Abşeronlular təhsilə xüsusi diqqət yetirir

Abşeron rayonunda 34 tam və 2 orta məktəb fəaliyyət göstərir. Rayon üzrə şagird artımına nəzər salsaq görərik ki, respublikanın digər regionları ilə müqayisədə burada göstəricilər yüksəkdir. Abşeronda yeni salınmış yaşayış massivləri, əhalinin demoqrafiyası nəticəsində şagirdlərin sayı 76 sinif komplektində 1.656 nəfərə çatmışdır. Ötən il bəzi məktəblərdə dərslərin bir neçə növbədə keçirilməsi məcburiyyəti yaranmışdı. Bu il təhsil şöbəsi yaranan şagird sıxlığını normal hala gətirmək məqsədilə əməli tədbirlər görməkdədir.

Abşeronda məktəb tikintisi istiqamətində xeyli iş görülüb. Məhəmmədli kənd tam orta məktəbinin binası yararsız halda idi. Həmin binanın yerində 960 şagird yerlik yeni məktəb inşa edilmişdir. Xırdalan şəhər 1 və 7 saylı məktəblərdə əlavə tədris korpusları da tikilib. Son bir neçə ildə Abşeronda 15 məktəb binası, bəzi kənd məktəblərində əlavə sinif otaqları inşa olunaraq uşaqların istifadəsinə verilmişdir. Rayonun bütün təhsil ocaqlarında əsaslı təmir işləri görülmüş, avadanlıqlar alınmışdır. Məktəblərin istilik sistemləri yenilənmişdir.

Müasir dövr informasiya texnologiyalarına söykəndiyi üçün artıq rayon məktəblərində kompyuter şəbəkəsi mövcuddur. Yeni tikilən məktəblərin hamısı, demək olar ki, internetə qoşulub. Bəzi kənd məktəblərində hazırda bu istiqamətdə işlər görülməkdədir. Yeni dərs ilində rayonun məktəbləri internetdən tam istifadə edə biləcəklər.

Rayonda məktəb kitabxanalarında da vəziyyət ürəkaçandır. Kitabxanalar təmir edilərək dərs ləvazimatları, elmi və bədii ədəbiyyatlarla zənginləşdirilmişdir. Növbəti dərs ilində rayonun məktəb kitabxanalarına 98 adda 93.335 ədəd dərsliyin alınması planlaşdırılır. Bugünədək 43.189 ədəd dərslik artıq məktəblərə paylanmışdır.

Bu gün rayonun təhsil ocaqlarında idmana xüsusi diqqət yetirilir. Respublikada keçirilən bütün yarışlarda abşeronlular yüksək nəticələr göstərmiş, onlarca turnirin qalibi olmuşlar.

Məktəblərdə dərslərin normal qaydada keçirilməsi üçün fənn kabinetləri yenidən qurulub, laboratoriyalar müasir tədris cihazları ilə təmin edilib. Əyani dərs vəsaitləri hazırda təzə tikilən məktəblərdə tam təmin edilsə də, bəzi təhsil müəssisələrində bu istiqamətdə işlər hələ də davam edir.

Abşeron rayonunun məktəblərində 3.000-dən artıq müəllim çalışır. 3 məktəb "İlin məktəbi", 7 müəllim "İlin müəllimi", 18 nəfər "Əməkdar müəllim" adına, 9 nəfər isə "Tərəqqi" medalına layiq görülmüşdür. Ötən dərs ilində "İlin ən yaxşı müəllimi" müsabiqəsində rayonun pedaqoji heyətinin üzvü, Xırdalan şəhər 1 saylı tam orta məktəbin müəllimi Ülviyyə Musayeva qalib olmuşdur.

2012-2013-cü dərs ilində ümumtəhsil müəssisələrini 1.485 nəfər şagird bitirmişdir. Onlardan 1.461 nəfər tam orta təhsil haqqında attestat almış, 24 şagird isə dərslərdə mütəmadi iştirak etmədiyi üçün imtahanlara buraxılmamışdır. Ali məktəblərə bu il rayonun 1.102 məzunu sənəd vermiş, onlardan 672 nəfər tələbə adını qazanmışdır. Rayonun Ceyranbatan qəsəbə 2, Xırdalan şəhər 1, 2, 3, 5, 9, Masazır 2 və Fatmayı kənd tam orta məktəbləri ali təhsil ocaqlarına qəbul səviyyəsinə görə xüsusilə fərqlənmişdir. Bu il 500-dən artıq bal toplayanlar 58 nəfər olmuşdur. Əvvəlki illərdən fərqli olaraq, 2012/2013-cü tədris ilində 600-dən çox bal toplayan məzunların sayı da artmışdır. 16 nəfər gənc yüksək balla arzuladıqları ali məktəblərə qəbul olunmuşdur. Rəşad Nəzərəliyev (677), Aygün Hüseynova (668), Gülnur Atakişiyeva (657), Güləndam Cəbiyeva (650) və digərləri təkcə öz ailələrinə deyil, bütün abşeronlulara sevinc bəxş etmişlər.

Xaricdə təhsil alan gənclərlə bağlı rayon təhsil şöbəsində xüsusi proqram hazırlanıb. Həmin gənclərlə mütəmadi görüşlər keçirilir.

Rayon təhsil şöbəsində əldə edilən nailiyyətlərlə yanaşı, ortaya çıxan problemlər də araşdırılır və onların həlli istiqamətində ciddi işlər aparılır.

Təhsil gələcəyimizdir. Abşeronda bu sahəyə xüsusi diqqət verilir. Məhz bu diqqət və qayğı nəticəsində əldə edilən uğurların da sayı artır.

Akif ƏLİYEV

Azərbaycan. - 2013.- 14 sentyabr.- S. 8.