Dövlət Miqrasiya Xidmətində qanunsuz miqrasiyanın qarşısının alınmasına həsr olunmuş seminar keçirilmişdir

Dövlət Miqrasiya Xidmətinin (DMX) Bakı Regional Miqrasiya İdarəsində "Qanunsuz miqrasiyanın qarşısının alınması və ona qarşı mübarizə" mövzusunda seminar təşkil edilmişdir.

DMX-nin mətbuat xidmətindən AzərTAc-a bildirmişlər ki, seminar Rumıniyanın Baş İmmiqrasiya Müfəttişliyindən, Niderland Krallığının İmmiqrasiya və Pasportların verilməsi İdarəsindən və Latviyanın Vətəndaşlıq və Miqrasiya Təşkilatından dəvət olunmuş ekspertlərin iştirakı ilə keçirilmişdir.

DMX-nin əməkdaşlarının, Xarici İşlər Nazirliyinin, Daxili İşlər Nazirliyinin və Dövlət Sərhəd Xidməti nümayəndələrinin də iştirak etdikləri seminarda qanunsuz miqrasiyanın qarşısının alınması və ona qarşı mübarizədə Avropa İttifaqı ölkələrinin müvafiq sistemləri, həmçinin hüquqi və institusional çərçivə, bu sahədə qurumlararası əməkdaşlığın aparılması istiqamətləri və təqdim edilən təkliflərin Azərbaycan Respublikasında tətbiqinin mümkünlüyü təhlil olunmuşdur.

Seminar çərçivəsində iştirakçılar ekspertlərin təqdimatları əsasında qanunsuz miqrasiyanın qarşısının alınması və ona qarşı mübarizə sahəsində hər üç ölkənin sistemləri ilə tanış olmuş, bu sahədə qurumlararası əməkdaşlıq istiqamətlərini öyrənmiş, geniş müzakirələr və fikir mübadiləsi aparmışlar.

Sonda iştirakçılara sertifikatlar təqdim olunmuşdur.

Tədbir Avropa İttifaqının Avropa Qonşuluq və Tərəfdaşlıq Aləti proqramı çərçivəsində maliyyələşən "Azərbaycan Respublikası Dövlət Miqrasiya Xidməti heyətinin professional inkişafına dəstək" Tvinninq layihəsi çərçivəsində həyata keçirilmişdir.

Qeyd edək ki, 2013-2015-ci illəri əhatə edən bu layihədə DMX-nin əsas tərəfdaşı Niderland Krallığı, digər tərəfdaşları isə Latviya və Rumıniya respublikalarıdır. Ümumilikdə layihə çərçivəsində miqrasiya sahəsindəki qanunvericilik, qanunsuz miqrasiyaya qarşı mübarizə, DMX-nin əməkdaşlarının professional inkişafı üçün təlim-tədris metodlarının inkişafı və ictimaiyyətin miqrasiya məsələləri barədə maarifləndirilməsi məqsədi ilə dörd istiqamət üzrə tədbirlərin keçirilməsi planlaşdırılır.

Azərbaycan. - 2013.- 14 sentyabr.- S. 3.