP şirkəti əməliyyatçı
olmaqla yanaşı, müqavilədə
50 faiz paya malikdir. Qalan 50 faiz isə ARDNŞ-ə məxsusdur.
"Şəfəq-Asiman"
bloku Bakıdan təxminən 125 kilometr (78 mil) cənub-şərqdə
yerləşir və 1.100 kvadratkilometrə yaxın ərazini əhatə
edir. Bu dəniz blokunda indiyədək heç
bir geoloji-kəşfiyyat işi
aparılmamışdı. Blok dənizin
dərinsulu hissəsində yerləşir. Burada
suyun dərinliyi təxminən 650-800 metr, kollektorun dərinliyi
isə 7.000 metrdir.
Xatırladaq ki, Azərbaycan Respublikasının Milli Məclisi "Şəfəq-Asiman" perspektiv strukturunun birgə
geoloji kəşfiyyatı və işlənməsi
haqqında BP ilə ARDNŞ arasında imzalanmış HPBS-ni 2011-ci ilin may ayında ratifikasiya edib.
"Şəfəq-Asiman"da
"Gilavar" seysmik
gəmisi vasitəsilə üçölçülü
seysmik tədqiqatlar aparılıb. Proqram keçən ilin əvvəlində
başa çatıb. BP Azərbaycan
şirkətindən aldığımız məlumatda bildirilir ki, həmin vaxtdan bəri məlumatların təhlili
aparılır.
Bu, sözügedən
müqavilə ərazisində indiyədək aparılan ilk üçölçülü
seysmik tədqiqatdır. Məlumatların
təhlili isə bugünədək Azərbaycanda
aparılmış ən böyük üçölçülü seysmik məlumat təhlilidir. Bu
işlərdən sonra məlumatların
interpretasiyası üçün il yarım və kəşfiyyat quyusunun qazılmasının
planlaşdırılması üçün
daha bir il vaxt tələb olunur.
"Şəfəq-Asiman"ın
töhfəsi nə olacaq? Bu
strukturdan daha çox neft, yoxsa qaz və kondensat əldə ediləcək? Ümumiyyətlə,
onun ehtiyatları nə qədərdir? Bu suallara alınan məlumatların
nəticəsi cavab verəcək. Hər halda "Şəfəq-Asiman"a bəslənən
ümidlər Xəzərdə zəngin
yataqlarımızın hələ çox
olduğundan xəbər verir.
Flora SADIQLI
Azərbaycan. - 2013.-
6 sentyabr.- S. 11.