«20 Yanvar» Cəmiyyəti üçün yeni qərargah istifadəyə verildi

20 Yanvar faciəsindən artıq iyirmi üç il ötür. Xalqımızın qan yaddaşına yazılmış bu tarixi faciə ölkəmizin hər yerində olduğu kimi, paytaxtın Səbail rayonunun idarə və təşkilatlarında, ali və orta təhsil müəssisələrində də geniş qeyd olunur.

Azərbaycan Respublikası Prezidenti Administrasiyasının rəhbərinin "20 Yanvar faciəsinin iyirmi üçüncü ildönümünün keçirilməsinə dair tədbirlər planı haqqında" sərəncamı əsasında Səbail Rayon İcra Hakimiyyəti tərəfindən müvafiq tədbirlər hazırlanmış və faciənin ildönümünün geniş şəkildə qeyd olunması nəzərdə tutulmuşdur. Rayonun ali və orta təhsil müəssisələrində silsilə tədbirlər keçirilmişdir.

Dövlət başçısının tapşırıqlarına əsasən xalqımızın inanc yeri olan Şəhidlər xiyabanı kompleksinin bir hissəsində aparılan əsaslı təmir-yenidənqurma işləri ilə əlaqədar burada yerləşən, təbii faktorlardan yararsız hala düşmək təhlükəsi yaranmış "20 Yanvar" Cəmiyyətinin və Azərbaycan Vətən Müharibəsi Veteranları Birliyi Səbail rayon şöbəsinin qərargahlarının yerində möhkəmləndirmə və ərazinin yeni layihə əsasında yenidənqurulması işləri aparıldığı üçün başqa yerə köçürülməsi zərurəti yaranmışdır. Bununla əlaqədar yeni layihə hazırlanaraq ictimai təşkilatlar və eləcə də Xiyabana xidmət göstərən ayrı-ayrı təşkilatların işçiləri üçün yeni inzibati bina inşa olunmuş, Səbail Rayon İcra Hakimiyyəti tərəfindən hər cür lazımi ləvazimat və avadanlıqlarla təchiz olunmuşdur. İctimai təşkilatların xidməti otaqlarında tərtibat işləri görülmüş və faciənin ildönümü ərəfəsində Xiyaban kompleksindəki ictimai təşkilatlar üçün nəzərdə tutulmuş bina istifadəyə verilmişdir.

Dünən isə Səbail Rayon İcra Hakimiyyətinin təşəbbüsü ilə rayonun ictimai təşkilatlarının, Sosial Müdafiə Fondu, "20 Yanvar" Cəmiyyəti və Veteran Təşkilatları Şurasının nümayəndələrinin iştirakı ilə rayonda yaşayan 20 Yanvar şəhidlərinin ailələri və faciə zamanı əlil olmuş rayon sakinləri ilə məhz bu yeni inzibati binada görüş keçirildi. Tədbirdə çıxış edən Səbail Rayon İcra Hakimiyyətinin başçısı Asif Əsgərov qeyd etdi ki, bu faciə xalqımızın qan yaddaşında əbədi həkk olunub. Keçmiş sovet imperiyası ordusu qarşısına silahsız, əliyalın çıxaraq canlarından keçən 20 Yanvar şəhidləri müasir tariximizin qəhrəmanlarıdırlar. Ümummilli lider Heydər Əliyev hər zaman 20 Yanvar faciəsi zamanı şəhid olanların ailələri, əlil olmuş vətəndaşlarımıza diqqət və qayğısını əsirgəməyib. Onun səyləri ilə faciə qurbanlarının ailələri və 20 Yanvar əlilləri dövlət tərəfindən hər cür diqqət və qayğı ilə əhatə olunublar. Natiq Azərbaycan Prezidenti İlham Əliyev tərəfindən ölkəmizin azadlığı və müstəqilliyi uğrunda şəhid olmuş və sağlamlığını itirmiş şəxslərə qayğının hər zaman diqqət mərkəzində olduğunu, onlara verilən təqaüd və müavinətlərin artırıldığını və bu artımın gələcəkdə də davamlı olacağını qeyd etdi.

Səbail Rayon İcra Hakimiyyətinin başçısı şəhid ailələri və 20 Yanvar əlillərinin məişət qayğıları və problemləri ilə maraqlandı. Tədbirin sonunda RİH tərəfindən şəhid ailələri və əlillərə maddi yardım göstərildi və ərzaq bağlamaları təqdim olundu.

Rəşad BAXŞƏLİYEV

Azərbaycan.-2013.- 19 yanvar.- S.6.