Bakı şəhəri üzrə 700 bal toplayan yeganə tələbə mükafatlandırıldı

Nərimanov rayonu ötən tədris ilini yüksək nailiyyətlərlə başa vurdu

Dünən Nərimanov Rayon İcra Hakimiyyətində yüksək nəticələr əldə edərək ali təhsil müəssisələrinə qəbul olunmuş tələbələrlə görüş keçirildi, rayonun təhsil müəssisələrinin 2012/2013-cü tədris ilində qazandığı uğurlar qeyd olundu.

Tədbirdə çıxış edən Nərimanov Rayon İcra Hakimiyyətinin başçısı Abdin Fərzəliyev bütün təhsil işçilərini qarşıdan gələn Bilik Günü münasibətilə təbrik edərək bildirdi ki, müasir dünyada hər bir ölkənin gələcəyi təhsilin səviyyəsi ilə ölçülür. Ölkəmizdə son illərdə təhsilin inkişafı ilə bağlı həyata keçirilən tədbirlər onu deməyə əsas verir ki, Azərbaycan öz gələcəyini daha etibarlı və inamlı görmək əzmindədir. Dövlət başçısı cənab İlham Əliyevin təhsilin inkişafına və təhsil müəssisələrinə göstərdiyi diqqət və qayğı təsdiqləyir ki, bu məsələ son dövrlərdə dövlət siyasətinin mühüm istiqamətidir.

Azərbaycan təhsilinin beynəlxalq standartlara uyğunlaşdırılması üçün son dövrlər ölkədə xeyli iş görüldüyünü qeyd edən A.Fərzəliyev dedi ki, Prezident İlham Əliyevin diqqət və qayğısı sayəsində Azərbaycanda "qara qızıl"ın insan kapitalına çevrilməsi çağırışı uğurla həyata keçirilməkdədir. Bu sahədə Heydər Əliyev Fondunun fəaliyyətindən söz açan icra başçısı fondun prezidenti, UNESCO və ISESCO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilən proqram və layihələrin ölkəmizdə təhsilin inkişafına böyük töhfələr verdiyini qeyd etdi. Bildirdi ki, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində, demək olar ki, rayonun bütün təhsil müəssisələrində əsaslı təmir və yenidənqurma işləri həyata keçirilmişdir. Son 10 ildə rayonda fəaliyyət göstərən 22 tam orta məktəbdən 11.892 şagird yerlik 15 məktəb əsaslı təmir olunmuş, 6 məktəb üçün 97 əlavə sinif otağı tikilib istifadəyə verilmişdir. Onlardan 14 məktəb dövlət proqramına müvafiq olaraq əsaslı təmir olunmuş, 5 məktəbdə əlavə tədris korpusları inşa edilmişdir.

Qazanılan uğurların ali məktəblərə qəbulun dinamikasında, yüksək bal toplayan tələbələrin sayının artmasında özünü göstərdiyini vurğulayan Abdin Fərzəliyev dedi ki, 2012/2013-cü tədris ilində məktəbi bitirmiş 1.722 məzundan 1.487 nəfər ali məktəblərə sənədlərini vermiş, bunlardan 993 nəfər, yəni 66,7 faizi müxtəlif ali təhsil müəssisələrinə qəbul olunmuşdur. Nərimanov rayonu üzrə orta bal göstəricisinə görə ən yüksək nəticəni - 93,88 faizi 291 nömrəli Ekologiya liseyi qazanmışdır. 207 nömrəli tam orta məktəbdə bu göstərici 74 faiz, 43 nömrəli Məktəb-Lisey Kompleksində isə 67 faizdir. Rayonun tam orta məktəblərini bitirmiş məzunlardan 57 nəfər 600-dən, 18 nəfər isə 650-dən artıq bal, 258 nömrəli tam orta məktəbin məzunu Məhəmməd İsmayılov isə ən yüksək - 700 bal toplamışdır. Qeyd etmək lazımdır ki, ali məktəblərə qəbul imtahanlarında respublika üzrə 4 nəfər 700 bal toplamışdır, onlardan da yalnız bir nəfəri Bakı şəhəri məktəblisi olmuşdur ki, o da Nərimanov rayonunun şagirdi Məhəmməd İsmayılovdur.

Görüşdə Milli Məclisin deputatı Adil Əliyev bildirdi ki, müasir dünya bilik və informasiya dövrüdür. Hazırkı dövrdə o dövlətlər irəli gedir ki, insanlara yaxşı bilik verirlər. Bu baxımdan ölkəmizdə həyata keçirilən təhsil siyasətini yüksək qiymətləndirməli, hər kəs yaradılan şəraitdən istifadə etməlidir.

Daha sonra çıxış edən 258 nömrəli tam orta məktəbin məzunu, ən yüksək nəticəni göstərərək Azərbaycan Respublikası Prezidenti yanında Dövlət İdarəçilik Akademiyasına daxil olan Məhəmməd İsmayılov minlərlə abituriyentin arzusu olan 700 bal zirvəsinə qalxmağı bacardığına görə fəxr etdiyini dedi: "Bu da mənim ən böyük uğurum, sonsuz sevincim oldu. Qazandığım bu uğurda valideyn və müəllimlərim böyük paya sahibdirlər. Qarşıda çox məsuliyyətli tələbəlik illəri dayanır. Orta məktəbdə mənə dərs demiş müəllimlərimin hamısı əmin ola bilər ki, ali məktəbdə də öz yüksək biliyim, nümunəvi davranışımla onların başını uca edəcəyəm".

Sonda rayon icra hakimiyyəti adından yüksək adlara layiq görülmüş müəllimlərə, təhsilin və tədrisin yüksək səviyyəsinə görə fərqlənmiş təhsil müəssisələrinin rəhbərlərinə, habelə təhsildə fərqlənmiş, qəbul imtahanlarında yüksək nəticələr əldə edərək ali məktəblərə qəbul olunmuş məzunlara diplom və hədiyyələr təqdim edildi.

Elçin CƏFƏROV

Azərbaycan. - 2013.- 14 sentyabr.- S. 8.