Regionların inkişafı davamlı və dinamikdir

Prezident İlham Əliyev 2 gün ərzində 7 rayona səfəri zamanı 27 sosial, iqtisadi, mədəni və inzibati infrastrukturun açılışında iştirak etmişdir

Azərbaycan hakimiyyətinin qarşıya qoyduğu əsas məqsəd və vəzifələrdən biri son illərdə qazanılan sosial-iqtisadi uğurların miqyasını daha da genişləndirməkdir. Fərəhlə qeyd etməliyik ki, müxtəlif dövlət proqramlarının icra edilməsi artıq neçə ildir ki, Azərbaycanın sosial-iqtisadi həyatına təzə nəfəs gətirməklə yanaşı, bu istiqamətdə dövlət siyasətinin yeni müstəviyə qədəm qoymasını təmin edib. Bunun nəticəsidir ki, ötən 10 il ərzində bir neçə dəfə artan milli iqtisadiyyatımız inkişaf səviyyəsinə görə dünyada öncül yerlərdən birini tutur.

Xüsusilə qeyd etməliyik ki, regionların sosial-iqtisadi inkişafına dair dövlət proqramlarının icrası ölkə iqtisadiyyatının inkişafında mühüm əhəmiyyət kəsb etməklə makroiqtisadi sabitliyin təmin olunmasında, sahibkarlıq fəaliyyətinin genişlənməsində, yeni müəssisələrin və iş yerlərinin açılmasında, infrastruktur və kommunal xidmətlərin səviyyəsinin daha da yüksəldilməsində, yoxsulluq həddinin aşağı düşməsində və əhalinin rifah halının yaxşılaşdırılmasında müstəsna rol oynamaqdadır. Bu baxımdan ölkədə qazanılan sosial-iqtisadi uğurlarda Azərbaycanın regionlarının öz payı var. 2004-cü ildən başlanan regional inkişaf proqramlarının icrası nəticəsində Azərbaycanda qeyri-neft sektoru yüksəliş dövrünə qədəm qoyub. Bütün bölgələrdə yeni istehsal və xidmət müəssisələri fəaliyyətə başlayıb, quruculuq və abadlıq işləri geniş vüsət alıb. Regional inkişaf proqramları sosial sahədə qarşıda duran problemlərin də həllində mühüm rol oynayır. Belə ki, yeni müəssisələrin yaradılması əhalinin məşğulluq problemlərinin yoluna qoyulması və yeni iş yerlərinin açılması ilə müşayiət edilir. Eyni zamanda regionlarda infrastrukturun bərpası və inkişafı, əhalinin kommunal xidmətlərlə, o cümlədən elektrik enerjisi, qaz və su ilə təchizatının yaxşılaşdırılması, səhiyyə və təhsil müəssisələrinin tikintisi, sosial vəziyyətin daha da yaxşılaşdırılması istiqamətində mühüm tədbirlər həyata keçirilir.

Prezident İlham Əliyevin sentyabrın 4-5-də Salyan, Biləsuvar, Cəlilabad, Yardımlı, Masallı, Lənkəran və Astara rayonlarına səfəri bir daha göstərdi ki, regionların inkişafı davamlı və dinamikdir. Bu səfər regionların sosial obyektlərinin və yol-nəqliyyat infrastrukturunun müasir standartlara uyğun yenidən qurulmasının, abadlıq və quruculuq işlərinin yüksək səviyyədə həyata keçirilməsinin, insanların sosial qayğılarının, mədəni istirahətlərinin, o cümlədən gənc nəsli düşündürən məsələlərin dövlətin diqqət mərkəzində olduğunu göstərdi.

Təmiz içməli su isə sağlam həyat deməkdir. Bu mənada Azərbaycanda həyata keçirilən çoxşaxəli sosial siyasətin mühüm istiqamətlərindən biri əhalinin təmiz içməli su ilə təminatıdır. Bugünkü sürətli iqtisadi inkişaf mərhələsində isə ölkə əhalisinin su ilə təminatının tam yoluna qoyulması xüsusilə vacib məsələlərdən biridir. Təsadüfi deyil ki, respublikanın sosial-iqtisadi həyatında müşahidə olunan dinamik inkişaf kommunal sektorda, o cümlədən su təchizatı sistemində də öz əksini tapıb. Əhalinin su təminatının yaxşılaşdırılmasına dövlət qayğısı artırılıb, regionlarda bu istiqamətdə yeni layihələr həyata keçirilib. Oğuz-Qəbələ-Bakı su xətti çəkilib. Eyni zamanda Kür və Arazboyu yaşayış məntəqələrində sutəmizləyici qurğular quraşdırılıb.

Prezident İlham Əliyevin Biləsuvar, Yardımlı rayonlarına və Lənkəran şəhərinə səfərləri çərçivəsində yeni içməli su xətlərinin istifadəyə verilməsi göstərdi ki, dövlətin sosial siyasətinin mərkəzində məhz vətəndaş dayanır. Bu məqsədlə keçirilən mərasimlərdə qeyd olunduğu kimi, bu proses davamlıdır və hər bir şəhərin, kəndin, qəsəbənin təmiz içməli su təchizatının yüksək səviyyədə təmini daim diqqət mərkəzində olacaq.

Cəmiyyətin inkişafında idmanın çox böyük rolu var. İdman həm insanların fiziki cəhətdən sağlamlığına xidmət edən, həm də ölkənin şöhrətini ucaldan sosial sahədir. Bu amillər idmanı hər bir ölkədə cəlbedici və mühüm sahəyə çevirir. Azərbaycanda da belədir. Hazırda ölkəmiz idman infrastrukturuna görə regionun qabaqcıl dövlətidir. İndi Azərbaycanda beynəlxalq idman yarışları yalnız Bakıda yox, həm də regionlarda keçirilir.

Prezident İlham Əliyevin regionlara son səfəri yeni idman oybektlərinin istifadəyə verilməsi baxımından da əlamətdardır. Masallıda taekvondo və boks mərkəzləri, Astarada Boks Mərkəzi istifadəyə verildi. Bu idman komplekslərinin hər birində yarışların və məşqlərin keçirilməsi üçün yüksək səviyyədə şərait yaradılıb. Binaların texniki təchizatı ən müasir standartlara cavab verir. Burada gənclərin idmanın digər növləri ilə məşğul olmaları üçün də imkanlar yaradılıb.

Azərbaycanın bütün bölgələrində müasir standartlara cavab verən diaqnostika mərkəzlərinin, xəstəxanaların, poliklinikaların tikilməsi, köhnə, yararsız vəziyyətdə olanların təmir edilməsi məqsədilə dövlət büdcəsindən vəsaitlərin ayrılması ölkəmizin məqsədyönlü sosial siyasətindən xəbər verir. 2013-cü ildə də bu istiqamətdə işlər uğurla davam etdirilib. Prezident İlham Əliyevin respublikanın bölgələrinə hər səfərində yeni səhiyyə obyektləri istifadəyə verilib. Bu il Cəlilabadda rayon mərkəzi xəstəxanasının inşası, Astarada və Lənkəranda isə mərkəzi xəstəxanaların yenidən qurulması başa çatdırılıb. Bu rayonlara səfər zamanı Prezident İlham Əliyev Cəlilabadda xəstəxananın açılışında iştirak edib, Astarada və Lənkəranda aparılan yenidənqurma işləri ilə tanış olub. Bu səhiyyə ocaqlarında xəstələrə yüksək səviyyədə tibbi xidmət göstərilməsi üçün hər cür şərait yaradılıb. Müasir tibbi avadanlıqlarla təchiz olunmuş bu tibb ocaqları ilk növbədə bir məqsədə - Azərbaycan əhalisinin sağlamlığının qorunması kimi mühüm missiyanın yerinə yetirilməsinə xidmət edir.

Regionlarda bütün sahələrdə olduğu kimi, uşaqların sosial müdafiəsinin gücləndirilməsinə, onların sağlam və xoşbəxt böyümələrinə də dövlət tərəfindən yüksək diqqət göstərilir. Cəlilabadda inşa olunan "Fidan" körpələr evi-uşaq bağçası bunun əyani təsdiqidir. Bu cür layihələr Azərbaycanda aparılan sosial siyasətin uğurlu və məntiqli nəticəsidir. 120 yerlik müasir tipli "Fidan" körpələr evi-uşaq bağçasında uşaqların təlim-tərbiyəsi və bacarıqlarının üzə çıxarılması üçün hərtərəfli şərait yaradılıb.

Yol-nəqliyyat infrastrukturunun inkişaf etdirilməsi də günümüzün aktual məsələlərindən biridir. Çünki yol həm də inkişaf, yüksəliş deməkdir. Son illərdə Bakıda və ölkənin hər yerində insanların rahatlığını təmin etmək, tıxacların qarşısını almaq üçün yol infrastrukturu tamamilə yenidən qurulub, mövcud yollar genişləndirilib və ya yeniləri çəkilib. Hazırda diqqət yetirilən əsas məsələlərdən biri regional əhəmiyyətli, o cümlədən kəndarası yolların yenidən qurulmasıdır. Prezident İlham Əliyevin səfəri zamanı Cəlilabadda Qarazəncir-Qarakazımlı-Bayxanlı, Astarada Ərçivan-Şuvi-Alaşa-Qapıçıməhəllə, Lənkəranda Lənkəran-Vilvan-Osaküçə-Türkəncil avtomobil yolunun, Yardımlıda isə Yardımlı-Deman-Arvana avtomobil yolunun 20 kilometrlik hissəsinin istifadəyə verilməsi də bunu təsdiq edir. Bu yollar 150 mindən artıq insanın yaşadığı 85 yaşayış məntəqəsini əhatə edir.

Gənclik hər bir xalqın gələcəyini və inkişaf yolunu müəyyənləşdirən, cəmiyyətin ictimai-siyasi həyatında yaxından iştirak edən aparıcı təbəqədir. Təsadüfi deyil ki, Azərbaycan dövlətinin qarşıya qoyduğu əsas vəzifələrdən biri hazırkı sürətli inkişaf proseslərinə gəncləri də cəlb etmək, onların bilik və bacarığından yararlanmaqdır. Bu reallığı nəzərə alan Azərbaycan dövləti gənclərə malik olduqları qabiliyyət və intellektual imkanlar müqabilində geniş meydan verməyin tərəfdarı kimi çıxış edir. Hazırda regionlarda inşa olunan gənclər mərkəzləri də bu məqsədə xidmət edir.

Qeyd edək ki, bu il ərzində dövlət başçısının səfər etdiyi rayonların bəzilərində gənclər mərkəzləri inşa olunub və istifadəyə verilib. Bu dəfə isə Lənkəran şəhərində Gənclər Mərkəzi istifadəyə verilib. Mərkəzin açılışında iştirak edən Prezident

İlham Əliyev burada cənub bölgəsinin ali məktəblərə builki qəbul imtahanlarında yüksək bal toplamış gəncləri ilə görüşüb. Mərkəzdə gənclərin müxtəlif tədbirlər keçirməsi, istirahəti, həmçinin əyləncəsi üçün imkanlar yaradılıb.

Prezident İlham Əliyev səfəri zamanı Salyan, Biləsuvar və Yardımlıda Heydər Əliyev Mərkəzinin açılışında, Masallıda isə Heydər Əliyev Mərkəzinin yenidənqurmadan sonrakı açılışında iştirak edib. Ulu öndər Heydər Əliyevin zəngin irsinin təbliğində və gələcək nəsillərə çatdırılmasında böyük rol oynayan bu mərkəzlər həm də yeniyetmə və gənclərin asudə vaxtlarının mənalı təşkili, müasir texnoloji yeniliklərlə yaxından tanış olmaları, biliklərinin artırılmasına və bacarıqlarının inkişaf etdirilməsinə yönələn kursların təşkili baxımından mühüm əhəmiyyət kəsb edir.

Dövlət başçısı Salyanda Bayraq meydanında yaradılan şəraitlə tanış olub, Dövlət Sərhəd Xidmətinin Lənkəran sərhəd dəstəsinin "Astara" dövlət sərhədində buraxılış məntəqəsinin, sərhəd komendantlığının və sərhəd zastavasının şəxsi heyəti üçün yeni inşa olunan yaşayış şəhərciyi, həmçinin sərhəd komendantlığı və sərhəd zastavasının əsaslı təmir olunmuş xidməti binalar kompleksinin və Masallıda Mədəniyyət Mərkəzinin əsaslı təmirdən sonrakı açılışında iştirak edib. Bütün bunlar Azərbaycanda həyata keçirilən quruculuq işlərinin çoxşaxəli olduğunu və insanların rahatlığına xidmət etdiyini göstərir.

Səfər zamanı Prezidentin iştirakı ilə Biləsuvar, Yardımlı və Masallıda Yeni Azərbaycan Partiyasının rayon təşkilatlarının, həmçinin Salyan və Biləsuvar rayon icra hakimiyyətlərinin yeni inzibati binalarının açılışı oldu. Yeni Azərbaycan Partiyasının rayon təşkilatları üçün müasir binaların tikilməsi ölkənin bu aparıcı siyasi təşkilatının regionlarda fəaliyyətinin daha da güclənməsinə, rayon icra hakimiyyətlərinin yeni inzibati binalarındakı ən müasir iş şəraiti isə onların işinin çevikliyinə, operativliyinə və yüksək idarəetmə mexanizmləri çərçivəsində qurulmasına xidmət edir.

Ümumilikdə Prezident İlham Əliyev 2 gün ərzində 7 rayona səfəri zamanı 27 sosial, iqtisadi, mədəni və inzibati infrastrukturun - 4 avtomobil yolunun, 3 xəstəxananın, 3 su xəttinin, 4 Heydər Əliyev Mərkəzinin, 3 idman mərkəzinin, YAP-ın 3 rayon təşkilatının və iki rayonun icra hakimiyyətinin yeni inzibati binalarının, həmçinin hərbçilər üçün yaşayış kompleksinin, Bayraq meydanının, körpələr evinin, gənclər və mədəniyyət mərkəzlərinin açılışında iştirak edib. Bu isə ondan xəbər verir ki, Azərbaycanın inkişaf dinamikasına uyğun olaraq cənub bölgəsinin də siması büsbütün dəyişib. Sürətli inkişaf bu bölgədəki bütün şəhər və kəndlərdə, qəsəbələrdə, ən ucqar yaşayış məskənlərində hiss olunur. Lakin əsas işlər hələ qabaqdadır. Ölkədə formalaşmış əlverişli iqtisadi mühit, həyata keçirilən uğurlu sosial-iqtisadi siyasət yaxın illərdə bütövlükdə Azərbaycanı dünyanın inkişaf etmiş ölkələri sırasına çıxaracaq.

Rəşad CƏFƏRLİ

Azərbaycan. - 2013.- 13 sentyabr.- S. 9.