ABŞ səfəri əlamətdar hadisələrlə yadda qalmışdır

Azərbaycan Respublikasının rabitə və informasiya texnologiyaları naziri Əli Abbasov sentyabrın 3-dən 5-dək ABŞ-ın Nyu-York şəhərində səfərdə olmuşdur.

Nazirin ABŞ-a səfəri əlamətdar hadisələrlə yadda qalmışdır.

Rabitə və İnformasiya Texnologiyaları və Xarici İşlər nazirliklərinin birgə təşəbbüsü ilə BMT Baş Məclisində müzakirəyə çıxarılan və Avrasiya Rabitə Alyansının (ABA) yaradılmasını nəzərdə tutan qətnamə layihəsi yekdilliklə bütün BMT-yə üzv olan dövlətlər tərəfindən qəbul olunmuşdur.

Qətnamə layihəsi Azərbaycanın BMT yanında daimi nümayəndəsi Aqşin Mehdiyev tərəfindən Məclis üzvlərinə təqdim edilmişdir.

Rabitə və İnformasiya Texnologiyaları Nazirliyinin (RİTN) mətbuat xidmətindən AzərTAc-a bildirmişlər ki, qətnamə layihəsinin müzakirəsi zamanı BMT Baş Məclisinin sədri Vuk Yeremiç və BMT Baş katibinin iqtisadi və sosial məsələlər üzrə müavini Vu Honqbo çıxış edərək Azərbaycanın təşəbbüsünü dəstəkləmişlər.

Sentyabrın 4-də BMT Baş Məclisinin 67-ci sessiyası çərçivəsində keçirilən 98-ci plenar iclasda iştirak edən nazir Əli Abbasov geniş məruzə ilə çıxış etmişdir.

BMT Baş katibinin iqtisadi və sosial məsələlər üzrə müavini Vu Honqbo, qurumun İnkişaf Proqramının rəhbəri xanım Helen Klark ilə keçirilən ikitərəfli görüşlərdə Azərbaycanın BMT layihələrindəki rolu və növbəti təşəbbüslər müzakirə olunmuşdur.

ABŞ Dövlət Departamentində beynəlxalq kommunikasiyalar və informasiya siyasəti üzrə koordinator, səfir Daniel Sepulveda ilə görüşdə isə Azərbaycan-ABŞ münasibətlərində rabitə və informasiya-kommunikasiya texnologiyaları sahələrində əlaqələrin genişləndirilməsi müzakirə mövzusu olmuşdur.

Bundan əlavə, nazir Ə.Abbasov ABŞ-ın "ITT Exelis" qrupunun vitse-prezidenti, istefada olan general-mayor Merser və "Futron" şirkətinin prezidenti Şhakil Qureyşi ilə ikitərəfli işgüzar görüş keçirmişdir.

RİTN-in təşəbbüsü ilə "UN Plaza" mehmanxanasında Azərbaycan gecəsi təşkil edilmişdir. Tədbirdə BMT yanında akkreditə olunmuş diplomatik korpusun, Azərbaycanın və yerli diasporların nümayəndələri iştirak etmişlər.

Tədbir və görüşlərdə Azərbaycanın BMT yanında daimi nümayəndəsi Aqşin Mehdiyev iştirak etmişdir.

Azərbaycan. - 2013.- 8 sentyabr.- S. 4.