Milli mənafeni təmin edən, xalqın cari və strateji maraqlarına xidmət edən siyasi xətt dönmədən davam etdirilməlidir

Müstəqil Azərbaycan Respublikası özünün qısa, lakin şərəfli tarixinin mühüm bir dövrünə qədəm qoyur. Ölkəmizdə əldə olunmuş möhtəşəm nailiyyətləri davam etdirmək, sosial-siyasi və iqtisadi inkişafın daha yüksək səviyyəsinə ucalmaq baxımından ciddi vəzifələrin qarşıda durduğu hazırkı mərhələdə yeni seçiləcək prezidentin şəxsiyyətindən, onun böyük quruculuq işlərini qətiyyətlə davam etdirmək bacarığından çox şey asılıdır. Belə şəraitdə hər bir Azərbaycan vətəndaşının, xüsusən onun ziyalı təbəqəsinin üzərinə böyük məsuliyyət düşür.

Həqiqi ziyalı mövqeyi kimi səciyyələndirilən mövqe, əslində istənilən partiya mənafelərindən və korporativ maraqlardan kənarda dayanaraq milli mənafelərin və dövlətçilik maraqlarının önə çəkilməsi deməkdir. Bu isə başlıca ideya kimi milli birlik və həmrəyliyin möhkəmləndirilməsini, ictimai-siyasi sabitliyin qorunmasını və Vətənin bütün sahələrdə davamlı inkişafının təmin edilməsini ehtiva edir.

Hazırda dövlətin siyasi kursunun ziyalı təbəqəsinin böyük əksəriyyəti tərəfindən dəstəklənməsi bu kursun ölkəmizin cari və strateji maraqlarına cavab verməsi ilə şərtlənmişdir. Bu gün biz hansısa milli ideya axtarışına çıxmamalıyıq. Tarixi şəraitin özü, xalqımızın uzaq və yaxın keçmişdə üzləşdiyi ciddi problemlər və məruz qaldığı çətin sınaqlar bu ideyanı müəyyənləşdirir. Bu isə dövlətimizin müstəqilliyini möhkəmləndirməkdən, itirilmiş torpaqlarımızı geri qaytarmaqdan, qaçqın və məcburi köçkünlərin, eləcə də bütün vətəndaşlarımızın normal həyat şəraitini təmin etməkdən, sosial-iqtisadi inkişafı sürətləndirərək Azərbaycanı sivil dünyanın ayrılmaz hissəsinə çevirməkdən ibarətdir.

Əlbəttə, demokratik və plüralist cəmiyyətdə, çoxpartiyalılıq şəraitində siyasi mübarizə, siyasi maraqların toqquşması, ideoloji və taktiki fikir ayrılıqları təbii bir haldır. Lakin ümummilli ideya baxımından ən mühüm məsələ siyasi ehtirasların cəmiyyəti parçalamasına imkan verməməkdən, mübarizə və müzakirələrin konstruktiv məcrada aparılmasına nail olmaqdan ibarətdir.

Son illərdə ölkəmiz bir çox tarixi uğurlara imza atmışdır. Onların ən böyüyü, heç şübhəsiz, nəhəng səylər bahasına əldə olunmuş siyasi sabitlikdir. Bəşəriyyətin tarixi belə bir mühüm həqiqəti ortaya qoymuşdur: müdrik dövlət xadimi o kəsdir ki, cəmiyyətdəki sabitliyi qorumaqla, onun xaos və hərc-mərclik girdabına yuvarlanmasına imkan vermədən müxtəlif islahatlar aparmağı bacarır. Ölkəmizdə son illərdə məhz belə bir müdriklik və qətiyyət nümayiş etdirilmişdir. Hesab edirəm ki, bu sabitliyi qorumaq, əslində, hər bir vətəndaşın borcudur. Təbii ki, bu sahədə ziyalıların üzərinə daha böyük məsuliyyət düşür. Odur ki, mövcud ictimai-siyasi sabitliyi hər vəchlə qorumağı, sabitliyin pozulmasına səbəb ola biləcək bütün cəhdlərə qarşı qətiyyətlə mübarizə aparmağı birinci dərəcəli vəzifə kimi qarşımıza qoymalıyıq.

Bu gün Azərbaycan ictimaiyyətini düşündürən məsələlər içərisində ikisi xüsusi əhəmiyyətə malikdir. Bunlardan biri Qarabağ problemi, digəri isə sosial-iqtisadi məsələlərdir. Tam əminliklə demək olar ki, Dağlıq Qarabağ probleminin sülh yolu ilə həllinə yönəlmiş xətt mövcud reallıqlar baxımından tamamilə düzgün xətdir və müsbət nəticələr verənədək davam etdirilməlidir. Eyni zamanda, atəşkəs və sülh danışıqları arxayınlıq doğurmayıb, milli ordumuzun döyüş qabiliyyətinin artırılması istiqamətində fəaliyyət daim gücləndirilir. Necə deyərlər, "sülh istəyirsənsə, müharibəyə hazırlaş".

İqtisadi məsələlərə gəldikdə isə populist çıxışlara rəğmən, dünyadakı qloballaşma prosesləri, ümumdünya maliyyə problemləri və ölkədəki formasiyaya səciyyəli dəyişikliklər baxımından yanaşılarsa, Azərbaycanda olduqca peşəkar iqtisadi siyasət aparılır. Etiraf etmək lazımdır ki, bu gün bazar iqtisadiyyatına, özəl sektorun inkişafına alternativ yoxdur. Bu isə istənilən ölkədə bir sıra çətinliklərlə müşayiət olunur. Həmin çətinlikləri yüngülləşdirməyin yeganə yolu səmərəli sosial siyasət xəttinin gerçəkləşdirilməsi, qaçqın və məcburi köçkünlərin, şəhid ailələrinin, müharibə əlilləri və veteranlarının, təqaüdçülərin və digər aztəminatlı təbəqələrin sosial müdafiəsi sahəsində fəal tədbirlərin həyata keçirilməsidir. Bu siyasətin Azərbaycanda ardıcıl həyata keçirilməsinin şahidiyik. Elm, mədəniyyət, təhsil və səhiyyə sahələri də daim dövlətin qayğısını hiss edir. Sosial ədalətə yönəlmiş hüquqi mexanizmlərin işlənməsi isə ölkəmizdə artıq azad vətəndaş cəmiyyətinin qurulması üçün etibarlı bünövrə rolunu oynayıb ki, bu da dövlətimiz üçün strateji bir vəzifədir.

Biz tariximizin bütün anlarını yadda saxlamalıyıq. Unutmayaq ki, xalqımızın azadlıq və milli istiqlal uğrunda mübarizə tarixi şanlı və şərəfli olduğu qədər də faciəli olub. Faciəli olub ona görə ki, zaman-zaman tarixi şəraitin diktəsi və xalqın azadlıq ruhunun hökmü ilə milli haqlarımız uğrunda gedən mücadilələr son nəticədə məğlubiyyətə uğramış, ata-babalarımızın müstəqillik arzuları yadelli işğalçılar tərəfindən qan içində boğulmuşdur. Ən ibrətamiz və təəssüfləndirici hal odur ki, bu acı məğlubiyyətlərdə obyektiv proseslərlə yanaşı, subyektiv amillərin də ciddi təsiri olmuşdur. Daxili çəkişmələr və münaqişələr, regional və sinfi maraqların milli mənafelərdən üstün tutulması, ən başlıcası, xalqın bütün təbəqələrini vahid məqsəd ətrafında birləşdirməyi bacaran ümummilli liderin olmaması məhz bu cür subyektiv amillərdəndir ki, xarici müdaxiləyə meydan açmış, milli müstəqillik üçün yaranmış tarixi şansın gerçəkləşməsinə imkan verməmişdir. Bunu dünyada milli dövlətlərin formalaşması prosesinin getdiyi bir zamanda Azərbaycanın xanlıqlara parçalanması faktı da təsdiq edir, Şərqdə ilk demokratik respublika olan Azərbaycan Xalq Cümhuriyyətinin cəmi 23 ay yaşadıqdan sonra süquta uğraması da.

XX əsrin sonunda xalqımızın milli istiqlala qovuşması üçün növbəti tarixi şərait yarandı. 1988-ci ildən vüsət alan xalq hərəkatı Azərbaycanın dövlət müstəqilliyinin elan edilməsi ilə nəticələndi. Lakin bir tərəfdən Ermənistanın torpaqlarımıza təcavüzü, digər tərəfdən isə hakimiyyət təcrübəsi və səriştəsi olmayan milli qüvvələrin daxili və xarici siyasətdə buraxdığı səhvlər xalqımızı ciddi sınaq qarşısında qoydu. Siyasi didişmələr və silahlı qruplaşmaların mübarizəsi ölkəni vətəndaş müharibəsi həddinə gətirib çıxardı. Daxili hərc-mərclik, hakimiyyət orqanlarının iflic vəziyyətinə düşməsi yenicə qazanılmış müstəqilliyin itirilməsinə səbəb ola bilərdi. Lakin bu dəfə tarix təkrarlanmadı. Çünki əvvəlki dövrlərdən fərqli olaraq xalqın bütün təbəqələrinin inandığı və hörmət bəslədiyi ümummilli lider, böyük siyasi iradəyə və təcrübəyə malik şəxsiyyət - Heydər Əliyev var idi. Xalqın mütləq əksəriyyətinin, o cümlədən hakimiyyət nümayəndələrinin təkidli tələbi ilə Bakıya gəlib Ali Sovetin Sədri, daha sonra ölkə Prezidenti seçilən Heydər Əliyev müstəqilliyimizə qarşı yönəlmiş, necə deyərlər, ənənəvi ssenarini pozdu, Azərbaycanın hansısa xarici qüvvələrin əlində oyuncağa çevrilməsinə imkan vermədi. Bu, çoxəsrlik tariximizdə şəxsiyyətin roluna dair ən bariz nümunə, ən parlaq örnəkdir. 1993-cü ilin son dərəcə gərgin şəraitində ümummilli liderimizin daxili sabitliyi təmin etmək, xarici təzyiqlərin qarşısını almaq və beləliklə, dövlət müstəqilliyimizi qoruyub saxlamaq istiqamətində apardığı nəhəng işlər bu gün öz bəhrəsini verir.

Hər sahədə olduğu kimi, dövlət quruculuğunda da varislik prinsipini qoruyub saxlayan ulu öndər Azərbaycanın gələcək inkişafında bu prinsipin yeganə doğru seçim olduğunu öncəgörənliklə müəyyən etmişdir. Və əslində, son 10 ildə ölkəmizdəki tarixdə görünməmiş möhtəşəm quruculuq, əldə olunmuş nailiyyətlər mütləq bir həqiqəti ortaya qoyur. Bu müddətdə istər daxili və xarici siyasət sahəsində, istərsə də sosial sahədə misli görünməmiş uğurlara imza atılmışdı. Ümumi daxili məhsul üç dəfə artmışdır, iqtisadiyyatın bütün sahələrində sürətli inkişafa nail olunmuşdur, daxili və xarici investisiyalar çoxalmışdır, dövlət büdcəsi 25 milyard manata çatmışdır. Yoxsulluğun səviyyəsi kəskin azalmış, işsizlik 6 faizə enmişdir, nəhəng sosial-iqtisadi layihələr həyata keçirilmiş, Azərbaycan Qafqazın lider dövlətinə çevrilmişdir. Şəhərlərimizin və kəndlərimizin siması dəyişmiş, minlərlə yeni emal müəssisəsi, xəstəxanalar, müalicə mərkəzləri, məktəblər, uşaq evləri və bağçalar, mədəniyyət obyektləri tikilib xalqın istifadəsinə verilmişdir.

Məlumdur ki, xarici siyasət daxili siyasətdən doğur və onun məntiqi nəticəsidir. Azərbaycan dövlətinin yürütdüyü xarici siyasəti qısaca da olsa nəzərdən keçirəndə, ölkə başçısının etdiyi səfərləri, reallaşdırdığı görüşləri, verdiyi müsahibələri, müəyyənləşdirdiyi istiqamət və prinsipləri təhlil edəndə bir daha qənaətə gəlirik ki, Prezidentin xarici siyasəti də daxili siyasəti kimi daim bir mərama, bir məqsədə, bir amala xidmət edir - müstəqil Azərbaycanı yaşatmaq, onu hərtərəfli inkişaf etdirmək, problemlərini həll etmək, xalqımızın dünya xalqları birliyində özünəlayiq yer tutmasına nail olmaq.

Bu gün müstəqil Azərbaycan dünyanın əksər ölkələri ilə qarşılıqlı siyasi, iqtisadi, mədəni və digər əlaqələrini inkişaf etdirir. Bu istiqamətdə Şərq ölkələri ilə qurulan əlaqələr, hərtərəfli əməkdaşlıq Azərbaycan Respublikasının dövlətçilik siyasətinin mühüm bir hissəsi kimi daim təkmilləşməkdədir. Azərbaycan Respublikasının Şərq siyasətində, heç şübhəsiz, birinci yer Türkiyə Cümhuriyyətinə məxsusdur. Din, dil, soy bağlılığına söykənərək yüksələn xətlə inkişaf edən əlaqələrimiz bütün sahələrdə əməkdaşlıq və qardaşlıq bağlarının möhkəmlənməsinə şərait yaratmışdır.

Ulu öndər Heydər Əliyevin uğurlu siyasi fəaliyyətinin davamı olaraq 2003-cü ildən etibarən ölkəmizdə yürüdülən siyasət, gerçəkləşən görüşlər, işgüzar səfərlər, bağlanan müqavilələr nəticəsində Azərbaycan-Türkiyə arasında iqtisadi, mədəni, hərbi, elm və təhsil sahələrində əlaqələr durmadan inkişaf edir.

Dövlətimizin məqsəd və maraqlarına uyğun olaraq elm və təhsil sahəsində əlaqələrin inkişaf etdirilməsi, Türkiyədə Heydər Əliyevin adını daşıyan mərkəzlərin, məktəblərin yaradılması, Azərbaycanda türk liseylərinin, Qafqaz Universitetinin fəaliyyət göstərməsi birgə mədəni tədbirlərin gerçəkləşməsi müasir əlaqələrə xüsusi məzmun verməkdədir.

Dövlətimizin yürütdüyü xarici siyasətdə türkdilli xalqların inteqrasiyası, o sıradan Türkmənistan, Özbəkistan, Qazaxıstan və Qırğızıstan respublikaları ilə qurulan hərtərəfli əlaqələr xüsusi önəm daşıyır. Türkdilli ölkələrin dövlət başçıları ilə görüşlər, imzalanan bəyannamələr, bağlanan siyasi, iqtisadi, mədəni, hərbi, hüquqi müqavilələr forma və məzmun baxımından mükəmməl və genişdir.

Türkdilli ölkələr ilə qurulan əlaqələrdə beynəlxalq təşkilatlarda Azərbaycanın təmsilçiliyi xüsusi əhəmiyyətə malikdir. Belə ki, beynəlxalq qurum və təşkilatlar, konfrans və digər tədbirlər çərçivəsində respublikamız türkdilli xalqlar ilə hərtərəfli və çoxşaxəli əlaqələrin inkişaf etdirilməsində ciddi addımlar atmışdır. Türkdilli ölkələrin dövlət başçılarının zirvə görüşləri, xüsusilə 2009-cu ildə Naxçıvan Muxtar Respublikasında gerçəkləşən IX Zirvə görüşündə Türkdilli Dövlətlərin Əməkdaşlıq Şurası haqqında sazişin imzalanması, Naxçıvan Bəyannaməsinin qəbulu, ötən ay Qəbələdə türkdilli dövlət və hökumət başçılarının görüşü türkdilli xalqların inteqrasiyasında mühüm əhəmiyyət kəsb edir. Türkdilli xalqların inteqrasiyası istiqamətində baş tutan digər önəmli hadisə - Türkdilli Dövlətlərin Parlament Assambleyasının (Türk PA) təsisi və baş katibliyinin Bakıda yerləşdirilməsidir.

İran İslam Respublikası ilə qarşılıqlı faydalı qonşuluq münasibətlərinin saxlanması və inkişaf etdirilməsi Azərbaycan xarici siyasətinin prioritet istiqamətlərindəndir. Ulu öndər Heydər Əliyev tərəfindən əsası qoyulmuş bu siyasət bu gün uğurla davam etdirilir.

İslam Əməkdaşlıq Təşkilatı ilə əlaqələr də inkişaf etdirilərək yeni mərhələyə qədəm qoyub. Azərbaycanda İƏT-in bir sıra konfrans, forum, seminar və digər tədbirləri keçirilmişdir. 2005-ci ildə İƏT-in Məkkədə keçirilən fövqəladə sammitində Azərbaycan Prezidenti şəxsən iştirak etdi. Onun təşəbbüsü ilə 2006-cı ildə (19-21 iyun) təşkilata üzv ölkələrin xarici işlər nazirlərinin XXXIII konfransı Bakıda keçirildi.

İƏT indiyə qədər Azərbaycanla bağlı bir sıra önəmli qətnamələr qəbul edib: Azərbaycana iqtisadi yardım barədə qətnamə, Ermənistanın Azərbaycan Respublikasına təcavüzü nəticəsində islam tarixi və mədəni abidələrin dağıdılması barədə qətnamə, Ermənistan və Azərbaycan arasındakı münaqişə barədə qətnamə və sairə. Azərbaycan Respublikası Milli Məclisinin nümayəndə heyəti İƏT Parlament İttifaqında müntəzəm iştirak edərək Ermənistan-Azərbaycan, Dağlıq Qarabağ münaqişəsində, təcavüzkarı pisləyən, Azərbaycanın ərazi bütövlüyünü müdafiə edən bir sıra qətnamələrin qəbul olunmasına nail olmuşdur. Beləliklə, islam aləmi problemlərimizlə yaxından tanışdır və bizi dönmədən dəstəkləyir.

Həyata keçirilən dərin düşünülmüş xarici siyasət nəticəsində Şərqin digər dövlətləri - Çin, Yaponiya, Cənubi Koreya, Pakistan, Hindistan, İndoneziya, Malayziya və başqa ölkələrlə də əlaqələr yaradılır, səfirliklər açılır, qarşılıqlı səfərlər həyata keçirilir, müqavilələr və digər sənədlər imzalanır, müxtəlif sahələrə aid əməkdaşlıq edilir.

Ölkəmizdə elmin günün tələbləri səviyyəsinə yüksəlməsi istiqamətində də mühüm addımlar atılır. Ötən illərdə ölkəmizdə alimlərin məvacibləri dəfələrlə artırılıb. Xüsusən də dövlət başçısının sərəncamları ilə alimlərimizə yüksək dövlət mükafatları, elmi adlar, prezident təqaüdü və mənzillər verilməsini qeyd etmək istərdim. Elmin inkişafına yönəldilən xərclər təxminən 8 dəfə artıb. Azərbaycan elminin inkişaf strategiyası təsdiq olunub, 2009-2015-ci illərdə elmin inkişaf strategiyasının həyata keçirilməsi üçün Dövlət Proqramı qəbul edilib, Elmin İnkişaf Fondu yaradılıb və s. Bütün bunlar göstərir ki, Azərbaycan elminə diqqət ilbəil artırılır.

Son illər elm və mədəniyyət ocaqlarının təmirinə, maddi-texniki bazasının gücləndirilməsi işinə də böyük diqqət yetirilir. Nümunə kimi bir müddət öncə Tarix muzeyinin əsaslı şəkildə təmir olunmasını və onun yeni eksponatlarla təchiz olunmasını, köhnə eksponatların bərpası üçün dövlətin hər il vəsait ayırmasını, eləcə də Nizami adına Ədəbiyyat muzeyinin təmir edilməsini göstərmək olar. Hər iki muzeyin təmirdən sonra açılışında cənab Prezident şəxsən iştirak edib və onların işi ilə yaxından tanış olub. Bütün bunlar Azərbaycanda elmə, mədəniyyətə yüksək diqqət və qayğıdan xəbər verir. Eyni zamanda, Elmin İnkişafı Fonduna çox böyük vəsaitlər ayrılır. Elm ocaqlarının yeni avadanlıqlar ilə təchiz olunması, modernləşməsi, dünya elminə inteqrasiya etməsi, qrant müsabiqələrinin keçirilməsi, elmi işçilərin əməyinin stimullaşdırılması üçün bu fond ciddi işlər görməkdədir. Ümumiyyətlə, akademiyanın təchizat məsələləri də son illər xeyli səviyyədə yaxşılaşdırılıb. İnformasiya texnologiyaları ilə təchiz olunması, ezamiyyətlərin verilməsi, xarici ədəbiyyatların alınması və s. məsələlərdə müsbət irəliləyişlər çoxdur.

Xeyli vaxt idi ki, AMEA-nın əsas və digər binalarında əsaslı şəkildə təmir işləri aparılırdı. Dövlət bu təmir-bərpa işləri üçün lazımi vəsaiti ayırmışdı. Bu məsələ Prezident İlham Əliyevin xüsusi diqqətində idi və dövlət başçısının akademiya şəhərciyində aparılan əsaslı təmir işlərindən sonra vəziyyətlə tanış olması buna bariz sübutdur.

Prezident İlham Əliyevin AMEA-nın illik hesabat yığıncağındakı söylədiyi nitq Azərbaycan elminin inkişafında çox böyük hadisədir. Dövlət başçısı yığıncaqdakı dərin məzmunlu çıxışında alimlərimizin əməyinə yüksək qiymət verib: "Akademiyada Azərbaycanın intellektual elitası cəmlənib. Akademiyanın inkişafı Azərbaycanda elmin inkişafına birbaşa təsir göstərir. Əgər inkişaf etmiş ölkələrin təcrübəsinə nəzər salsaq görərik ki, həmin ölkələrin uğurlarının təməlində ideya, fikir, innovasiya, elmi-texniki tərəqqi dayanır. Biz də ölkəmizdə müxtəlif istiqamətlərdə islahatlar apararkən müasirləşməyə üstünlük veririk. Müasir dövlətin qurulması elmin inkişafı olmadan mümkün deyildir".

Prezident Azərbaycanda elmin inkişafı, modernləşməsi, böyük elmi məktəblərin qorunub saxlanması haqqında dəyərli fikirlər bildirib. Bütün dövrlərdə alimlərimizin Azərbaycanın müxtəlif istiqamətlərdə inkişafına dəyərli töhfələr verdiyini qeyd edən dövlət başçısı ölkəmizdə dünya səviyyəsində aparılan araşdırmaların öz müsbət təsirini göstərdiyini qeyd edib. Cənab Prezidentin geoloq alimlərimizin ölkəmizin təbii resurslarının kəşfi ilə bağlı əvəzolunmaz xidmətlər göstərdiyini, neft-kimya sahəsində böyük perspektivlərin olmasını, ölkə iqtisadiyyatının hərtərəfli inkişafını və iqtisadi inkişafımızın gələcək istiqamətlərini müəyyən edərkən güclü elmi əsaslara söykənməli olduğumuzu, AMEA-nın aqrar bölməsinin yaradılması üçün konkret addımlar atılmasının vacibliyini, elmimizin dəstəyi ilə Azərbaycanda çox güclü kosmik sənaye yaradılacağına əminliyini, informasiya-kommunikasiya sektorunda uğurlarımızı xüsusi vurğulaması, elmimizin bütün sahələrinin dövlətin nəzarət və qayğısı altında olmasının göstəricisidir.

Ölkə rəhbəri humanitar elmlərlə bağlı məsələlərin daim diqqət mərkəzində olduğunu deyərək bu sahədə aparılan işlərin çox uğurlu və təqdirəlayiq olduğunu dedi: "Biz bu sahəyə daim diqqət göstərməliyik. Çünki bildiyiniz kimi, müstəqillikdən əvvəl bizi millət kimi qoruyub saxlayan milli dəyərlərimiz, milli ənənələrimiz, ana dilimiz, ədəbiyyatımız, musiqimiz olub. Ona görə bu sahəyə dövlət tərəfindən daim diqqət göstərilir. Hesab edirəm ki, Elmlər Akademiyası bu istiqamətdə çox uğurlu fəaliyyət göstərir". Cənab Prezidentin yığıncaqda Azərbaycan dili barədə söylədiyi fikri xüsusi vurğulamaq lazımdır: "Ana dilimizə hörmət və qayğı daimi olmalıdır. Biz ana dilimizi xarici təsirdən qorumalıyıq. Ana dilimiz bizim toxunulmaz sərvətimizdir. Azərbaycan xalqının formalaşmasında, müstəqil Azərbaycanın formalaşmasında ana dilimiz - Azərbaycan dili müstəsna rol oynamışdır. Biz elə etməliyik ki, dilimizin saflığını daim qoruyaq. Bu məsələyə çox ciddi diqqət göstərilməlidir".

Prezident İlham Əliyevin ədəbiyyat, arxeologiya, tarix və digər elm sahələri ilə bağlı söylədiyi fikirlər də bu sahələrə böyük önəm verməsini, onları daim diqqət mərkəzində saxlamasını təsdiqləyir: "Mən çox şadam ki, tarixçilərimiz çox sanballı və əsaslı əsərlər yaradırlar. Xüsusilə Ermənistan-Azərbaycan, Dağlıq Qarabağ münaqişəsinin mövcudluğu bizə diktə edir ki, bu sahəyə daha da böyük diqqət göstərək. Çünki bu bölgənin tarixi ermənilər tərəfindən daim saxtalaşdırılır, daim təhrif olunur. Şadam ki, alimlərimiz mənim çağırışıma müsbət cavab verərək qısa müddət ərzində bu bölgənin tarixi ilə bağlı çox gözəl və real faktlara əsaslanmış əsərlər yaratmışlar. Başlıcası, İrəvan xanlığının tarixi ilə bağlı yaradılmış əsərlər xüsusi məna daşıyır. Çünki əfsuslar olsun ki, dünya birliyi, demək olar, bilmirdi ki, bugünkü Ermənistan dövləti tarixi Azərbaycan torpaqlarında yaranmışdır".

Yığıncaqda "Biz elə etməliyik ki, Azərbaycan elmi inkişaf etsin, yaşasın və Azərbaycan dövlətinə, Azərbaycanın milli maraqlarına həmişə olduğu kimi xidmət etsin", - söyləyən Prezident İlham Əliyevin akademiyanın gələcəyinə böyük inam bəsləməsini onun gənc alimlərlə bağlı söylədiyi fikirlər də təsdiqləyir: "Hazırda "Azərbaycan gəncliyi 2011-2015 illərdə" Dövlət Proqramı hazırlanır. Eyni zamanda, Azərbaycan elminin inkişafı üzrə dövlət proqramı da 2015-ci ilə qədər hesablanıbdır. Bu iki proqramı biz bir növ bir-biri ilə bağlamalıyıq və gənclərin, ümumiyyətlə, elmə cəlb edilməsi üçün əlbəttə ki, əlavə tədbirlər nəzərdə tutulmalıdır. Mən o fikirlə tam razıyam ki, biz gəncləri elmə cəlb etmək üçün əlavə mexanizmlər hazırlamalıyıq, stimullaşdırmalıyıq".

Ölkə başçısının Azərbaycan Milli Elmlər Akademiyasının illik ümumi yığıncağından sonra mayın 1-dən AMEA-nın həqiqi üzvlərinin aylıq rütbə maaşlarının 1200 manat, müxbir üzvlərinin aylıq rütbə maaşlarının 850 manat məbləğində müəyyən edilməsi, AMEA-nın tabeliyində olan, dövlət büdcəsindən maliyyələşdirilən elm və elmi-tədqiqat müəssisələrində çalışan işçilərin əməkhaqlarının 20 faiz artırılması, eləcə də akademiyanın maddi-texniki bazasının möhkəmləndirilməsi haqqında verdiyi sərəncamlar alimlərimiz tərəfindən böyük ruh yüksəkliyi ilə qarşılandı. Bütövlükdə Elmlər Akademiyasının maddi-texniki bazasının möhkəmləndirilməsi istiqamətində də konkret addımlar atıldı. Prezidentin sərəncamı ilə "Akademiya şəhərciyi"ndə AMEA-nın mərkəzi kitabxanasının yeni binasının tikilməsi, ərazidəki qeyri-akademik qurumların köçürülməsi, burada yerləşən Fizika və Geologiya institutlarının, eləcə də Sumqayıt şəhərindəki Polimer Materialları İnstitutunun binalarının əsaslı təmiri nəzərdə tutulur. Eləcə də "Xəzər Elmi Tədqiqat Mərkəzi"nin yaradılması, neft-kimyayönümlü institutların zəruri avadanlıqlarla təchiz edilməsi ilə bağlı təkliflərin hazırlanması müvafiq qurumlara tapşırıldı.

Bütün bunlar onu göstərir ki, Azərbaycan elminin inkişafı, modernləşməsi, dünya elminə inteqrasiya etməsi üçün dövlətimiz əlindən gələni edir, görülən işlərdə alimlərimizi dəstəkləyir, fəaliyyətlərini yüksək qiymətləndirir və alimlər üçün hər cür şərait yaradır.

Son illərin möhtəşəm uğurları bizdə zəngin sərvətlərə malik, əlverişli geoməkanda yerləşən Azərbaycanın parlaq gələcəyinə əminliyi artırır. Bu gələcəyə ölkədə aparılan köklü islahatlar, konstitusion ənənələrə əsaslanan sarsılmaz dövlət quruculuğu təminat verir.

Hesab edirəm ki, Vətənin taleyi heç kimin siyasi ambisiyasının qurbanına çevrilməməlidir. Yaşadığımız taleyüklü dövrdə hər bir azərbaycanlı öz məsuliyyətini tam dərk edərək milli maraqlardan çıxış etməlidir. Unutmamalıyıq ki, bədxahlarımıza Azərbaycanda zəif iqtidar lazımdır. Amma Azərbaycan xalqına güclü iqtidar gərəkdir. Çünki güclü iqtidar güclü Azərbaycan deməkdir.

Gövhər BAXŞƏLİYEVA,

AMEA akademik Z.M.Bünyadov adına Şərqşünaslıq İnstitutunun direktoru, filologiya elmləri doktoru, professor

Azərbaycan. - 2013.- 7 sentyabr.- S. 6.