Qanlı Yanvar faciəsi qurbanlarının xatirəsi ehtiramla yad edilmişdir

Moskva

Azərbaycanın Rusiyadakı səfirliyində Qanlı Yanvar faciəsinin 23-cü ildönümünə həsr edilmiş mərasim keçirilmişdir.

Tədbir iştirakçıları Azərbaycan xalqının ümummilli lideri Heydər Əliyevin səfirlikdəki barelyefinin və 20 Yanvar qırğınının günahsız qurbanlarının siyahısı yazılmış stendin önünə tər çiçəklər düzmüşlər. 20 Yanvar faciəsini əks etdirən fotostendlə tanış olmuşlar.

Şəhidlərin xatirəsi bir dəqiqəlik sükutla yad edilmişdir.

Azərbaycanın Rusiya Federasiyasındakı səfiri Polad Bülbüloğlu çıxış edərək 23 il əvvəl baş vermiş hadisələri xatırladaraq vurğulamışdır ki, bu faciəli tarix xalqın yaddaşında daim qalmalı və gələcək nəsillər üçün mərdlik dərsi olmalıdır. Azərbaycan rəhbərliyi hər il dövlət səviyyəsində qeyd edilən bu hadisəyə böyük əhəmiyyət verir. Səfir sovet qoşunlarının Azərbaycan xalqına qarşı törətdiyi özbaşınalıqlardan və informasiya blokadasının qırılması ilə əlaqədar çətinliklərdən söhbət açaraq bildirmişdir ki, bu faciə Azərbaycan tarixində dönüş nöqtəsi olmuşdur.

Polad Bülbüloğlu Azərbaycan xalqının ümummilli lideri Heydər Əliyevin cəsarətli hərəkəti, onun bu faciəyə siyasi qiymət verməsi və o hadisənin dərk edilməsindəki əvəzedilməz rolu barədə ətraflı məlumat vermişdir. Səfir demişdir: "Görkəmli siyasi xadim, ümummilli lider Heydər Əliyev 1990-cı il yanvarın 21-də özünün və ailəsinin həyatını təhlükə altında qoyaraq Azərbaycanın Moskvadakı daimi nümayəndəliyinə gələrək bütün dünyaya elan etdi ki, bu hadisə Azərbaycan xalqına qarşı yönəlmiş repressiyadır. Ulu öndər Heydər Əliyev o dövrdə bu fakta siyasi qiymət vermiş ilk və yeganə siyasi xadim olmuşdur". Diplomat xüsusi qeyd etmişdir ki, sovet hakimiyyəti Azərbaycanın timsalında keçmiş ittifaqın bütün xalqlarına ibrət dərsi vermək istəyirdi. Lakin Azərbaycan xalqı öz müstəqillik yolundan dönmədi.

Polad Bülbüloğlu bir sıra xarici dövlətlərin səfirlərinə və diplomatik missiyaların nümayəndələrinə bu tədbirdə iştirak etmələrinə və Azərbaycan xalqının haqq səsinin dünyaya yayılması işində dəstəyə görə təşəkkür etmişdir.

Sonra Qanlı Yanvar faciəsi haqqında sənədli film nümayiş etdirilmişdir.

Matəm mərasimində Moskvada akkreditə olunmuş diplomatik missiyaların rəhbərləri və təmsilçiləri, habelə Heydər Əliyev Fondunun Rusiyadakı nümayəndəliyinin əməkdaşları, Ümumrusiya Azərbaycan Konqresinin, Rusiya Azərbaycanlı Gənclər Birliyinin və Rusiya ictimaiyyətinin nümayəndələri iştirak etmişlər.

Mərasim Rusiyanın bir çox nüfuzlu kütləvi informasiya vasitələri, o cümlədən "Rossiya 24" və "Mir" telekanalları tərəfindən işıqlandırılmışdır.

Sonda Azərbaycanın Rusiyadakı səfirliyi adından ehsan verilmişdir.

Tehran

Azərbaycanın Tehrandakı səfirliyində 20 Yanvar faciəsinin 23-cü ildönümü ilə əlaqədar "20 Yanvar: səbəb, məqsəd və nəticələr" mövzusunda elmi konfrans keçirilmişdir.

Konfransda İranın dövlət və hökumət nümayəndələri, Tehrandakı diplomatik korpusun və beynəlxalq təşkilatların rəhbərləri, ictimaiyyət təmsilçiləri, alimlər iştirak etmişlər.

Əvvəlcə şəhidlərimizin ruhuna dualar oxunmuş, faciədən bəhs edən sənədli film nümayiş etdirilmişdir.

Azərbaycanın İrandakı səfiri Cavanşir Axundov mərasimdə çıxış edərək 20 Yanvar faciəsinin başvermə səbəbləri və ağır nəticələri barədə ətraflı məlumat vermişdir. Səfir bildirmişdir ki, bu cinayətin törədilməsində məqsəd Azərbaycan xalqının mübarizə əzmini qırmaq olmuşdur. Lakin hərbi təcavüzün ağır fəsadlarına baxmayaraq, Azərbaycan xalqı amansız düşmənə boyun əyməmiş, mübarizə əzmini daha da gücləndirmişdir.

Tehran Universitetinin professoru Bəhram Əmirəhmədian, İran və Asiya Araşdırmaları Mərkəzinin elmi işçisi İlyas Vahidi, sovet dövründə İranın Bakıda baş konsulu işləmiş, İran Xarici İşlər Nazirliyinin rəsmisi Əbülqasım Danişgahi 20 Yanvar faciəsi barədə fikirlərini bölüşmüşlər.

Tədbir iştirakçıları həmçinin işğalçı Ermənistan tərəfindən Azərbaycana qarşı həyata keçirilən terror və hərbi təcavüz aktlarından bəhs edən, 20 Yanvar faciəsinin dəhşətlərini əks etdirən kitab, jurnal, buklet və qəzetlərdən ibarət guşə ilə tanış olmuşlar. İştirakçılara faciə ilə bağlı Azərbaycan, ingilis və fars dillərində çap olunmuş materiallar, CD və DVD-lər paylanmışdır.

Belqrad

Yanvarın 20-də Azərbaycanın Serbiyadakı səfirliyi tərəfindən qanlı Yanvar faciəsinin 23-cü ildönümü ilə əlaqədar anma mərasimi keçirilmişdir.

Səfirlikdən bildirmişlər ki, tədbirdə Serbiya ictimaiyyətinin nümayəndələri, ölkə parlamentində fəaliyyət göstərən Azərbaycan ilə dostluq qrupunun üzvləri, Belqraddakı Azərbaycan Mədəniyyət Mərkəzinin və Serbiya-Azərbaycan Ticarət-İqtisadi Palatasının üzvləri, Serbiyada yaşayan Azərbaycan icmasının üzvləri və təhsil alan azərbaycanlı tələbələr, KİV-lərin və Belqrad şəhərinin müsəlman icmasının nümayəndələri iştirak etmişlər.

Tədbirin əvvəlində iştirakçılar 20 Yanvar faciəsini əks etdirən fotoguşə ilə tanış olmuş, sonra Qanlı Yanvar şəhidlərinin xatirəsi bir dəqiqəlik sükutla yad edilmişdir.

Mərasimdə çıxış edən səfir Eldar Həsənov 20 Yanvar faciəsi zamanı Sovet qoşunları tərəfindən törədilmiş vəhşilikləri xatırlayaraq milli azadlıq yolunda şəhid olan qəhrəmanların xatirəsinin xalqımızın yaddaşında əbədi yaşayacağını diqqətə çatdırmışdır. O, 1990-cı il 20 Yanvar tarixində Sovet İttifaqı Kommunist Partiyası rəhbərliyinin və mövcud rejimin, sovet Silahlı Qüvvələrinin Azərbaycan xalqına qarşı törətdikləri və öz qəddarlığı ilə seçilən təcavüzdən bəhs edərək, konstitusiya hüquqlarının bərqərar edilməsini tələb edən, azadlığı, müstəqilliyi və ərazi bütövlüyü uğrunda mübarizə aparan silahsız Vətən övladlarının və dinc əhalinin vəhşicəsinə gülləbaran edilməsindən danışmışdır.

Səfir faciə zamanı 147 nəfər günahsız insanın qətlə yetirildiyini və 800-dən artıq soydaşımızın müxtəlif dərəcəli bədən xəsarətləri aldığını qeyd etmişdir. O, Azərbaycan xalqının ümummilli lideri Heydər Əliyevin 1990-cı il yanvarın 21-də Azərbaycanın Moskva şəhərindəki nümayəndəliyinə gələrək sovet rəhbərliyinə qarşı açıq etiraz etdiyini xüsusi vurğulamış, həmin hadisələrə məhz ulu öndərin təşəbbüsü ilə ilk dəfə siyasi-hüquqi qiymət verildiyini bildirmişdir.

Sonra mərasim iştirakçıları "Azadlığa aparan yol" sənədli filminə baxmışlar.

Səfirlik tərəfindən hazırlanmış, 20 Yanvar faciəsinin səbəblərini və nəticələrini özündə əks etdirən mətbuat məlumatı xarici ölkələrin Belqrad şəhərindəki səfirlikləri və beynəlxalq təşkilatların nümayəndəlikləri, Serbiyanın dövlət strukturları, qeyri-hökumət təşkilatları və KİV arasında yayılmışdır.

Kiyev

Ukrayna Azərbaycanlıları Konqresinin (UAK) təşkilatçılığı ilə Kiyevdə 20 Yanvar şəhidlərinin xatirəsi anılmışdır.

UAK-dan bildirmişlər ki, Ukraynada yaşayan bir sıra xalqların diaspor təşkilatlarının rəhbərlərinin və media nümayəndələrinin qatıldığı mərasimdə Azərbaycanın bu ölkədəki səfiri Eynulla Mədətli çıxış edərək 23 il bundan əvvəl canlarını dövlətimizin müstəqilliyi yolunda fəda etmiş oğul və qızlarımızın şücaətindən danışmışdır. 20 Yanvar faciəsini totalitar sovet rejiminin Azərbaycana qarşı həyata keçirdiyi bəşəri cinayət adlandıran səfir bu tarixi xalqımızın qəhrəmanlıq və şərəf salnaməsi adlandırmışdır.

UAK-ın rəhbəri Rövşən Tağıyev, diasporumuzun fəalları Vilayət Quliyev, Əbülfəz Qasımov, Azərbaycan diasporunun Ağsaqqallar Şurasının sədri Firudin Məmmədov, Bakı Slavyan Universitetinin Kiyev Linqvistik İnstitutundakı Azərbaycan Dili və Mədəniyyət Mərkəzinin rəhbəri professor Rafiq Novruzov, Ukrayna Azərbaycanlı Gənclər Birliyinin sədri Anar Tahirov və digərləri çıxışlarında qanlı 20 Yanvar faciəsinin əsl günahkarı olan Mixail Qorbaçovun beynəlxalq məhkəmə qarşısında cavab verməsinin vacibliyini vurğulamışlar. Natiqlər xalqımızın haqq səsinin boğulduğu bir zamanda Azərbaycanın Rusiyadakı daimi nümayəndəliyinə gələrək sovet rejiminin törətdiyi bəşəri cinayətin dünya ictimaiyyətinə çatdırılmasında ulu öndər Heydər Əliyevin tarixi xidmətlərindən danışmışlar. Çıxışlarda Azərbaycanın dövlət müstəqilliyi uğrunda canlarından keçən qəhrəman oğul və qızlarımızın xatirəsinin heç zaman unudulmayacağı, bu faciənin gələcək nəsillər üçün əsl vətənpərvərlik nümunəsi olduğu vurğulanmışdır.

Ukrayna Yəhudilər Forumunun prezidenti Arkadi Manastrski və digər ictimai təşkilatların rəhbərləri aradan 23 il ötməsinə baxmayaraq, 20 Yanvar faciəsini törədənlərin hələ də cinayət məsuliyyətinə cəlb edilməməsini tarixi ədalətsizlik kimi qiymətləndirmişlər.

Sonra sovet ordusunun 1990-cı ilin 20 Yanvar gecəsində Bakıda törətdiyi qanlı faciə ilə bağlı sənədli film nümayiş etdirilmişdir.

Tbilisi

Azərbaycan xalqının tarixində ümumxalq hüzn günü kimi iz buraxmış 20 Yanvar faciəsinin 23-cü ildönümü ilə əlaqədar Gürcüstanda da anma mərasimləri keçirilmişdir. Tbilisidə keçirilmiş mərasimdə 20 Yanvar şəhidlərinin əziz xatirəsi bir dəqiqəlik sükutla yad olunmuş, ruhlarına dualar oxunmuşdur.

Azadlıq, müstəqillik uğrunda şəhid olanların əziz xatirəsini unutmayaq, unutsaq unudularıq şüarları səsləndirilmişdir.

Kaxeti bölgəsinin Saqareco rayonunda, azərbaycanlılar yaşayan Qaraçöp mahalında 20 Yanvar Bakı şəhidlərinin və 9 Aprel Tbilisi şəhidlərinin xatirəsinə ucaldılmış abidə önündə də anma mərasimi keçirilmişdir.

ARDNŞ-in Gürcüstan nümayəndəliyinin əməkdaşı Şövqi Mehdizadə bu abidənin ətrafının abadlaşdırılması layihəsini təqdim etmişdir. Layihə yerli ictimaiyyət tərəfindən rəğbətlə qarşılanmışdır.

Azərbaycan Respublikasının Gürcüstandakı səfiri Azər Hüseyn tədbir iştirakçılarına 1990-cı il yanvarın 19-dan 20-nə keçən gecə sovet ordusunun Azərbaycanın paytaxtı Bakıda və respublikanın rayonlarında törətdiyi qırğınların səbəb və nəticələri barədə ətraflı məlumat vermişdir.

Gürcüstan parlamentinin komitə sədri Qiqla Aqulaşvili demişdir ki, bu abidə Azərbaycan və gürcü xalqlarının tarixi qardaşlığının təcəssümüdür. Deputat bu günün hər iki xalqın həm fəxri, həm də kədər günü olduğunu qeyd etmiş, şəhid qanı hesabına qazanılmış müstəqilliyin qorunmasında hamını birliyə çağırmışdır.

Gürcüstan parlamentinin deputatı Mahir Dərziyev 20 Yanvar və 9 Aprel faciələrinin xalqlarımızın qəhrəmanlıq tarixinin unudulmaz salnaməsi olduğunu qeyd etmişdir.

Professor Fərhad Xubanlı, İsmayıl Həmzəyev, Nizami Şərifov, İsmixan Məmmədov və başqaları 20 Yanvar və 9 Aprel faciələrinin hər iki xalqın ortaq dərdi və ortaq fəxri olduğuna diqqəti çəkmiş, müasir gəncliyi qan yaddaşımızı unutmamağa çağırmışlar.

Berlin

Azərbaycan Respublikasının Almaniyadakı səfirliyində 20 Yanvar faciəsinin 23-cü ildönümünə həsr olunmuş anma mərasimi keçirilmişdir.

Əvvəlcə 20 Yanvar şəhidlərinin xatirəsi bir dəqiqəlik sükutla yad edilmişdir.

Azərbaycanın Almaniyadakı səfiri Pərviz Şahbazov mərasim iştirakçılarına Qanlı Yanvar faciəsi barədə ətraflı məlumat vermiş, bu hadisələrin Azərbaycanın müstəqilliyinin əldə edilməsində oynadığı roldan danışmış və 20 Yanvar tarixini Azərbaycan xalqının azadlığı uğrunda qəhrəmancasına apardığı mübarizə kimi səciyyələndirmişdir. Səfir ümummilli lider Heydər Əliyevin bu hadisələr zamanı nümayiş etdirdiyi əsl vətəndaş mövqeyini xatırlatmış və bu hadisələrə siyasi və hüquqi qiymət verilməsində ulu öndərin xidmətlərini vurğulamışdır. Diplomat 20 Yanvar hadisələrinin xalqımızın tarixində qəhrəmanlıq səhifəsi olduğunu demişdir.

Dünyanın ən böyük kənd təsərrüfatı sərgisi olan "Yaşıl həftə" çərçivəsində Berlində səfərdə olan kənd təsərrüfatı naziri İsmət Abasov mərasimdə çıxış etmiş və 20 Yanvar hadisələri barədə xatirələrini iştirakçılarla bölüşmüşdür. Nazir 20 Yanvar hadisələri zamanı keçmiş sovet hakimiyyətinin öz xalqına qarşı törətdiyi ağır cinayətdən bəhs edərək bu hərəkətlərə bəraət qazandırılmasının mümkün olmadığını dilə gətirmişdir. İsmət Abasov eyni zamanda ümummilli lider Heydər Əliyevin məlum hadisələr zamanı göstərdiyi fədakarlıqdan danışmışdır.

Daha sonra söz alan Potsdam Universitetinin professoru Vilfred Fuhrman çıxışında faciənin qurbanlarının arzularını, ümidlərini xatırlamağın vacibliyini qeyd edərək, Azərbaycan xalqının müstəqillik uğrunda mübarizə yolundan danışmışdır.

Çıxışlardan sonra Almaniya Köln Musiqi və Rəqs Ali Məktəbində təhsil alan azərbaycanlı pianoçu Toğrul Hüseynlinin ifasında Azərbaycan və alman bəstəkarlarının əsərləri təqdim olunmuşdur.

Mərasimdə "Yaşıl həftə" çərçivəsində Berlində səfərdə olan Azərbaycan nümayəndə heyətinin üzvləri, Almaniya siyasi və ictimai dairələrinin nümayəndələri, AFR Xarici İşlər Nazirliyinin əməkdaşları, eləcə də Almaniyadakı diasporumuzun təmsilçiləri iştirak etmişlər.

Tədbir iştirakçıları səfirlik tərəfindən 20 Yanvar hadisələrinə həsr olunmuş fotosərgi ilə tanış olmuşlar. Alman dilində izahlarla tərtib olunmuş sərgidəki fotoşəkillər qonaqlarda acı təəssürat doğurmuşdur.

Rəsmi hissədən sonra şəhidlərimizin xatirəsinə ehsan verilmiş, tədbirin iştirakçılarına ölkəmiz haqqında alman dilində çoxsaylı kitablar hədiyyə edilmişdir.

Qahirə

20 Yanvar faciəsinin 23-cü ildönümü ilə əlaqədar Azərbaycanın Misirdəki səfirliyində anma mərasimi keçirilmişdir.

Səfirlikdən bildirmişlər ki, tədbirdə Misirin kütləvi informasiya vasitələrinin nümayəndələri, Azərbaycan-Misir Dostluq Cəmiyyətinin üzvləri, ictimaiyyətin nümayəndələri, Qahirə və Ayn-Şəms universitetlərinin tələbələri, bu ölkədə yaşayan və təhsil alan azərbaycanlılar iştirak etmişlər.

Mərasimi açan səfir Şahin Abdullayev Azərbaycan xalqının sovet rejiminə qarşı milli azadlıq mübarizəsi və Ermənistanın ölkəmizə qarşı ərazi iddiaları haqqında məlumat vermişdir. Diplomat 1990-cı ilin 20 Yanvar gecəsi kommunist rejimini xilas etmək və Azərbaycan xalqının mübarizə əzmini boğmaq üçün Bakıya yeridilən sovet ordu birləşmələrinin mülki əhaliyə qarşı ağır texnika və odlu silahlardan istifadə edərək 147 nəfəri amansızlıqla qətlə yetirdiyini, 800-dən çox insanı yaraladığını diqqətə çatdırmışdır. Səfir Azərbaycanın əvəzsiz töhfələr verdiyi sovet ordusunun xalqımızın dinc etiraz nümayişinə divan tutduğunu xüsusi vurğulamışdır.

SSRİ-nin dağılmasından sonra Azərbaycanın azadlığı və bu yolda üzləşdiyi çətinliklərdən, xüsusilə Ermənistanın ölkəmizə qarşı təcavüzündən danışan səfir respublikamızın 22 illik müstəqillik dövrü ərzində əldə etdiyi nailiyyətlər və Prezident İlham Əliyevin rəhbərliyi altında bugünkü dinamik inkişaf haqqında məlumat vermişdir.

Sonra Ş.Abdullayev iştirakçıların suallarını cavablandırmışdır.

Tədbirdə "20 Yanvar faciəsinə aparan yol" filmi və Bakıda törədilmiş qırğının nəticələri haqqında videoçarx nümayiş etdirilmiş, faciənin dəhşətləri ilə bağlı fotostend hazırlanmışdır. Bununla yanaşı, iştirakçılara faciə barədə kitablar və səfirliyin press-relizi paylanmışdır.

Misirin "Qahirə-3" dövlət televiziya kanalı mərasimdən reportaj hazırlamışdır.

20 Yanvar faciəsi ilə əlaqədar səfirlik tərəfindən həyata keçirilmiş silsilə tədbirlər çərçivəsində Ş.Abdullayevin Misirin birinci televiziya kanalında müsahibəsi yayımlanmışdır. Həmçinin Ş.Abdullayevin faciə ilə bağlı məqalələri nüfuzlu "Youm7", "Şuruq", "Əl-Cumhuriyyə", "Məsəiyə", "Əl-Əxbar", "Əl-Təhrir", "Əl-Dustur Əl-Əsli" və "Əl-Qurnal" qəzetlərində dərc edilmişdir.

Əl-Küveyt

Xalqımızın yaddaşında silinməz iz buraxmış 20 Yanvar faciəsinin 23-cü ildönümü ilə əlaqədar Azərbaycan Respublikasının Küveyt Dövlətindəki səfirliyi silsilə tədbirlər keçirmişdir.

Səfirlikdən bildirmişlər ki, yanvarın 20-də Küveytdə yaşayan və işləyən Azərbaycan vətəndaşlarını öz ətrafında birləşdirən "Vətənsevər" Dostluq Cəmiyyətinin və "Kuveyt-Azəri" müştərək şirkətinin təşkilatçılığı ilə anma mərasimi keçirilmişdir. Tədbirdə səfirliyin əməkdaşları, Azərbaycan, Türkiyə, İran və digər ölkələrin nümayəndələri, diaspor təşkilatlarının təmsilçiləri, eləcə də Küveytin ictimai-siyasi xadimləri, millət vəkilləri və KİV nümayəndələri iştirak etmişlər.

Səfir Tural Rzayev mərasimdə çıxış edərək keçmiş sovet ordusunun Bakıda və ölkəmizin digər şəhərlərində törətdiyi vəhşiliklərdən danışmış, Mixail Qorbaçov başda olmaqla bu qanlı faciədə əli olan digər cinayətkarların bütün beynəlxalq hüquq normalarına zidd hərəkətləri barədə ətraflı məlumat vermişdir. Xalqımızın ümummilli lideri Heydər Əliyevin səyləri nəticəsində Azərbaycanın öz müstəqilliyini bərpa etdiyini, həmçinin 20 Yanvar faciəsi barədə həqiqətlərin üzə çıxdığını, ölkəmizə qarşı həyata keçirilən təcavüzkar siyasətin bütün dünyaya çatdırıldığını xüsusi qeyd etmişdir.

Səfir ölkəmizin taleyüklü problemi olan Dağlıq Qarabağ münaqişəsinə xüsusi yer ayırmışdır. O, Azərbaycan ərazilərinin erməni vandalları tərəfindən işğal olunması, həmin ərazilərdə törədilmiş vəhşiliklər, insan tələfatı, xalqımıza dəyən maddi və mənəvi zərər barədə ətraflı məlumat vermişdir. İşğal olunmuş Azərbaycan torpaqlarının boşaldılmasına dair BMT Təhlükəsizlik Şurasının 4 qətnaməsinə, İqtisadi Əməkdaşlıq Təşkilatı və Avropa İttifaqının bəyanatlarına rəsmi Yerevanın etinasız yanaşdığını qeyd etmişdir.

Səfirliyin təşəbbüsü və yardımı ilə ərəb dilində hazırlanmış "20 Yanvar" foto-albomu və faciədən bəhs edən sənədli filmin ərəb dilində CD variantı, səfirliyin mətbuat məlumatı Küveytin dövlət, hökumət qurumlarına, parlamentinə, ölkədə fəaliyyət göstərən ictimai təşkilatlara və kütləvi informasiya vasitələrinə göndərilmiş, 20 Yanvar faciəsi ilə bağlı fotosərgi təşkil olunmuş, faciə haqqında film və kitablar paylanmışdır.

Küveytin geniş oxucu kütləsinə malik "Əl-Vasat" qəzetində 20 Yanvar faciəsinə həsr olunmuş məqalə dərc olunmuşdur.

Əmman

İordaniya-Azərbaycan Dostluq Cəmiyyəti 20 Yanvar faciəsinin 23-cü ildönümü ilə əlaqədar anma mərasimi təşkil etmişdir.

Azərbaycanın İordaniya Krallığındakı səfirliyindən bildirmişlər ki, tədbirdə cəmiyyətin baş katibi Xalid Həmşavi, idarə heyətinin sədri senator Mərvan Humud və üzvləri, eləcə də Türkiyənin, Ukraynanın, Gürcüstanın və Qazaxıstanın bu ölkədəki səfirləri, diplomatik nümayəndəliyimizin əməkdaşları, Krallığın ictimai-siyasi dairələrinin, Azərbaycan diasporunun təmsilçiləri və tələbələr iştirak etmişlər.

Mərasimdə çıxış edən Azərbaycanın İordaniyadakı səfiri Sabir Ağabəyov xalqımızın yaddaşında Qara Yanvar gecəsi kimi qalan bu tarixin həm şəhidlərimizin anım günü, həm də Azərbaycan xalqının müstəqillik uğrunda mübarizəsinin təcəssümü olduğunu diqqətə çatdırmışdır. Səfir 20 Yanvar günü keçmiş SSRİ rəhbərliyinin göstərişi ilə nizami ordu birləşmələri tərəfindən dinc əhaliyə qarşı həyata keçirilən cəza tədbirləri zamanı insanlıq əleyhinə törədilmiş dəhşətli qırğın nəticəsində BMT-nin Dünya İnsan Hüquqları Bəyannaməsinin, 1949-cu il Cenevrə Konvensiyasının, habelə insan haqlarına dair digər beynəlxalq hüquqi sənədlərin müddəalarının kobud şəkildə pozulduğunu vurğulamışdır.

Anma mərasiminin keçirildiyi salonda Qanlı Yanvar faciəsini əks etdirən sərgi təşkil edilmiş, sənədli filmlər nümayiş olunmuşdur.

Tədbir iştirakçılarına 20 Yanvar faciəsi ilə bağlı materiallar paylanmışdır.

20 Yanvar faciəsi İordaniya mətbuatında da geniş işıqlandırılmışdır. Bu ölkədə fəaliyyət göstərən "Əl-Dustur", "Əl-Diyar" qəzetlərində və "Uruba" informasiya agentliyinin saytında faciə ilə bağlı geniş məqalələr dərc edilmişdir.

AzərTAc

Azərbaycan.-2013.- 22 yanvar.- S.6.