«Los-Angeles Times» yazır: «Dağlıq Qarabağ: köhnə münaqişə nə həll edilmiş, nə də unudulmuşdur»

ABŞ-ın "Los-Angeles Times" qəzetində analitik Karol Villiamsın "Dağlıq Qarabağ: köhnə münaqişə nə həll edilmiş, nə də unudulmuşdur" sərlövhəli məqaləsi dərc olunmuşdur.

Məqalədə bildirilir ki, Ermənistan ilə Azərbaycan arasında atəşkəs əldə edilməsinə baxmayaraq, son 19 ildə Dağlıq Qarabağ bölgəsi boyunca cəbhə xəttində snayperlərdən istifadə hallarına tez-tez rast gəlinir. Son vaxtlarda isə dünyanın ən qaynar nöqtəsində təxribat xarakterli atışmaların sayı daha da artmışdır.

Müəllif qeyd edir ki, Ermənistanda keçiriləcək prezident seçkiləri və Suriyadan didərgin düşmüş ermənilərin münaqişə bölgəsində məskunlaşdırılması qəzəbi daha da alovlandırmış və kəskin toqquşmaların ola biləcəyi ilə bağlı narahatlıq artmışdır. 1991-1994-cü illərdə baş vermiş müharibədə təxminən 30 min nəfər həlak olmuş və bir milyon insan doğma yurdlarından didərgin düşmüşdür. ABŞ, Rusiya və Fransa münaqişənin həlli istiqamətində danışıqları üzərlərinə götürmüşlər. Bu münaqişə ilə yaxından tanış olanlar problemin uzanmasını tərəflərdən heç birinin hazırkı status-kvonu qəbul etməməsi ilə əlaqələndirirlər. Eyni zamanda, tərəflərdən heç biri münaqişənin həlli üçün güzəştə getmir.

Karol Villiams Beynəlxalq Böhran Qrupunun Cənubi Qafqaz məsələləri üzrə direktoru Lourens Şitsə istinad edərək yazır ki, bu region təkcə enerji üçün deyil, həm də yüklərin nəqli və digər məsələlər baxımından olduqca əhəmiyyətli marşrutdur. Azərbaycan və Ermənistan 20 ildən artıqdır ki, müharibə vəziyyətindədir. Atəşkəs əldə olunmasına baxmayaraq, əgər münaqişə yenidən alovlansa, özü ilə birlikdə əhəmiyyətli regional qüvvələrin daxil olduğu müharibənin yaranmasına gətirib çıxaracaqdır.

Məqalədə qeyd edilir ki, ABŞ neft şirkətləri Azərbaycana irimiqyaslı sərmayələr yatırmışdır. Bu ölkənin, eyni zamanda, Ermənistan ilə də sıx əlaqələri vardır. ABŞ-da çoxlu sayda erməni yaşayır.

Münaqişənin uzanmasının nə Azərbaycana, nə də Ermənistana heç bir şey qazandırmadığını yazan müəllif problem həll edilməyənə qədər təhlükənin mövcud olacağını bildirir.

Karol Villiams Azərbaycan Xarici İşlər Nazirliyinin sözçüsü Elman Abdullayevə istinadən yazır ki, bölgədəki demoqrafik vəziyyəti dəyişmək üçün suriyalı erməni qaçqınların Dağlıq Qarabağ ərazisinə yerləşdirilməsi cəhdi Ermənistanın təxribat xarakterli hərəkətidir.

Məqalədə "Rand" Korporasiyasının Beynəlxalq Təhlükəsizlik və Müdafiə Siyasəti Mərkəzinin direktoru Olqa Olikerdən də sitat gətirilərək bildirilir ki, Azərbaycan torpaqlarının Ermənistan tərəfindən işğalı ilə bağlı status-kvo heç kim tərəfindən qəbul edilmir. Lakin heç kim də problemin həlli yolunu tapa bilmir.

Müəllif yazıda qədim Azərbaycan şəhəri Şuşada dağıdılmış binalardan birinin fotoşəklini də vermişdir. Şəkilaltı mətndə yazılır ki, erməni uşaqlar 1991-1994-cü illər müharibəsində dağıdılmış Şuşanın xarabalıqlarında oynayırlar.

Azərbaycan.-2013.- 18 yanvar.- S.2.