Azərbaycanın mötəbər beynəlxalq tədbirlərə ev sahibliyi etməsi onun etibarlı tərəfdaş olduğunu sübut edir

Azərbaycanda səfərdə olan Koreya Respublikası Milli Assambleyasının nümayəndə heyəti yanvarın 18-də Milli Məclis sədrinin müavini Valeh Ələsgərovla görüşmüşdür.

V.Ələsgərov demişdir ki, Azərbaycan ilə Koreya arasındakı münasibətlər bütün sahələr üzrə inkişaf edir. Deputatların qarşılıqlı səfərləri əlaqələrin daha da genişlənərək keyfiyyətcə yeni mərhələyə keçməsində mühüm rol oynayır.

Bildirilmişdir ki, son illər daha sürətlə inkişaf edən Azərbaycan, neft-qaz istehsalını artırmaqla yanaşı, karbohidrogenlərin dünya bazarlarına çıxarılmasına da nail olunmuşdur. İndi Azərbaycan Avropanın enerji təhlükəsizliyində mühüm rol oynayır. Neft və qazdan başqa alternativ enerji mənbələrindən də səmərəli istifadə olunur. Azərbaycanda külək və günəş enerjisinin tətbiqi istiqamətində işlər görülür, bu sahənin inkişafı üçün xüsusi dövlət agentliyi yaradılmışdır.

Azərbaycanda kənd təsərrüfatı da dinamik inkişaf edir. Artıq ölkəmiz tam şəkildə özünü ərzaq məhsulları ilə təmin edir.

V.Ələsgərov Azərbaycanın dinamik inkişafına maneə olan, eləcə də regionun və Avropanın təhlükəsizliyinə ciddi təhdid olan Dağlıq Qarabağ münaqişəsi barədə qonaqlara ətraflı məlumat vermiş, Ermənistanın işğalçılıq siyasətinin ağır nəticələrindən danışmış, problemin həlli ilə bağlı BMT Təhlükəsizlik Şurasının, Avropa Şurasının, ATƏT və digər nüfuzlu beynəlxalq təşkilatların qəbul etdiyi qərar və qətnamələri diqqətə çatdırmışdır.

Koreya Milli Assambleyasının üzvü Co Ho Younq Azərbaycanda onlara göstərilən qonaqpərvərliyə görə minnətdarlıq etmişdir. Bildirmişdir ki, hələ tələbəlik illərində Azərbaycana aid kitablar oxumuş, xalqımızın zəngin mədəniyyəti və milli dəyərləri ilə tanış olmuşdur.

Ötən il Bakıda "Eurovision-2012" mahnı müsabiqəsinin uğurla keçirildiyini xatırlayan qonaq demişdir ki, Azərbaycanın 2015-ci ildə ilk Avropa Olimpiya Oyunlarına ev sahibliyi etməsi və digər müsbət amillər Azərbaycanın inkişafının beynəlxalq ictimaiyyət tərəfindən də qəbul olunduğunu və onun etibarlı tərəfdaş olduğunu sübut edir.

Co Ho Youq Azərbaycan ilə Koreya arasında neft-qaz, kənd təsərrüfatı, kiçik və orta biznes sahələrində qarşılıqlı əlaqələr qurulmasının səmərəli nəticələr verəcəyinə əminliyini ifadə etmişdir.

Görüşdə qarşılıqlı maraq doğuran digər məsələlər də müzakirə olunmuşdur.

AzərTAc

Azərbaycan.-2013.- 19 yanvar.- S.3.