Uşaqlara qayğı artırılır

Ölkəmizdə uşaq və gənclərin hərtərəfli inkişafı, onların intellektual səviyyəsinin yüksəldilməsi, məktəbəqədər təlim və tərbiyəsinin səmərəli təşkili dövlətin xüsusi diqqət ayırdığı məsələlərdən biridir.

Naxçıvan Muxtar Respublikasında da bu sahədə lazımi tədbirlər görülür. Məktəbəqədər, məktəbdənkənar tərbiyə müəssisələri üçün yeni binalar tikilir, onların maddi-texniki bazaları gücləndirilir, uşaqların əlverişli sosial-mənəvi mühitdə böyüməsi üçün hərtərəfli şərait yaradılır. Bunlar isə ilk növbədə ümummilli lider Heydər Əliyevin "Cəmiyyətdə uşaqlara qayğı hər bir vətəndaşın müqəddəs borcudur" müdrik fikrindən irəli gələrək muxtar respublikada həyata keçirilən dövlət uşaq-gənclər siyasətinin uğurlarıdır.

Bu günlərdə Naxçıvan şəhərindəki bir neçə bağçada olduq və burada uşaqlara qulluq, onların fiziki, əqli, zehni, psixoloji inkişafı ilə bağlı həyata keçirilən işlərlə maraqlandıq.

İlk olaraq üz tutduğumuz məkan Naxçıvan şəhər 1 nömrəli uşaq bağçası oldu. Hələ binaya daxil olmamışdan insanda xoş təəssürat yaranır. Cari ilin iyun ayında - Milli Qurtuluş Gününün ərməğanı kimi uşaqların istifadəsinə verilən bağça müasir dizaynda inşa olunmuş dördmərtəbəli binada yerləşir. Bağça müdiri Səadət Qasımova söhbət əsnasında bildirdi ki, bu məktəbəqədər müəssisə Naxçıvan şəhərində fəaliyyətə başlayan ilk bağça olub. 1 nömrəli uşaq bağçası 1928-ci ildə bir qrup və 2 nəfərlik heyətlə işə başlayıb. İndi isə burada 280 yerlik müasir bina istifadəyə verilib.

Bağçada 14 qrup fəaliyyət göstərir. Onlardan 4-ü körpə, 4-ü böyük, 3-ü orta, 3-ü isə məktəbə hazırlıq qruplarıdır. Hər qrupun ayrıca soyunub-geyinmə (hər uşaq üçün ayrı qarderob), yataq otaqları, mətbəxi var. Hər mərtəbədə olan oyun zalları yüksək zövqlə quraşdırılıb. Bağçanın hər cür ləvazimatla təchiz edilmiş tibb otağında həkim və tibb bacıları tərəfindən uşaqların vaxtaşırı müayinəsi və peyvəndlənməsi işi aparılır. Bundan başqa, metodiki kabinet, valideyn və iş otaqları da təlim və tərbiyə proseslərində valideyn-müəllim-uşaq münasibətlərinin hərtərəfli qurulmasında mühüm rol oynayır. Tədbirlər və şənliklər zalında isə əlamətdar günlərin qeyd olunması üçün yüksək şərait yaradılıb. Bağçada uşaqların tərbiyəsinə, sağlamlığına və qidalanmasına ciddi nəzarət yetirilir, həkim-dietoloqlar tərəfindən müəyyənləşdirilmiş yeməklər ümumi qrafik üzrə verilir.

Bağçada ayrıca mətbəx, ərzaq anbarı, işçilər üçün yeməkxana, camaşırxana, dərzi və yardımçı otaqlar da vardır. Binanın həyətindəki oyun konstruksiyaları, istirahət guşələri də uşaqların istifadəsi üçündür. Bina fərdi qazanxana vasitəsilə qızdırılır.

Bağçada Tərlan Orucova, Pərvanə Məmmədova, Təranə Hüseynzadə və digər tərbiyəçilər uşaqların zehni inkişafına xüsusi diqqət yetirirlər. Valideynlər balaca övladlarının intellektual inkişafından, fəallıqlarından çox razıdırlar.

Naxçıvan şəhərindəki 3 nömrəli uşaq bağçasında da olduq. Bu bağça da 2012-ci ilin yanvar ayında istifadəyə verilib.

Dördmərtəbəli binada yerləşən məktəbəqədər müəssisə hər cür lazımi avadanlıqla təchiz olunub. Burada 14 qrup var. Onlardan 11-i 1-5 yaş arası, 3-ü isə 5-6 yaş arası uşaqlar üçün nəzərdə tutulub.

Gün ərzində üz tutduğumuz 4 və 7 nömrəli bağçalarda da uşaqları müəllimləri ilə müxtəlif bilik, intellektual oyunlarla məşğul olarkən gördük.

Əliabad qəsəbə bağçasında müdir Zülfiyyə Əsədova ilə tədbirlər keçirilən zalda qarşılaşdıq. Məktəbəhazırlıq qrupunun müəllimi Sevda Rzayeva həvəslə uşaqlara müxtəlif rəqs elementlərini göstərir, digər tərbiyəçi müəllim Təranə Qasımova şeir söyləyəcək uşaqlarla məşğul olurdu. Uşaqlardan Sirac Məmmədlinin ümummilli lider Heydər Əliyevə həsr olunmuş şeiri xüsusi intonasiya ilə deməsi, Aynur Bəylərlinin, Turac Məmmədlinin, Rəşaiq Abdullayevin, Nuray Məmmədovanın, Cansu Məmmədsoyun, Filiz Qasımovanın milli rəqsləri ifa etmələri xoş təsir bağışlayırdı. Bu da onu göstərirdi ki, bağçada uşaqlara milli dəyərlərimiz aşılanır.

Öyrəndik ki, Əliabad qəsəbə bağçasında 5 müxtəlif yaş qruplarında olan 100 uşağın təlim və tərbiyəsinin günün tələbləri səviyyəsində təşkili üçün hərtərəfli şərait var. Təlim prosesində əyani vəsaitlərdən istifadə edilərək uşaqlar gündəlik keçirilən nitq inkişafı, bədii ədəbiyyatla tanışlıq, riyaziyyat, rəsm, idman və musiqi məşğələlərində yaş səviyyəsinə uyğun bilik, bacarıq və vərdişlərə yiyələnirlər.

Hazırda muxtar respublikada 15 uşaq bağçası fəaliyyət göstərir ki, onların da 13-ü yeni binalarda yerləşir. Bu gün muxtar respublikanın uşaq bağçalarında 2000 uşağın təlim-tərbiyəsi ilə 500-dən artıq müəllim və tərbiyəçi məşğul olur.

Elxan MƏMMƏDOV

Azərbaycan.-2013.- 29 yanvar.- S.4.