«Gənclərin Avrointeqrasiya modeli» mövzusunda müzakirələr aparılmışdır

Yanvarın 28-də Bakıda Azərbaycan Gənclərinin Avropaya İnteqrasiyası Təşkilatının (AGAT) təşkilatçılığı, Gənclər və İdman Nazirliyinin dəstəyi ilə "Gənclərin Avrointeqrasiya modeli" mövzusunda forum keçirilmişdir.

AzərTAc xəbər verir ki, tədbirdə Milli Məclisin deputatları, gənclər təşkilatlarının rəhbərləri, ölkəmizdəki diplomatik korpusun nümayəndələri iştirak etmişlər.

Tədbirdə çıxış edən AGAT-ın sədri Gülsel Səfərova bildirmişdir ki, dövlət müstəqilliyimiz bərpa olunduqdan sonra Azərbaycanın Avropaya inteqrasiyası başlanılmışdır və hazırda bu proses uğurla davam etdirilir. O bildirmişdir ki, forumun məqsədi Avrointeqrasiya prosesində gənclərin rolunu, Azərbaycanın beynəlxalq nüfuzunun daha da möhkəmlənməsində Avropaya inteqrasiyanın əhəmiyyətini diqqətə çatdırmaqdır.

Sonra Azərbaycan Respublikasının Prezidenti Administrasiyasının ictimai-siyasi məsələlər şöbəsinin ictimai-siyasi təşkilatlarla iş sektorunun müdiri Elman Paşayevin "Azərbaycanda vətəndaş cəmiyyətinin quruculuğunda QHT-lərin rolu" mövzusunda məruzəsi dinlənilmişdir.

Demokratiyanın Azərbaycanda dövlət idarəçiliyinin, ictimai həyat normalarının və vətəndaş cəmiyyətinin əsas prinsiplərinə çevrildiyini bildirən E.Paşayev, ölkəmiz müstəqillik əldə etdikdən sonra Azərbaycanın Konstitusiyası və digər qanunvericilik aktlarının Avropa standartlarına uyğunlaşdırıldığını diqqətə çatdırmışdır. Bildirmişdir ki, ölkədə insan hüquq və azadlıqları, o cümlədən söz azadlığı təmin olunmuşdur.

Vurğulanmışdır ki, bu gün ölkəmizdə mətbuatın və vətəndaş cəmiyyəti institutlarının inkişafına dövlət səviyyəsində dəstək göstərilir. Bu məqsədlə Prezident İlham Əliyevin təşəbbüsü ilə yaradılmış Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası vasitəsilə hər il QHT-lərin müxtəlif layihələrinin maliyyələşdirilməsinə on milyonlarla manat vəsait xərclənir. Bu gün Azərbaycanda 2700-dən çox QHT qeydiyyatdadır. Onların sayı cəmiyyətin tələb etdiyi qədərdir.

Azərbaycanda QHT rəhbərləri ilə hakimiyyət nümayəndələrinin görüşlərinin təşkil olunduğunu deyən E.Paşayev bildirmişdir ki, belə tədbirlər bundan sonra da sistemli xarakter daşıyacaqdır.

Forumda gənclər və idman nazirinin müavini İntiqam Babayev "Avropaya inteqrasiya prosesində Azərbaycanda həyata keçirilən dövlət gənclər siyasəti" mövzusunda məruzə ilə çıxış etmişdir. Məruzəçi demişdir ki, Azərbaycan dövləti gənclərimizin avropalı həmkarları ilə əməkdaşlıq əlaqələrinə həmişə dəstək verir. Bunun nəticəsidir ki, 2006-2012-ci illərdə Azərbaycan gənclərinin Avropa gənclər təşkilatlarında 140 layihəsi dəstəklənmişdir. Son 3 ildə isə onlar Avropa İttifaqının "Gənclər fəaliyyətdə" proqramı çərçivəsində 220-dək layihədə iştirak etmişlər. Hazırda Azərbaycan gəncləri 30-dan çox beynəlxalq təşkilatda uğurla təmsil olunurlar.

Rabitə və informasiya texnologiyaları nazirinin müavini Elmir Vəlizadə Avrointeqrasiya prosesində informasiya-kommunikasiya texnologiyalarının (İKT) rolundan və bu sahədə Azərbaycanın təcrübəsindən danışmışdır.

Azərbaycanda 2013-cü ilin Prezident İlham Əliyevin müvafiq sərəncamı ilə "İnformasiya-kommunikasiya texnologiyaları ili" kimi təsdiq olunduğunu xatırladan nazir müavini bildirmişdir ki, son illər İKT-nin sürətli inkişafı internetin imkanlarının genişlənməsinə şərait yaratmış və ölkəmizdə müasir internet şəbəkəsi formalaşmışdır. Hazırda ölkə üzrə internet istifadəçilərinin sayı əhalinin 70 faizini təşkil edir. Ölkə səviyyəsində provayder xidmətləri və internet vasitələri, informasiya və media strukturları çox sürətlə inkişaf edir.

Nazir müavini qeyd etmişdir ki, Azərbaycan bu sahədə 144 ölkə arasında 46-cı yerdə, MDB məkanında isə liderdir. Azərbaycanın beynəlxalq konvensiyalara qoşulduğunu söyləyən E.Vəlizadə, İKT sahəsində layihələrin həyata keçirilməsində Avropa təcrübəsindən bəhrələndiklərini diqqətə çatdırmışdır.

Tədbirdə Avropa İttifaqının ölkəmizdəki nümayəndəliyinin rəhbəri Roland Kobia çıxış edərək Azərbaycanın Avropa üçün vacib ölkə olduğunu demişdir.

Türkiyənin, Fransanın və Rumıniyanın Bakıdakı səfirləri İsmayıl Alper Coşqun, Paskal Mönye və Daniel Çiobanu Azərbaycan-NATO əlaqələrindən, Avropa təsisatlarında Azərbaycan gənclərinin fəallıqlarından danışmışlar. Qeyd edilmişdir ki, gənclərin elm və təhsilinə qayğı ilə yanaşan Azərbaycan hökuməti onların Avropaya inteqrasiya olunmasını da daim diqqətdə saxlayır.

Forum öz işini müzakirələrlə davam etdirmişdir.

Azərbaycan.-2013.- 29 yanvar.- S.6.