Budapeştdə Azərbaycan xalqının ümummilli lideri Heydər Əliyevin 90 illik yubileyinə həsr edilmiş bayram konserti keçirilmişdir

Budapeştin mərkəzindəki tarixi "Korintiya" zalında Azərbaycan xalqının ümummilli lideri Heydər Əliyevin anadan olmasının 90 illik yubileyinə həsr edilmiş təntənəli bayram konserti keçirilmişdir.

Heydər Əliyev Mərkəzinin, Azərbaycan Respublikasının Macarıstandakı səfirliyinin və "Art Prodakşn" şirkətinin birgə təşkilatçılığı ilə reallaşan konsertdə Budapeştin "Dunay" Simfonik Orkestri Azərbaycan bəstəkarlarının əsərlərindən ibarət zəngin proqramla çıxış etmişdir.

Konsertin əvvəlində iştirakçılara ulu öndər Heydər Əliyevin həyat yolu, Azərbaycan dövlətçiliyinin qurulmasında və möhkəmləndirilməsində misilsiz xidmətləri, xalqın siyasi, iqtisadi və mədəni həyatına əvəzsiz töhfələri haqqında ingilis və macar dillərində geniş məlumat verilmişdir.

Xalq artisti Rauf Abdullayevin dirijorluğu ilə "Dunay" Simfonik Orkestri Niyazinin "Rast" simfonik muğamını, Qara Qarayevin "Yeddi gözəl" baletindən parçaları, Fikrət Əmirovun "Azərbaycan kapriççiosu"nu böyük məharətlə ifadə etmişdir. İstedadlı vokalçılar Səidə Şərifəliyevanın və Samir Cəfərovun ifasında Azərbaycan və Avropa klassik operalarından səslənən ariyalar böyük maraqla qarşılanmışdır.

Diplomatik korpus təmsilçiləri, Macarıstanın sənət adamları və çoxsaylı musiqi pərəstişkarları Heydər Əliyev ideyalarının və Azərbaycan-macar xalqlarının dostluğunun rəmzinə çevrilən təntənəli bayram konsertini yüksək dəyərləndirmiş və virtuoz ifaçıları dəfələrlə ayaq üstə alqışlamışlar.

Pərvanə QARAYEVA,

AzərTAc-ın xüsusi müxbiri

Budapeşt

Azərbaycan. - 2013.- 14 sentyabr.- S. 11.