Sumqayıt texnoparkı qeyri-neft sektorunun flaqmanına çevrilir

Sumqayıt Texnologiyalar Parkı ölkəmizin qeyri-neft sektorunda yeni yaradılan nəhəng sənaye kompleksidir. Burada 25 iri və orta müəssisə fəaliyyət göstərir. Həmin müəssisələrdə dünyada mövcud olan son texnologiya və avadanlıqlardan istifadə edilir.

Bu da dünya standartlarına uyğun məhsul istehsalına imkan verir. Keyfiyyətli və münasib qiyməti olan məhsulun isə bazarda həmişə müştərisi olur. Elə buna görə də texnoparkda istehsal olunan məhsullara çoxlu sifariş gəlir.

Yeni sənaye nəhəngində müxtəlif kabellər, transformatorlar, yüksək gərginlikli avadanlıqlar, hidroturbinlər, su nasosları, elektrik mühərrikləri, borular, texniki qazlar istehsal edilir. Texnoparkın fəaliyyəti sayəsində ölkəmizdə qeyri-neft sektorunda məhsul istehsalının artması ilə yanaşı, yüzlərlə insan işlə təmin olunub.

Burada çalışan işçilər üçün əlverişli əmək şəraiti yaradılıb. Texnoparkda çalışanlar yüksək əməkhaqqı almaqla bərabər, xidməti geyimlə, hər gün isti yeməklə təmin olunur, evdən işə, işdən evə müəssisənin ayırdığı avtobuslarla gedib-gəlir, onların sağlamlıqları peşəkar tibb personalı tərəfindən qorunur.

Fotomüxbirimiz Ağaəli Məmmədov bu şəkilləri də həmin texnoparkda çəkib.

Azərbaycan.-2013.- 9 yanvar.- S.1.