Kreativ, vətənpərvər gənclik
daha qüdrətli Azərbaycanın
etibarlı təminatçısıdır
Xaricdə
Təhsil Alan və Məzun Olmuş Azərbaycanlı Gənclərin Beynəlxalq
Forumunun (ASAİF) XI Yay
Forumu uğurla başa çatdı. Hər yay
dünyanın müxtəlif ölkələrində təhsil
alan azərbaycanlı tələbələri
bir araya gətirən
ASAİF-in Bakı Forumunda
da gəncləri maraqlandıran mövzular
müzakirəyə çıxarıldı.
Dünyanın
qabaqcıl ali təhsil ocaqlarının bakalavr və magistrları, məzunları ASAİF-in ənənəvi forumlarında iştirak etməklə gələcək
karyeraları üçün gözəl
imkan qazanırlar. Bu,
onların özləri tərəfindən də etiraf olunur. Qəzetimizə
açıqlama verən gənclər ASAİF-in
təşkil etdiyi bu forumlar və foruma
qatılmalarının səbəblərini belə izah etdilər:
ASAİF
kimi qısa zamanda bu qədər irəli gedən ikinci bir təşkilat yoxdur
Vüqar
QURBANOV,
Ankara
və İstanbul tibb
universitetlərində Ağız və üz-çənə
cərrahiyyə ixtisası üzrə ixtisaslaşma
kursunun məzunu, Azərbaycan Tibb Universitetinin
Ağız və üz-çənə cərrahiyyəsi
şöbəsinin doktorantı:
- Artıq bir neçə ildir ki, ASAİF-in ənənəvi yay forumlarında iştirak edirəm. Bakıda
keçirilən XI Yay Forumu
əvvəlcədən də deyildiyi kimi, tam yeni
formatda keçirildi.
Hər il keçirilən bu
forumlarda rəngarənglik olduğu
üçün gənclərin ASAİF-ə
olan marağı daha da artır. Bu səbəbdən
də xaricdə təhsil alan azərbaycanlı
tələbələrin şəbəkələşməsi
prosesi sürətlənir. Hər il keçirilən toplantılarda fərqli
panellər, fərqli mövzular olduğu üçün
tələbələr daha fəal iştirak edirlər. Bu forumda da yeniliklər çox idi. Gəncləri
maraqlandıran suallara dövlət rəsmiləri
aydınlıq gətirdilər. Çox
maraqlı müzakirələr, diskussiyalar
keçirildi.
Gənclər ASAİF-in bu
forumlarında çox şey
öyrənir və gələcək karyeralarının
istiqaməti ilə bağlı bilgilər toplayırlar. Bununla bərabər,
ASAİF-dən gözləntilərimiz çoxdur.
Şəxsən mənim bu forumlara qatılmaqda məqsədim gənc həkimlərlə
yaxından tanış olmaq, xaricdə təhsil
alan və məzun olan
gənclərlə sıx əlaqələr qurub
tibb sahəsində baş
verən yenilikləri və digər məsələləri
birlikdə müzakirə etməkdir. Bir həkim
olaraq istərdim ki,
ASAİF gələcək forumlarında tibb
ixtisası üzrə təhsil alan tələbələrin
bir paneldə müzakirələr
aparmasına imkan yaratsın. Həmin
paneldə Azərbaycan səhiyyəsində olan
bəzi problemlərin həlli yolları birgə müzakirə
olunsun.
Azərbaycanda çoxlu sayda gənclər
təşkilatları mövcuddur. Ancaq ASAİF kimi tez bir zamanda
bu qədər irəli gedən, məşhurlaşan
ikinci bir təşkilat
yoxdur. Bu da çox güman
ki, onun idarəçiliyi
ilə məşğul olan gənclərdən
aslıdır. Bütün
ASAİF-çilərə gələcək fəaliyyətlərində
uğurlar arzulayırıq.
Foruma qatılmaqla özümə yeni dostlar qazanmışam
Könül
VƏLİZADƏ,
Türkiyənin
Orta Doğu Texniki Universitetinin III kurs tələbəsi:
- ASAİF-in forumlarına
son iki ildir ki, qatılıram. İki forum arasında fərqlilik çoxdur. Hər dəfə yeni
mövzular ətrafında
fikir mübadiləsi aparılır və panellərdə olan diskussiyalar məni çox sevindirir.
ASAİF dövlət orqanları
ilə tələbələr
arasında bir körpü kimi fəaliyyət göstərir
və istənilən
məsələnin həllində
xaricdə təhsil alan tələbələrə
yardımçı olur.
Çox
sevinirəm ki, Azərbaycanda belə bir təşkilat yaradılıb. Avropanın bir
çox ölkəsində
belə qurum yoxdur. Forumlara qatıldıqda onu da hiss edirəm ki, beynəlxalq tədbirlərin təşkilində
və digər məsələlərdə
tələbələrə qayğı göstərilir.
ASAİF-in əsas təqdir olunası cəhəti isə müxtəlif tələbələri
bir araya gətirməsidir və onların şəbəkəsini
genişləndirməsidir. İki foruma qatılmaqla mən özümə yeni dostlar qazanmışam.
Eyni zamanda, burada tələbələr bir-birinə
istənilən mövzuda
yardımçı olurlar.
Nazirlər, komitə sədrləri
tələbələr qarşısında
çıxış edib
ölkə qanunvericiliyindəki
yeni dəyişikliklər,
baş verən və nəzərdə tutulan gələcək layihələr barədə
məlumat verirlər.
Tələbələr isə onları
maraqlandıran məsələlərlə
bağlı öz müraciətlərini edirlər.
Bakı forumunda biz öz təklif və rəylərimizi yazılı
şəkildə də
qeyd etdik və ASAİF-ə təqdim
elədik. Hesab edirəm
ki, tələbələrimizin
irəli sürdükləri
məsələlər öz
həllini tapacaq.
ASAİF-in
forumları bir-birindən
fərqlənir
Ağa BAYRAMOV,
Türkiyə Orta Doğu
Texniki Universitetinin IV kurs tələbəsi:
- Biz ASAİF-in qayğısını
daim üzərimizdə
hiss edirik. Hər hansı bir
problemimiz, şikayətimiz
olduqda ASAİF vasitəsilə
onun həllinə nail
oluruq. Qurumun hər il
təşkil etdiyi yay forumlarını çox müsbət qiymətləndiririk. Çünki
bu forumlarda dünyanın bütün
ölkələrində təhsil
alan tələbələr
bir araya gətirilir. Fikrimcə, bu, böyük
nailiyyətdir. Forumlarda aparılan
diskussiyalar, məsələlərə
fərqli baxışlar
hər kəsə imkan verir ki,
özü üçün
bir nəticə çıxarsın və
təcrübə mübadiləsini
genişləndirsin. Bu
forumda gənclərə
bütün sahələrdə
fikir bildirməyə şərait yaradılır.
İldən-ilə bu təcrübə
mübadiləsi daha da genişlənir. Çünki ASAİF-in I Yay Forumu
ilə XI Yay Forumu bir-birindən çox fərqlənir.
Yeni kadrların bu işlərə cəlb edilməsi, tələbə
kontingentinin böyüməsi
işin təşkilini
daha da təkmilləşdirib.
Əlbəttə ki, Azərbaycan
Prezidenti İlham Əliyevin xaricdə oxuyan tələbələrə
olan böyük diqqətini də danmaq olmaz. Mən şəxsən öz adımdan deyə bilərəm ki, Dövlət Proqramı çərçivəsində
xaricdə təhsil alıb qayıdan tələbələrə Azərbaycanda
böyük etimad var.
Bu gün Azərbaycanda
savadlı, Vətənini,
millətini çox sevən insanlar üçün hər cür şərait mövcuddur. Hesab edirəm ki,
ASAİF-in Bakı Forumu
hələ uzun müddət yaddaşlardan
silinməyəcək. Biz forumda bu ildən
digər ölkələrdə
təhsil almağa yollanacaq tələbələrlə
tanış olduq və onlarla
öz təcrübəmizi
bölüşdük. İnanıram ki, ASAİF-in növbəti
forumları daha maraqlı olacaq.
ASAİF
öz missiyası ilə böyük uğurlara imza atacaq
Məhin ALMƏMMƏDOVA,
Amerika Birləşmiş Ştatlarının Ayova ştatının "Spokane
Community College" ali məktəbinin
II kurs tələbəsi:
- Amerikada təhsil Avropa və Asiyadan çox fərqlənir. Orada dərslər hər zaman interaktiv formada keçirilir. Bu formada tələbələrə
bilik vermək daha asandır. Heyf ki, ASAİF-in bundan əvvəlki forumlarında
iştirak edə bilməmişəm. Lakin Bakıya
qayıtdıqdan sonra
ASAİF-in forumlarında iştirak
etmək üçün
səy göstərmişəm.
Bu forumda tələbələr təhsil
naziri Mikayıl Cabbarova təkliflər paketi təqdim etdi. Çox
şadam ki, nazir təkliflərin hər birinə xüsusi qiymət verdi. Bizim təhsil
naziri ilə birbaşa ünsiyyətimizə
şərait yaradan
ASAİF-ə dərin təşəkkürümü
bildirirəm. ASAİF-in forumlarında xoşuma gələn cəhətlərdən
biri də odur ki, burada
hər il
müxtəlif ölkələrdən
tələbələr iştirak
edirlər. Maraqlısı odur ki, onlar hər dəfə əvəzləndirilir.
Misal üçün,
ötənilki yay forumunda iştirak edən tələbələrin
təxminən yarısı
bu il
burada yoxdur, artıq yeniləri qatılıb. Beləliklə,
aydın olur ki, ASAİF xaricdə təhsil alan
tələbələrin şəbəkələşmə
şansını xeyli
artırıb. Bu forum çox səmərəli
keçdi. Xarici
ölkələrdə təhsil
alan azərbaycanlı
tələbələri bir
araya gətirmək, onların toplantısını,
forumunu və istirahətini təşkil
etmək heç də asan məsələ
deyil. ASAİF bu ağır missiyanı üzərinə
götürərək onun
öhdəsindən lazımi
səviyyədə gələ
bilir. Güman edirəm ki, gələcək forumlarda
daha yeni məsələlər müzakirəyə
çıxarılacaq və
xaricdə təhsil alan azərbaycanlı
tələbələri öz
ətrafına toplayan
ASAİF böyük uğurlara
imza atacaq.
Ölkəmizə yeniliklər gətirəcəyik
Anar BABAZADƏ,
İspaniyanın "İnstituto de Empresa" ali məktəbinin magistri:
- Mən İspaniyada Dövlət Proqramı çərçivəsində
təhsil alıram. Təhsilimi başa vurub Azərbaycana qayıdanda Vətənimiz üçün
idarəetmə sahəsində
töhfələr verəcəyimə
inanıram. Hazırda gələcək
təhsilimi bu istiqamətdə planlaşdırıram.
ASAİF-in təşkil etdiyi forumlar gənclərin karyerası
üçün çox
əhəmiyyətlidir. Burada digər ölkələrdə təhsil
alan azərbaycanlı
tələbələrlə, məzunlarla tanış olub fikir mübadiləsi
aparırıq. Avropalılara öz dillərində bizim tariximizi, mədəniyyətimizi və
həqiqətlərimizi çatdıranda
onlar üçün
çox maraqlı olur. ASAİF-in XI Yay
Forumunda da iştirak etməyimin səbəblərindən biri
ölkəmiz haqqında
son yeniliklərlə tanış olmaq, dövlət rəsmilərindən
məlumatlar toplamaq və onları hansısa formada İspaniyada yaymaqdır. Bundan əvvəl ASAİF-in iki
forumunda iştirak etmişəm. Hər dəfə
foruma qatılanda nəzərəçarpan inkişafı
görürəm. Əvvəllər qeydə alınan cüzi nöqsanlar, yaxud çatışmazlıqlar
ildən-ilə aradan qalxır, təşkilat yenilənir və daha da inkişaf
edir. İnanıram ki, dünyanın
bir çox ölkələrində təhsil
almış bu tələbələr gələcəkdə
müsbət addımlar
atacaqlar. Müəyyən nöqsanlar varsa, onlara göz yummaq deyil, kömək
olmaq, özlərinə
qarşı tələbkarlığı
artırmaq lazımdır
ki, tələbə inkişafda olsun. Əminəm
ki, tələbələr
Azərbaycanın gələcək
inkişafı üçün
ölkəmizə böyük
yeniliklər gətirəcək.
ASAİF
uğurlu karyera üçün ən yaxşı partnyordur
Zinyət AĞARZAYEVA,
İstanbul Texniki Universitetinin
tələbəsi:
- ASAİF dünyada təhsil alan
tələbələri hər
il bir araya
gətirir. Bu, həqiqətən çox
böyük güc tələb edir. Bunun üçün təşkilatçılıqdan
tutmuş, digər işlərə kimi böyük peşəkarlıq
sərgilənir. Buna görə ASAİF rəhbərliyinə
və onun bütün kollektivinə
təşəkkürümü bildirirəm. Fikirləşirəm ki, ASAİF bizə çox imkanlar yaradır. Biz bu forumlar vasitəsilə
tələbələrin şəbəkəsini
yaradırıq. Bəlkə
də gələcəkdə
bu tələbələrlə
hansısa iş birliyində ola
bilərik. Bunun özü çox
təqdirəlayiq haldır.
Artıq üçüncü dəfədir
ki forumda iştirak edirəm. Hər dəfə də yeni ideyaların ortaya çıxdığının,
yeni təkliflər səsləndirildiyinin şahidi
oluram.
Azərbaycanlı
tələbə xaricə gedəndə onun
vətənpərvərlik hissi daha qabarıq olmalıdır. Burada
toplaşan tələbələrin əksəriyyəti
Vətəni layiqincə təmsil edənlərdir. Onların hər biri Vətən
sevgisini üzərlərində
daşıyır və inanıram ki,
ölkəmizin xaricində Azərbaycanın adına xələl
gətirəcək bir addım
atmırlar. Çünki buraya
toplaşanlar artıq elmli
və dünyagörüşlü gənclərdir.
Azərbaycan. - 2013.- 10 sentyabr.- S. 5.