Azərbaycan mətbəxi nümunələrinin
təqdimatı fransızlarda maraq
oyatmışdır
Parisdə fəaliyyət göstərən "Azərbaycan evi" "Avropa və Şərq evi" ilə əməkdaşlıq çərçivəsində "Dilçilik və kulinariya emalatxanası" adı altında keçirilən festivalda iştirak etmişdir. Bu layihənin əsas məqsədi fransız ictimaiyyətinə təqdim olunan dilləri milli mətbəx vasitəsilə tanıtmaqdır. Ölkəmizi layiqincə təmsil edən "Azərbaycan evi"nin üzvləri fransızları zəngin mətbəximizin nümunələrindən olan dovğa və kükünün hazırlanması qaydaları ilə yaxından tanış etmişlər.
"Azərbaycan evi"nin sədri Mirvari Fətəliyeva rəhbərlik etdiyi təşkilatın fəaliyyəti, Azərbaycan dili, onun tarixi və milli mətbəximiz barədə təqdimat iştirakçılarına ətraflı məlumat vermişdir.
Sonra yeməklərin hazırlanması qaydaları izah olunmuşdur. Hazırlıq əsasında yalnız xörəklərin bişirilməsi qaydası deyil, eyni zamanda, Azərbaycan xalqının adət-ənənələri haqda geniş məlumat verilmiş, reseptdə işlədilən sözlər və qaydalar izah olunmuşdur. "Azərbaycan evi"nin üzvlərinin təqdimatı iştirakçılar arasında xüsusi maraq doğurmuş və onlar dovğa və kükünün hazırlanmasında yaxından iştirak etmiş, dilimiz və mətbəximiz barədə çoxlu suallar vermişlər.
Xaricdə
Yaşayan Azərbaycanlılarla İş üzrə Dövlət
Komitəsinin dəstəyi sayəsində "Azərbaycan
evi" bu tədbirdə iştirak etmişdir.
Əsgər
ƏLİYEV,
AzərTAc-ın xüsusi müxbiri
Paris
Azərbaycan.-2013.- 28 sentyabr.- S.12.