«Freedom House»nin qərəzliliyini digər dövlətlər
də sübuta yetiriblər
Dünyada tanınmayan separatçı bir rejimi necə qismən azad ölkə kimi səciyyələndirmək
olar?
Son illər sürətlə
inkişaf edən Azərbaycanda həyatın bütün sahələrində
əsaslı dəyişikliklər baş verir. Ölkəmizdə
həyata keçirilən məqsədyönlü siyasət
respublikamızın 2012-ci ili bütün makroiqtisadi göstəricilər
üzrə dünyada yüksək inkişaf templəri ilə
başa vurmasına səbəb olub. Azərbaycan öz iqtisadi
yüksəliş göstəricilərinə görə
hazırda dünya miqyasında ən sürətlə
inkişaf edən ölkələr sırasında
öncül mövqedə qərar tutur. Ölkədə
demokratikləşmə, insan hüquq və
azadlıqlarının təsbit edilməsi istiqamətində
həyata keçirilən ardıcıl dövlət siyasətinin
mühüm tərkib hissələrindən biri, fikir və mətbuat
azadlığının təmin edilməsi, kütləvi
informasiya vasitələrinin sərbəst fəaliyyəti və
inkişafı üçün münbit şəratin
yaradılması, bu sahədə olan bütün maneələrin
tamamilə aradan qaldırılmasıdır.
Lakin
yenə də bəzi qüvvələr Azərbaycanın bu
yüksəlişinə qısqanclıqla yanaşır,
dövlətimizə qarşı çirkin kampaniyalar
aparırlar. "Freedom House", "Human Rights Watsh",
"Amnistey İnternational" kimi subyektiv məqsədlərə
xidmət göstərən təşkilatlar isə Azərbaycana
qarşı aparılan qərəzli kampaniyaların fəal
iştirakçıları qismində çıxış
edirlər. "Freedom House" son hesabatında Azərbaycanı
yenidən "azad olmayan" ölkələr
siyahısına salıb. Hesabatda Azərbaycan, İran və
Rusiya "azad olmayan" ölkələr sırasında yer
alarkən Ermənistan "qismən azad" ölkə olaraq
göstərilib. Ən qəribəsi odur ki, "Freedom
House"nin hesabatında Azərbaycanın
Dağlıq Qarabağ bölgəsində Ermənistanın
işğalı nəticəsində yaradılmış
qondarma "Dağlıq Qarabağ Respublikası" "qismən
azad" olaraq qeyd olunub.
Bu
durum isə ölkəmizdə birmənalı
qarşılanıb. Hesabatla bağlı öz fikir və rəylərini
açıqlayan siyasətçilər adı çəkilən
qurumun qərəzli olduğunu vurğulayıblar.
Yeni
Azərbaycan Partiyasının sədr müavini-icra katibi,
Milli Məclisin deputatı Əli ƏHMƏDOV bildirib ki,
sözügedən təşkilatın tanınmamış
"Dağlıq Qarabağ" rejimini öz siyahısına
salmağı həm "obyektivliyinin", həm də Azərbaycana
münasibətinin göstəricisi hesab oluna bilər: "Biz
dəfələrlə bir sıra beynəlxalq təşkilatların
hesabatlarının qərəzli olması barədə fikirlər
bildirmişik. Belə təşkilatlardan biri də "Freedom
House" təşkilatıdır. Təkcə Azərbaycan
deyil, digər dövlətlər də tez-tez onun
hazırladığı hesabatların qeyri-obyektivliyini
sübuta yetiriblər. Bu təşkilatın Azərbaycana
qarşı qərəzli mövqeyi çoxdan məlumdur. Səbəbləri
haqqında indi danışmaq bəlkə də yerinə
düşmür. Lakin fakt faktlığında qalır".
Əli
Əhmədovun sözlərinə görə, separatçi
bir rejimi azadlıq şkalası üzrə necə qiymətləndirməsindən
asılı olmayaraq, təkcə bu faktın özü kifayətdir
ki, bu təşkilatın mahiyyəti haqqında insanda bitkin
fikir formalaşsın. YAP sədrinin müavini qeyd edib ki,
qondarma "Dağlıq Qarabağ" rejimini dünyanın
heç bir dövləti, heç bir ciddi beynəlxalq təşkilat
tanımır və tanımaq istəmir. Belə olan halda,
"Freedom House" təşkilatının onu "qismən
azad ölkə" kimi səciyyələndirməsi təəccüb
doğurmaya bilməz: "Hesab edirəm ki, belə bir
yanaşma onun obyektivliyini ciddi şübhə altına
almağa kifayət qədər əsaslar verir. "Freedom
House"nin hesabatında "Dağlıq
Qarabağ"ın ayrıca qurum kimi göstərilməsi
separatizmə, etnik təmizləməyə və
işğala haqq qazandırmaq cəhdi kimi də qiymətdəndirilməlidir.
Bu cür cəhdlər BMT və ATƏT-in Ermənistan-Azərbaycan,
Dağlıq Qarabağ münaqişəsinin nizama
salınması üzrə səylərinə əngəl
yaradır, bölgədə gərginliyin və
qarşıdurmanın daha da güclənməsinə xidmət
göstərir. Azərbaycan ictimaiyyəti həmişə
haqlı olaraq qərəzli beynəlxalq təşkilatların
qeyri-obyektiv dəyərləndirmələrinə
etirazlarını bildirib. İnanıram ki,
"Freedom House"nin son hesabatı
xalqımızın qəti
etirazı üçün
daha ciddi əsas verir. Yeri gəlmişkən, onu da bildirmək istəyirəm ki, bəzən müxalifətin
ifrat radikal qanadı ölkəmizə
qara yaxan qərəzli təşkilatların
təbliğatçısı rolunu məmnuniyyətlə
öz üzərinə
götürür. Mən bunu
siyasi mübarizənin
iyrənc forması sayıram. Qondarma "Dağlıq Qarabağ" rejimini öz qərəzli və qeyri-obyektiv hesabatına salmaqla əslində, onu tanıyan bir təşkilatın mövqeyini
dəstəkləmək milli
maraqları tapdalamaqdan
başqa bir şey deyildir".
Yeni Azərbaycan Partiyasının
(YAP) icra katibinin müavini, Milli Məclisin deputatı Mübariz QURBANLI isə qeyd edib ki,
"Freedom House" adlanan qurum
hər dəfə hesabatlarında Azərbaycana
qarşı açıq
şəkildə qərəzli
mövqe nümayiş
etdirir. "Freedom House" təşkilatının illik
"Dünyada azadlıq"
hesabatını diqqətlə
təhlil edən hər bir şəxs
bu qərəzi aydın şəkildə
görə bilər. Onun sözlərinə görə, "Freedom House" təşkilatının işğal
olunmuş Azərbaycan
ərazilərində işğalçı
Ermənistan tərəfindən
yaradılmış separatçı
Dağlıq Qarabağ
rejimini hesabatında qismən azad ərazilər siyahısına
daxil etməsi ən böyük qəbahətdir, beynəlxalq
hüququn norma
və prinsiplərinə,
qəbul edilmiş qaydalara ziddir. Deputat hesab edir ki,
"Freedom House" bununla qondarma,
işğalçı, birbaşa
Ermənistan silahlı
qüvvələrinin nəzarətində
olan rejimi qismən azad ərazi kimi göstərməsi çox
gülüncdür və
qırmızı xətti
keçən bir hərəkətdir". YAP rəsmisi vurğulayıb
ki, Dağlıq Qarabağ deyilən və işğal altında olan bu ərazidə faktiki olaraq quldur bir rejim
var: "Bu rejim Dağlıq Qarabağdakı
erməni əhalini də təhdid altında saxlayır. Burada insan haqlarından və azadlıqlarından
danışmaq olmaz.
Bu ərazi faktiki
olaraq Ermənistanın
işğalçı rejiminin
və onu himayə edən dairələrin bir poliqonudur, narkotik istehsal edən, quldurluqla məşğul
olan, kriminallaşmış
bir ərazidir. Buradakı hərbi qüvvələr
birbaşa Yerevana tabedir. Burada yaradılmış oyuncaq rejimin başında duranların
da hamısı, demək olar ki, hərbi cinayətkarlar, vaxtilə azərbaycanlılara qarşı
cinayətlərdə iştirak
etmiş şəxslərdir".
Deputat hesab edir ki, təşkilatlar
üzrə azadlıqlar
indeksini müəyyənləşdirsək,
bu təşkilatın
özü mənfilər
sırasında dayanacaq:
"Heç bir halda bu təşkilat
obyektiv hesabat vermir. Bu təşkilat
o qədər ermənipərəst
mövqedən çıxış
edir ki, Ermənistan kimi bir rejimi də
qismən azad ölkələr sırasına
daxil edib. Ermənistanın isə hansı
şəraitdə olduğu
hamıya bəllidir.
Hətta
Türkiyəni Ermənistandan
aşağı səviyyədə
göstərmək istəyir.
Ona görə də hər bir azərbaycanlı
"Freedom House" kimi təşkilatlara
qarşı mövqe bildirməli, onun qərəzini ifşa etməlidir. Onlar, xüsusən,
xarici KİV-də ifşa olunmalıdır".
Onun fikrincə, Azərbaycanı
Ermənistandan aşağı
səviyyədə göstərmək
heç bir müqayisəyə gəlmir.
Ermənistanda, ümumiyyətlə, dövlətin olduğunun
özünü qəbul
etmək hətta anormaldır. Ermənistan
tam kriminallaşmış bir
rejimdir və əhali bu ölkədən
qaçıb gedir:
"Həmin hesabatda islamofobiya, eyni zamanda, xristian həmrəyliyi, Azərbaycana
və inkişaf edən islam ölkələrinə qarşı
təzyiq və təhdid özünü açıq şəkildə
göstərir. Ona görə də
"Freedom House" kimi təşkilatların
özünü azad təşkilat hesab etmirik və bu cür informasiyaları
qətiyyətlə pisləyir
və bunları Azərbaycana qarşı
"qara piar" kampaniyasının tərkib
hissəsi hesab edirik". Mübariz .Qurbanlı onu
da əlavə edib ki, Azərbaycan
belə hesabatlardan narahat deyil və
onlar nə Azərbaycanın inkişafını
ləngidəcək, nə
də buna hansısa maneələr törədəcək.
Milli Məclisin Təhlükəsizlik
və müdafiə komitəsinin sədri Aydın MİRZƏZADƏ isə
hesab edir ki, "Freedom House"nin Azərbaycanın işğal
olunmuş Dağlıq
Qarabağ ərazisini
"qismən azad"
ərazi kimi ayrıca qeyd etməsi beynəlxalq hüquq normalarını ələ salmaq cəhdidir. Deputat bu təşkilatın sonuncu hesabatında Azərbaycanı yenidən
"azad olmayan" ölkə kimi qələmə verməsinin
qeyri-obyektiv olduğunu
bəyan edib:
"Freedom House"nin
yerləşdiyi ABŞ dövləti
Azərbaycanın ərazi
bütövlüyünü tanıyır, lakin həmin təşkilat işğal olunmuş zonanı ayrıca ərazi kimi göstərir. İldən-ilə "Freedom House" təşkilatı
dünya ictimaiyyətinə
özünü beynəlxalq
hüququ tanımayan,
dövlətlər haqqında
mənfi rəy yaratmağa çalışan
bir struktur kimi göstərir. Tək Azərbaycanla bağlı
deyil, digər ölkələrə münasibətdə
də ifrata varmış, həqiqətə
uyğun olmayan informasiyalar bu təşkilatın artıq
vizit kartına çevrilib".
Onun sözlərinə görə,
Azərbaycanda demokratiya,
insan hüquqları ilə bağlı çoxsaylı işlərin
görüldüyü halda,
onu ən aşağı kateqoriyaya
salmaq "Freedom House"nin hesabat təsisçilərinin ümumiyyətlə
hüquqdan və demokratiyadan anlayışının
olmadığını göstərir.
Sanki bu təşkilat
beynəlxalq ictimaiyyətlə
üz-üzə durmaq
məqsədini daşıyır:
"Bu qurumun məqsədi
hansısa bir dövləti, orada gedən proseslərdən
asılı olmayaraq qaralamaq və dünya ictimaiyyətində
mənfi rəy yaratmaqdan ibarətdir. O cümlədən, bunu islam dünyası haqqında verdiyi rəylər də göstərir".
Rəşad BAXŞƏLİYEV
Azərbaycan.-2013.- 19 yanvar.- S.4.