20 Yanvar faciəsi nə qədər vaxt keçməsindən asılı olmayaraq, əsla unudulmayacaqdır

Qafqaz Müsəlmanları İdarəsi (QMİ) 20 Yanvar faciəsinin 23-cü ildönümünü ilə əlaqədar bəyanat yaymışdır.

Bəyanatda bildirilir ki, 20 Yanvar günü xalqımızın milli müstəqillik, azadlıq uğrunda şəhidliyə hazırlıq ruhunun və yenilməz iradəsinin rəmzinə çevrilmişdir. Təpədən dırnağadək silahlanmış sovet ordusunun cəza tədbirlərinə məruz qalan xalqımız azadlıq əzmini itirməmiş, əksinə, haqq səsini daha ucadan bəyan etmişdir. Azərbaycanın taleyi, hətta dünya xəritəsindəki varlığı belə şübhə altında olduğu bir vaxtda bu səsi ilk dəfə Moskvadan xalqımızın mərd oğlu, ümummilli lider Heydər Əliyev ucaltmış, qanlı cinayətin təşkilatçılarını qəzəblə ittiham etmiş, bu hadisəni hüquqa, demokratiyaya, humanizmə zidd addım kimi səciyyələndirmişdir.

Bakıda isə QMİ-nin sədri şeyxülislam Allahşükür Paşazadə keçmiş SSRİ-nin rəhbəri Mixail Qorbaçova göndərdiyi məktubda hadisələrə sərt və prinsipial münasibət bildirmişdir. Siyasi liderin və dini rəhbərin kəskin mövqeləri xalqı ruhlandırmış və birləşdirmişdir.

Bəyanatda qeyd edilir ki, Qafqaz Müsəlmanları İdarəsi qanlı hadisənin ilk günlərindən 20 Yanvar faciəsi ilə bağlı həqiqətlərin dünya ictimaiyyətinə çatdırılması, haqq işimizə dəstək verilməsi, törədilən cinayətin bəşəriyyətə qarşı amansız cəza tədbiri kimi qiymətləndirilməsi üçün var qüvvəsi ilə çalışmışdır. Təəssüf ki, indiyədək bu faciə tam hüquqi qiymətini almamış, cinayətkarlar məsuliyyətə cəlb olunmamışlar.

Bildirilir ki, 20 Yanvar faciəsi nə qədər vaxt keçməsindən asılı olmayaraq, əsla unudulmayacaqdır. Haqqı tələb etdiklərinə görə dinc insanın gülləbaran edilməsini yaddaşlardan silmək mümkün deyildir.

Bəyanatda deyilir ki, azadlığın, müstəqilliyin yolu ağırdır və bu yolu qurban vermədən keçmək mümkün deyildir. Şəhidlərimiz olmuşdur və torpaqlarımızın ərazi bütövlüyü bərpa edilənədək yenə də ola bilər. Odur ki, 20 Yanvar matəm libası geyib kədərə-qüssəyə batmaq günü deyil, şəhidlərimizi anmaq, xalqımızda, xüsusilə gənclərimizdə qəhrəmanlıq və vətənpərvərlik ruhu tərbiyə etmək günü olmalıdır. Şəhidlik imanın, vətənpərvərliyin, əqidə və amal uğrunda mübarizənin ən yüksək zirvəsidir, çünki şəhidlər Tanrının onlara göndərdiyi imtahandan mərdliklə, fədakarlıqla çıxırlar.

Bəyanatda deyilir: "QMİ bütün Qafqaz müsəlmanları adından 20 Yanvar şəhidlərinin, eləcə də Vətənimizin ərazi bütövlüyü uğrunda canlarını fəda etmiş bütün şəhidlərin ailələrinə dərin hüznlə başsağlığı verir. Şəhidlərin ruhuna ən böyük ehtiram Qarabağ zəfəri, Vətənimizin qüdrəti, xalqımızın xoşbəxtliyidir. Biz inanırıq ki, Allahın köməyi və Prezident İlham Əliyevin rəhbərliyi ilə yaxın gələcəkdə xalqımız öz ülvi arzularına çatacaqdır".

AzərTAc

Azərbaycan.-2013.- 19 yanvar.- S.5.