Diqqət və qayğı olan yerdə...

Gerçəkliklər və uğurlarla dolu bir il də tarixə çevrildi və o, yardımlılıların da həyatında izsiz ötüşmədi. Hansı sahəyə baxsan orada real həyatın yeni rəng çalarlarını görmək mümkündür. Konkret desək, ölkənin dinamik inkişafı onun bu ucqar əyalətində də geniş aspektdə özünü göstərdi və rayonun sosial-iqtisadi, mədəni həyatında yeni mərhələ yaşandı. Bu mərhələ ilk növbədə rayonda sosial-iqtisadi inkişafın sürətləndirmə əmsalı sayılan insan kapitalına sağlam münasibətlər sisteminin qurulması ilə şərtlənir.

Məlumdur ki, yerlərdə əhali ilə görüşlər keçirmək, səyyar qəbullar, dinləmələr təşkil etmək müasir idarəetmənin ən məqbul formalarından sayılır. Prezident İlham Əliyevin vaxtaşırı bölgələrə səfər etməsi, regionların sosial-iqtisadi inkişafı Dövlət Proqramının icrasını nəzarətdə saxlaması, görülən işlərlə yaxından maraqlanması və ictimaiyyət nümayəndələrini dinləməsi hər bir rəhbər üçün örnəkdir.

Rayon rəhbərliyi də belə nümunəvi fəaliyyət mexanizmindən səmərəli faydalanmağa çalışır. Çətin coğrafi relyefə baxmayaraq, ötən il rayon icra hakimiyyəti idarə, müəssisə və təşkilat rəhbərlərinin iştirakı ilə 90 yaşayış məntəqəsinin hamısında insanlarla görüşlər keçirib, dinləmələr təşkil edib. Bu zaman rəsmi qəbullardan fərqli olaraq, insanlar öz istək və arzularını, narahatlıq doğuran məsələləri rayon rəhbərliyinə çatdırıblar. Səmimi dialoqlar, şikayət, təklif və müraciətlərə obyektiv, qərəzsiz münasibət rəhbərliklə insanlar arasında olan inam körpüsünün dayaqlarını daha da möhkəmləndirib. Bu birlik sosial-iqtisadi inkişafın bütün imkanlarını üzə çıxarıb. Sağlam atmosferdən ruhlanan xeyriyyəçi insanlar da qollarını çırmalayıblar. Vərgədüz kəndində şəxsi təşəbbüslə artezian quyusu qazılıb, 20 tonluq su anbarı tikilib, Cerinbel kəndində yeni bulaq kompleksi inşa olunub, körpülər salınıb və s.

Keçən il Yardımlı, sözün həqiqi mənasında, tikinti meydançasına çevrilmişdi. Öncə rayon mərkəzini gözəl və yaraşıqlı bir dağ şəhərinə çevirmək istiqamətində tikinti-abadlıq işləri sürətləndirilmişdi. Şəhərin giriş hissəsindən başlayaraq küçəətrafı istinad divarları hörülmüş və ağ üzlük daşlarla bərkidilmişdir. İndi həmin istiqamətdə magistral yol da genişləndirilir, su arxları çəkilir, piyadalar üçün səkilər salınır, ora ornamentli üzlük plitələr döşənir. Artıq həmin ərazidə yerləşən Heydər Əliyev bulağının ətrafı göz oxşayır. Rayon Statistika İdarəsi üçün yeni ikimərtəbəli inzibati bina və Vergi Terminalı da şəhərə yaraşıq verir. Yeni Azərbaycan Partiyasının yerli təşkilatı üçün tikilən binada tamamlama işləri gedir. Bundan əlavə, Şəhidlər xiyabanında əsaslı təmir və yenidənqurma işləri görülüb. Rayon polis şöbəsi üçün üçmərtəbəli binanın tikintisi isə sürətlə davam edir. Eyni zamanda, şəhərin ən gözəl guşəsində Heydər Əliyev Mərkəzi tikilir, park salınır, dar küçələr genişləndirilir.

Tikinti-abadlıq işləri kəndlərdə də gedir. Bunun ən yaxşı nümunəsi kənd yollarının abadlaşdırılmasıdır. Mürəkkəb coğrafi relyefə malik rayonun kənd yollarında uzun illər əsaslı təmir işlərinin aparılmaması ciddi problemlər yaradırdı. Payız-qış aylarında ucqar kəndlərlə əlaqə kəsilir, nəqliyyatın hərəkəti çətinləşirdi. Hazırda Nəqliyyat Nazirliyinin xüsusi təyinatlı texnikası, həmçinin 44 saylı rayon Yol İstismar Sahəsi bu yolların təmiri ilə məşğuldur. Qış mövsümünədək 30-a qədər kəndin yolu əsaslı təmir olunub. 41 kilometr kəndarası yola çınqıl səpilib, 19 kilometr yol 6 metrədək genişləndirilib. Seporadi, Vərgədüz, Teşkan və Urağaran kəndlərinə gedən yolda dağ çaylarının üstündə beton-dəmir konstruksiyalı körpülər tikilib.

Əhalinin içməli su təminatı da rayonun ciddi problemlərindən sayılır və bu səbəbdən həmin istiqamətdə görülən işlər əhali tərəfindən razılıqla qarşılanır. Artıq rayon rəhbərliyinin təşəbbüsü ilə 18 kəndin tələbatını ödəmək üçün Viləş çayının Qaraqaya qolundan su xəttinin çəkilməsinə start verilib. Odrağaran və Alçabulaq kəndlərində isə artezian quyuları qazılıb. Bundan başqa, Yardımlı şəhərinin içməli su tələbatının ödənilməsi üçün 52,2 kilometr uzunluğunda su və 58,2 kilometr uzunluğunda kanalizasiya xətlərinin çəkilməsinə başlanılıb.

Kəndlərin qazlaşdırılması da davam edir. Əngövül kəndində 133 abonentə təbii qaz verilməsi nəticəsində əhali üzrə abonentlərin sayı 1200-dən çoxdur. İyun ayından çəkilişinə başlanılan və 300 abonenti olan Bozayran kəndinin qazlaşdırılması da başa çatmaq üzrədir. Daha 18 kəndin qazlaşdırılması üçün isə hazırlıq görülür.

Rayonda sahibkarlığın inkişafına mane olan bütün süni maneələr aradan qaldırılıb. İş adamlarının öz fəaliyyətlərini genişləndirmələri üçün ideal şərait yaradılıb. İqtisadi İnkişaf Nazirliyi Sahibkarlığa Kömək Milli Fondunun xətti ilə rayonda sahibkarların maarifləndirilməsi üçün tədbirlər həyata keçirilib və onlara güzəştli kreditlər verilib.

Ötən əsrin 90-cı illərinin əvvəllərindən bu yana Yardımlıda ən çox narahatlıq doğuran məsələlərdən biri də elektrik enerjisinin verilməsi ilə bağlı olub. Elektrik təsərrüfatının bərbadlığı bu sahəni iflic etmişdi. Xüsusilə gündüz saatlarında kəndlərə işıq verilməməsi haqlı narazılıqlar doğururdu. İndi bu məsələ həll olunub və bütün kəndlər fasiləsiz enerji alır.

Rabitə sistemində də köklü dəyişikliklər baş verib. Bütün kənd ATS-ləri elektronlaşıb. Həmçinin çoxşaxəli internet şəbəkəsi istifadəyə verilib ki, hazırda 170 abonent bu xidmətdən yararlanır. Eyni zamanda, əhalinin xahişi nəzərə alınaraq Şəfəqli və Sırıq kəndlərində bankomatlar quraşdırılıb.

Diqqəti çəkən ən vacib məsələlərdən biri də təhsilə olan münasibətdir. Təhsilin maddi-texniki bazasının yaxşılaşdırılması üçün rayonda ardıcıl iş gedir. Məktəb binaları tikintisinin sürətlə və keyfiyyətlə aparılması məsələsi daim diqqət mərkəzindədir. Təkcə son 4 ayda rayonda 4 məktəb binası tikilib. Hazırda isə 8 kənddə yeni təhsil ocağı inşa olunur.

Yardımlının ən böyük sərvəti onun insanlarıdır. Bütün bu işlər, sosial-iqtisadi inkişaf əhalinin sosial rifah halının yaxşılaşdırılmasına xidmət edir. Bu günlər ölkə rəhbərinin rayonun sosial-iqtisadi inkişafını sürətləndirmək üçün əlavə tədbirlər haqqında imzaladığı sərəncam Yardımlıda böyük rəğbət hissi ilə qarşılanıb. Rayonun tanınmış ağsaqqal və ziyalılarından Mir Mahmud Mahmudov, Şahbaz Hüseynov, Mir Həqiqət Həsənov, Feyruz Sultanov, Pənah Tağızadə, Baba Bəhruz, Hüseyn Vəliyev, Əliş Baratov, Firsənd İbayev, Həzi Məcidov, Nadir Əliyev, Məlikməmməd Əliyev və onlarca başqaları Prezidentin bu sərəncamını əhaliyə xüsusi qayğı kimi qiymətləndirirlər.

Seyran CAVADOV

Azərbaycan.-2013.- 24 yanvar.- S.6.