Azərbaycanın yəhudi icması xalqımızın musiqi mədəniyyətinə böyük töhfələr vermişdir

Sentyabrın 9-da mədəniyyət və turizm naziri Əbülfəs Qarayev Avropa Yəhudi İttifaqının sədri Tomer Orninin rəhbərlik etdiyi nümayəndə heyəti ilə görüşmüşdür.

Mədəniyyət və Turizm Nazirliyinin mətbuat xidmətindən bildirmişlər ki, "Jews news" telekanalının sahibi Oleq Rabinoviçin, kanalın yayım üzrə direktoru Piter Dikensonun da iştirak etdikləri görüşdə nazir ölkəmizin beynəlxalq yəhudi təşkilatları ilə işgüzar münasibətlər qurduğunu, Mədəniyyət və Turizm Nazirliyinin də bu münasibətlərə mühüm əhəmiyyət verdiyini diqqətə çatdırmışdır.

Respublikamızda yaşayan yəhudi icmasından söz açan nazir bildirmişdir ki, icma Azərbaycan cəmiyyətinin bərabərhüquqlu üzvü kimi tolerantlıq və sülh şəraitində ömür sürür, ölkənin sosial-iqtisadi və mədəni həyatında fəal iştirak edir, müxtəlif mədəniyyət tədbirlərinə, festivallara qatılır. Qəbələ Beynəlxalq Musiqi Festivalında yəhudi əsilli həmvətənlərimizin və İsraildən olan musiqiçilərin yaxından iştirak etdiklərini deyən nazir bu əməkdaşlıqdan məmnun olduğunu vurğulamışdır.

Qeyd olunmuşdur ki, musiqi sahəsində ölkəmizin İsraillə geniş əlaqələri mövcuddur. Hələ ötən əsrin 20-ci illərində Azərbaycan Dövlət Konservatoriyası yaradılarkən bu təhsil ocağına dəvət edilən müəllim heyətinin əksəriyyəti yəhudi əsilli musiqiçilər olmuşlar. Onlar Azərbaycanın musiqi mədəniyyətinə böyük töhfələr vermişlər. Ənənəvi əməkdaşlıq bu gün də uğurla davam etdirilir.

Azərbaycan musiqisinin də İsraildə sevilərək dinlənildiyini vurğulayan nazir, xalqlararası mədəni əlaqələr baxımından musiqi sahəsində əməkdaşlığı uğurlu nümunə kimi dəyərləndirmişdir.

İki ölkə arasında digər sahələrdə də nümunəvi əməkdaşlığın olduğunu nəzərə çatdıran Əbülfəs Qarayev artıq uzun müddətdir ki, Bakı-Təl-Əviv aviareysinin istifadəyə verildiyini xatırlatmış və bu faktı ikitərəfli münasibətlər baxımından yüksək qiymətləndirmişdir.

Səmimi görüşə görə minnətdarlığını bildirən Avropa Yəhudi İttifaqının sədri Tomer Orni Azərbaycana ilk dəfə gəldiyini, ölkəmizdəki dinamik inkişafı əyani şəkildə görməkdən məmnun olduğunu demişdir. Səfər çərçivəsində Qubaya, yəhudilərin yaşadıqları Qırmızı Qəsəbəyə də baş çəkəcəklərini diqqətə çatdıran qonaq Azərbaycandakı yəhudi icmasının sosial-iqtisadi vəziyyətlərindən razı qaldıqlarını, burada bütün xalqların dinc və əmin-amanlıq şəraitində yaşadıqlarını qeyd etmişdir.

Nazir Əbülfəs Qarayev Tomer Ornini qış aylarında Azərbaycana bir daha səfərə gəlməyə, Şahdağ Qış-Yay Turizm Kompleksində xizək sürməyə, bu istirahət məkanı ilə yaxından tanış olmağa dəvət etmişdir.

AzərTAc

Azərbaycan. - 2013.- 10 sentyabr.- S. 4.