Avropa Milli Kitabxanaları Konfransının

 prezidenti Mədəniyyət və Turizm Nazirliyində

 

Sentyabrın 23-də Avropa Milli Kitabxanaları Konfransının prezidenti, Fransa Milli Kitabxanasının rəhbəri Bruno Rasine Mədəniyyət və Turizm Nazirliyində olmuşdur.

AzərTAc xəbər verir ki, mədəniyyət və turizm naziri Əbülfəs Qarayev Avropa Milli Kitabxanaları Konfransının Mirzə Fətəli Axundzadə adına Azərbaycan Milli Kitabxanasına göstərdiyi diqqəti yüksək qiymətləndirmişdir. Azərbaycan və Fransa Milli kitabxanaları arasında qarşılıqlı əməkdaşlığa dair razılaşmanı xatırladan nazir, bu işdə göstərilən dəstəyə görə Bruno Rasineyə təşəkkürünü bildirmişdir.

Əbülfəs Qarayev diqqəti milli kitabxanalar arasında əməkdaşlıqla yanaşı, Azərbaycanın Fransa ilə mədəni əlaqələrinə də cəlb etmişdir. Bildirmişdir ki, Fransada ölkəmizin mədəniyyət, incəsənət xadimlərinin iştirakı müxtəlif mərasimlər, sərgilər, konsertlər və digər tədbirlər keçirilir. Bu tədbirlərin təkcə UNESCO-nun xətti ilə təşkil olunmadığını deyən nazir Azərbaycan mədəniyyətinin Fransada təbliğində ölkəmizin birinci xanımı Mehriban Əliyevanın  rəhbərlik etdiyi Heydər Əliyev Fondunun fəaliyyətini xüsusilə vurğulamışdır.

Azərbaycanda kitabxana sahəsində görülmüş işlərdən danışan nazir diqqətə çatdırmışdır ki, Prezident İlham Əliyevin müvafiq sərəncamı ilə "Azərbaycan Respublikasında kitabxana - informasiya  sahəsinin 2008-2013-cü illərdə inkişafı üzrə Dövlət Proqramı" təsdiq olunmuşproqramda nəzərdə tutulan vəzifələr uğurla yerinə yetirilmişdir. Bu gün respublikamızın paytaxtında, eləcə də regionlarımızın iri şəhərlərində yüksək texnologiyalarla təchiz edilmiş kitabxanalar fəaliyyət göstərir.

Nazir Bakıda keçirilən möhtəşəm tədbirlərdə iştirakına görə Bruno Rasineyə təşəkkürünü bildirmişdir.

Avropa Milli Kitabxanaları Konfransının prezidenti Bruno Rasine müvafiq konfransın növbəti toplantısının Bakıda keçirilməsinin əhəmiyyətindən danışmış, kitabxanalar arasında əlaqələrin bundan sonra da davam edəcəyini demişdir.  Görüşdə əməkdaşlığın perspektivlərinə dair fikir mübadiləsi aparılmışdır.

 

Azərbaycan.-2013.-  24 sentyabr.- S.2.