Barak Obamanın məktubu
Amerikanın Azərbaycanı regionda
etibarlı və strateji tərəfdaş
kimi dəstəklədiyini sübut edir
Rasim
MUSABƏYOV: «İki dövlət
arasında münasibətlər qarşılıqlı maraqlara və bərabərhüquqlu
əməkdaşlığa əsaslanır»
Amerika Birləşmiş Ştatlarının Prezidenti
Barak Obamanın Azərbaycan
Prezidenti İlham Əliyevə məktubunda
Dağlıq Qarabağ
münaqişəsi ilə
bağlı aparılan
danışıqlarda yeni
səylərin göstərilməsinin
vacibliyi vurğulanıb.
Barak Obama qeyd edib ki,
tərəflər birbaşa dialoq imkanlarından yararlanmalı və
danışıqlarda hazırkı çıxılmaz vəziyyətdən
çıxış yolu tapmaq
üçün həmsədrlərin
vaxtından və bacarığından istifadə etməlidirlər.
Onun fikrincə, danışıqlarda
müəyyən edilmiş kompromis çərçivəsində yeni səylərin göstərilməsi regionda sülhün bərqərar
olunmasını təmin edə bilər.
Qeyd edək ki,
ABŞ Prezidentinin təyin etdiyi
ATƏT-in Minsk qrupunun
yeni həmsədri səfir Ceyms Uorlik həm zəngin
təcrübəyə malik, həm də
situatsiyalarda çevik
manevr etməyi bacaran bir şəxs kimi təqdim
olunur.
Məsələyə
münasibət bildirən Milli Məclisin
deputatı, politoloq Rasim
Musabəyov bildirib ki,
ABŞ prezidentinin dövlətimizin
başçısına ünvanladığı məktub eyni zamanda tərəfləri
Minsk qrupunun prinsipləri
zəminində güzəştə getməyə
çağırıb. Deputatın sözlərinə görə,
Barak Obama Minsk qrupuna həmsədr göndərilməsi ilə
bağlı ilk dəfədir ki, Azərbaycan Prezidentinə müraciət edir. "Barak Obamanın məktubu
onu göstərir ki, Amerika Birləşmiş Ştatları
Dağlıq Qarabağ münaqişəsinin
həlli prosesini bir
vasitəçi kimi diqqətdə
saxlayır. Ancaq bu
ölkənin danışıqlar prosesinə bundan
sonra nə dərəcədə kömək
edəcəyini zaman göstərəcək".
Deputat bildirib
ki, yeni həmsədr Ceyms Uorlikdən öncə də ATƏT-in Minsk qrupuna yeni
təyin olunan ABŞ-ın bəzi həmsədrləri
ilk açıqlamalarında
münaqişənin həlli ilə bağlı ciddi bəyanatlar veriblər.
Barak Obamanın
tərəflərin dialoq imkanlarından
yararlanmasının vacibliyi ilə
bağlı fikrinə də münasibət bildirən Rasim Musabəyov qeyd edib ki, Ermənistan-Azərbaycan,
Dağlıq Qarabağ münaqişəsinin
həllində daim dialoqdan
qaçan Ermənistan hakimiyyəti olub.
Azərbaycan isə ərazi bütövlüyünün
təmin olunma şərti ilə istənilən
dialoqa hazır olduğunu
dəfələrlə bəyan edib. Ona görə də kompromisə dəvət
edilməyə daha çox
ehtiyacı olan Ermənistandır. Çünki təcavüzkar dövlət odur. Deputat hesab
edir ki, həmsədr
ölkələr daim
danışıqlardan qaçan
işğalçı ölkəni konstruktiv
addım atmağa məcbur etməlidirlər.
Rasim Musabəyov
onu da vurğulayıb
ki, Barak Obamanın Azərbaycan
Prezidentinə göndərdiyi məktub həm də
Amerikanın Azərbaycanı regionda
etibarlı və strateji tərəfdaş
kimi dəstəklədiyini, əlaqələrin
müxtəlif istiqamətlər üzrə davamında
maraqlı olduğunu sübut
edir. İki dövlət arasında münasibətlər
qarşılıqlı maraqlara və bərabərhüquqlu
əməkdaşlığa əsaslanır.
R.BAXŞƏLİYEV
Azərbaycan. - 2013.- 12 sentyabr.- S. 8.