Azərbaycanın inkişafı və etibarlı tərəfdaş olması dünya miqyasında qəbul edilən reallıqdır

43-cü Davos İqtisadi Forumu bunu təsdiq etdi

Davos Forumu kimi tanınan Dünya İqtisadi Forumunun əsası alman əsilli isveçrəli iqtisadiyyat professoru Klaus Şvabın 1971-ci ildə avropalı şirkət idarəçiləri ilə birgə təşkil etdiyi kiçik bir toplantı ilə qoyulub. İlk dövrlərdə Avropa İdarəetmə Forumu olaraq tanınan bu forum avropalı iş adamlarının ABŞ-da biznes həyatına uyğunlaşmalarını asanlaşdırmaq və Amerika üsullu kapitalizmin qaydalarını avropalılara öyrətmək məqsədini daşıyan seminarlar silsiləsi idi. 1970-ci illərin ikinci yarısından etibarən əlaqədar mövzuların məşhur iqtisadçı, biznesmen və siyasətçilərin iştirakı ilə geniş bir platformada ələ alınması forumu əhəmiyyətli dünya məsələlərinin müzakirə edildiyi böyük toplantılar silsiləsinə çevirdi.

Davosda Azərbaycana həmişə böyük maraq var

Forum hər il İsveçrənin Davos şəhərində keçirilir. Yalnız bir dəfə, 2002-ci ildə ABŞ-da keçirilib. Bu isə rəmzi xarakter daşıyırdı. Belə ki, həmin il 106 ölkədən 3 min nümayəndə Nyu-Yorka toplaşaraq 11 sentyabr terror hadisələrinə qarşı çıxdıqlarını nümayiş etdirdi. Davos Forumunun keçirilməsində əsas məqsəd dövlət və hökumət başçılarını, beynəlxalq təşkilatları, elm adamlarını, nüfuzlu siyasətçiləri, iqtisadçıları, biznesmenləri birliyə cəlb etmək, onların arasında əlaqə yaratmaq və dünyada yaranmış iqtisadi problemlərin birgə aradan qaldırılmasına nail olmaq, yeni beynəlxalq iqtisadi layihələrin həyata keçirilməsini müzakirə və təşkil etməkdir. Bu mənada Davos Forumu dünyanın başlıca siyasi, sosial və iqtisadi problemlərinin müzakirəsi üçün ideal məkan hesab olunur.

Davos İqtisadi Forumunun əhəmiyyətini artıran mühüm göstəricilərdən biri də burada dünyanın birillik iqtisadi gündəliyinin müəyyən edilməsidir. Bu işə Azərbaycan da öz töhfəsini verir. Çünki ölkəmiz artıq dünyada etibarlı tərəfdaş kimi tanınır və qəbul edilir. Forum çoxsaylı mövzular üzrə sessiyalardan ibarətdir ki, burada müzakirə olunan mövzuların təməlində Azərbaycan və onun qazandığı uğurlar da var.

Artıq neçə illərdir ki, Dünya İqtisadi Forumunda uğurla təmsil olunan Azərbaycana burada maraq həmişə böyükdür. Bu maraq Prezident İlham Əliyevin keçirdiyi görüşlərdən də hiss olunur. Əsas diqqət çəkən məqamlardan biri foruma qatılan ölkələrin Azərbaycanın dünyanın iqtisadi sistemindəki rolunu yüksək qiymətləndirməsi və bəşəriyyəti narahat edən risklərin aradan qaldırılmasında ölkəmizin mövqeyi ilə hesablaşmasıdır. Azərbaycanın malik olduğu potensial, özünün iqtisadi inkişafına görə dünyada lider olan ölkəmizin malik olduğu enerji resursları Dünya İqtisadi Forumunun da əsas diqqət ayırdığı məsələlər sırasına daxildir. Azərbaycanın beynəlxalq birlikdəki mövqeyi Dünya İqtisadi Forumu çərçivəsində keçirilən görüşlərin məzmunundan da hiss olunur. Bunu onunla izah etmək olar ki, Dünya İqtisadi Forumu hər il yanvar ayında Davosda baş tutan toplantıda Azərbaycanın da təmsil olunmasında maraqlıdır. Çünki ölkəmizin malik olduğu iqtisadi güc bu marağı şərtləndirən əsas amildir.

43-cü forum "Dayanıqlı dinamizm" mövzusuna həsr olundu

Bu il yanvarın 23-dən 27-dək Davosda Dünya İqtisadi Forumunun sayca 43-cü illik toplantısı keçirildi. Dünyanın vəziyyətinin yaxşılaşdırılması, mövcud problemlərin həlli qlobal əməkdaşlığın həyata keçirilməsini tələb edir. Bu isə, öz növbəsində, hökumət, biznes, media, elm, din, incəsənət, vətəndaş cəmiyyəti daxil olmaqla, bütün sahələrin təmsilçilərinin sıx əməkdaşlığı zərurətini yaradır. Bu məqsədlə Dünya İqtisadi Forumunun 43-cü illik toplantısı da əvvəllər olduğu kimi, dünyanın siyasi-iqtisadi həyatının bütün sahələrindən olan rəhbərləri öz işinə cəlb etmişdi. Budəfəki forumda 100-dən çox ölkədən 2500-dən artıq nümayəndə, o cümlədən 50 ölkənin dövlət və hökumət başçıları, biznes, vətəndaş cəmiyyəti və elmi dairələrin 1500-dən yuxarı təmsilçisi iştirak edirdi. Onların iştirakı ilə bu dəfə "Dayanıqlı dinamizm" mövzusuna həsr olunan forumda qlobal maliyyə böhranının aradan qaldırılması, beynəlxalq, regional və sahəvi dəyişikliklərin təşviq edilməsi, qlobal enerji və maliyyə məsələləri, eləcə də Çin, Rusiya, Latın Amerikası və Şərqi Asiyadakı iqtisadi inkişaf müzakirə olundu. Bütövlükdə forum çərçivəsində keçirilən hər bir sessiyada müasir dövrün iqtisadi problemlərinin, qlobal inkişafın doğurduğu əsas çətinliklərin həlli üçün işgüzar tərəfdaşlığın genişlənməsinə yardım məsələləri, o cümlədən maliyyə və iqtisadi böhrandan çıxış yolları ilə bağlı söhbətlər aparıldı.

Forumun qurucusu Klaus Şvab 2013-cü il toplantısına dair fikirlərini belə ifadə etmişdir: "İlkin olaraq qlobal məsələlərin nikbin istiqamətdə həll edilməsini arzulayırıq. İkinci olaraq, bir çox qlobal siyasətin yenidən hazırlanmasını gözləyirik. Üçüncü olaraq isə, bu forumda insanların daha yaxşı vətandaş ruhu qazanaraq ictimai inkişaf üçün daha güclü məsuliyyət hissinə malik olmalarını istəyirik. Daha çox inkişaf etmək üçün dinamizm, yəni cəsarətli dünyagörüşü və cəsur həmlələr lazımdır. 2013-cü ildəki liderlik həm sabitlik, həm də dinamizmi vacib görür".

Prezident İlham Əliyevin Davosa səfəri ötən illərdə olduğu kimi, səmərəli və məhsuldar keçdi

43-cü Davos Forumunda Azərbaycan Prezidenti İlham Əliyev də iştirak edirdi. Azərbaycan Prezidentinin forum çərçivəsində qrafikinin sıx olması, keçirdiyi çoxsaylı görüşlər bir daha ölkəmizə olan maraqdan xəbər verirdi.

Xatırladaq ki, Prezident İlham Əliyev Davos İqtisadi Forumunda dövlət başçısı kimi ilk dəfə 2007-ci ildə iştirak edib. Həmin il forum "Güclərin qlobal balansının yerdəyişməsi" devizi altında keçirilib. Forum çərçivəsində keçirilən "Neft geosiyasətinin artan əhəmiyyəti" mövzusunda ilk iclasında çıxış edən Prezident İlham Əliyev ölkəmizdə həyata keçirilən qlobal enerji layihələrinin bütün dünya üçün əhəmiyyətli olduğunu bildirmişdi. Enerji təhlükəsizliyi məsələsində Azərbaycanın rolunun günbəgün artdığını bildirən dövlət başçısı energetika sahəsində əldə olunan uğurların bütövlükdə region üçün əhəmiyyətini qeyd etmişdi.

Ötən illərdə bütün sahələr üzrə dinamik inkişaf yolunda uğurla irəliləyən Azərbaycan artıq həm dünyanın və Avropanın enerji təhlükəsizliyinin təminatında mühüm rol oynayan, həm də regionda əsas söz sahibi olan ölkədir. Bu mənada Azərbaycan Prezidentinin hər il keçirilən Davos İqtisadi Forumunda iştirakı dünyanın siyasi elitasının, nəhəng biznes strukturlarının və nüfuzlu KİV-lərin diqqət mərkəzində olur. Bu isə ondan xəbər verir ki, Avropa siyasətçiləri, dövlət rəhbərləri, iqtisadçılar bir çox məsələlər barədə məsləhətləşmələrdə Azərbaycanın mövqeyinə ehtiyac duyurlar. Ən əsası, beynəlxalq iqtisadi əməkdaşlıqda və yanacaq-enerji resurslarının dünya iqtisadi bölgüsündə Azərbaycanın mühüm əhəmiyyətini nəzərə alaraq, vacib qərarların qəbul olunmasında ölkəmizlə razılaşdıqlarını göstərirlər. Davos Forumunun hər dəfə yekunları təsdiqləyir ki, respublikamızın dünyada artan nüfuzu və etibarlı tərəfdaş olması iqtisadi güclər tərəfindən qəbul olunur və dövlət başçısının ümumdünya miqyaslı müzakirələrdə fikirləri, təklifləri müstəsna əhəmiyyəti ilə fərqlənir.

Azərbaycan Prezidenti cənab İlham Əliyevin Davosa builki səfəri də ötən illərdə olduğu kimi, olduqca səmərəli və məhsuldar keçdi. Bunu cənab Prezidentin keçirdiyi görüşlər də təsdiq edir. Belə ki, bir neçə günlük forum çərçivəsində Prezident İlham Əliyevin İsveçrə Konfederasiyasının Prezidenti Ueli Maurer, İsrail Dövlətinin Prezidenti Şimon Peres, Türkiyə Respublikasının xarici işlər naziri Əhməd Davudoğlu, Ukraynanın sabiq prezidenti Leonid Kuçma ilə görüşlərində ikitərəfli münasibətlərinin hazırkı vəziyyəti və perspektivləri ilə bağlı məsələlərə dair fikir mübadiləsi aparıldı.

Prezident İlham Əliyevin ABŞ-ın qlobal layihələr üzrə tanınmış konsaltinq şirkəti "Booz&CO"nun baş icraçı direktoru Çezare Maynardi, "Holcim Group" şirkətinin rəhbəri Bernard Fontana, ABŞ-ın qlobal layihələrinin idarəçiliyi üzrə tanınmış konsaltinq şirkəti "McKinsey&Company"nin rəhbəri Dominik Barton, BP şirkətinin sədri Karl-Henrik Svanberq, Beynəlxalq Maliyyə Korporasiyasının baş icraçı direktoru Cin Yonq Kay, "Total" şirkətinin rəhbəri Kristof de Marjeri, Avropa Yenidənqurma və İnkişaf Bankının prezidenti Suma Çakrabarti, "Microsoft İnternational" şirkətinin prezidenti Jan Filip Kurtua, "Thales Alenia Space" şirkətinin prezidenti Jan-Lö Qalle, "GDF Suez" şirkətinin sədr müavini və prezidenti Jan Fransua Sirelli ilə görüşlərində isə ölkəmizdəki işgüzar mühit yüksək qiymətləndirildi. Xarici şirkətlərin təmsilçiləri ölkəmizlə işgüzar əməkdaşlığa önəm verdiklərini, yeni layihələr üzrə fəaliyyət göstərməkdə maraqlı olduqlarını qeyd etdilər.

Ölkənin təqdimatını keçirmək üçün ən yaxşı məkan

Prezident İlham Əliyev Davosda Dünya İqtisadi Forumunun "Mərkəzi Asiya üçün yeni üfüqlər" və "Neft və qaz idarəçilərinin toplantısı" mövzusunda keçirilən sessiyalarında iştirak edib. Bir sıra ölkələrin rəsmilərinin, beynəlxalq təşkilatların nümayəndələrinin iştirak etdiyi "Mərkəzi Asiya üçün yeni üfüqlər" sessiyasında çıxış edən Prezident İlham Əliyev ölkəmizdə gedən iqtisadi inkişaf prosesləri barədə danışdı, son illərdə Azərbaycanda yüksək dinamik inkişafın müşahidə olunduğunu, ümumi daxili məhsulun üç dəfə artdığını diqqətə çatdırdı. Enerji sahəsində Azərbaycanın əldə etdiyi uğurlardan bəhs edən Prezident İlham Əliyev bildirdi ki, ölkəmizdə qeyri-enerji sektorunun da inkişafı diqqət mərkəzində saxlanılır və bununla bağlı bir çox layihələr həyata keçirilir. Dövlət bu sahədə dəstəyini hər zaman nümayiş etdirir.

Dünyada neft və qaz sahəsində tanınmış mütəxəssislərin iştirak etdiyi "Neft və qaz idarəçilərinin toplantısı" sessiyasında Prezident İlham Əliyev Azərbaycanın neft-qaz sektorunda kibertəhlükəsizliyin və ümumilikdə təhlükəsizliyin təmin olunması mövzusunda çıxış etdi. Dövlət başçısı uzun illərdir Azərbaycanın qlobal enerji layihələrində iştirakına diqqət çəkərək ölkəmizin bu sahədə qazandığı uğurları diqqətə çatdırdı. Azərbaycanda bu sahədə təhlükəsizlik tədbirlərinin yüksək səviyyədə təşkil olunduğunu bildirən, uzun illərdir ölkəmizdə bununla bağlı hər hansı bir problemin yaranmadığını qeyd edən Prezident İlham Əliyev ölkəmizin regional enerji təhlükəsizlik sistemində xüsusi rol oynadığını bildirdi.

Prezident İlham Əliyevin həm keçirdiyi görüşlər, həm də iştirak etdiyi sessiyalar Azərbaycanın dünyada tanıtımı baxımından müstəsna əhəmiyyətə malikdir. Dövlət başçısı "CNN-İnternational" televiziya kanalına müsahibəsində bu barədə deyib: "Dünya İqtisadi Forumu bu baxımdan ən əlverişli məkandır. Yəni burada beynəlxalq biznes və siyasi dairələrin elitası toplaşır. Beləliklə, aparıcı beynəlxalq şirkətlərin rəhbərləri və nümayəndələri buraya gəlirlər. Ona görə də bura ölkənin təqdimatını keçirmək üçün ən yaxşı məkandır... Bu gün bizim iqtisadiyyatımız çox sabitdir. Biz iqtisadi böhran illərində belə inkişafımızı davam etdirə bilmişik. Azərbaycan iqtisadiyyatı dünyada ən sürətlə inkişaf edən iqtisadiyyatlardan biridir. Biz 10 ildən də az müddətdə ümumi daxili məhsulu üç dəfə, yəni 300 faizdən çox artıra bilmişik. Hazırda iqtisadiyyatımız daha da şaxələndirilib. Bu, təkcə enerji sahəsinə aid deyil. Hazırda bizim əsas məqsədimiz Azərbaycanın qeyri-enerji sektoruna, xüsusilə yüksək texnologiyalar, informasiya-kommunikasiya texnologiyaları və xidmət sahələrinə investisiyaları cəlb etməkdir".

Dünya İqtisadi Forumu Bakıda keçiriləcək

Məlum olduğu kimi, ötən il Davos Forumu çərçivəsində təşkilatçılar ölkəmizin dünyada artan rolunu, həmçinin Azərbaycanın ötən illərdə Davos Forumunda fəal iştirakını nəzərə alaraq, Azərbaycanın xüsusi ölkə panelini də təşkil etmişdilər. Paneldə iştrak edən Azərbaycan Respublikasının Prezidenti İlham Əliyev İKT məsələləri üzərində xüsusi dayanmış, ölkəmizdə internet azadlıqlarının, internetin, həmçinin onun xidmətlərinin artımındakı müsbət rolundan danışmış, ölkəmizdə informasiya texnologiyalarının və təhsilin prioritet sahələr olduğunu bir daha bəyan etmişdi.

Bu dəfə isə Azərbaycanın sürətli iqtisadi inkişafını nəzərə alaraq, Dünya İqtisadi Forumunun bu ilin aprelində Bakıda keçirilməsi barədə razılığa gəlinib. Bu barədə məlumat Prezident İlham Əliyevin Davosda Dünya İqtisadi Forumunun icraçı sədri Klaus Şvab ilə görüşündə verildi. Qeyd edək ki, görüşdə Azərbaycan ilə Dünya İqtisadi Forumu arasında əməkdaşlığın inkişafından məmnunluq ifadə edildi. Bu əlaqələrin son illərdə inkişaf edərək yeni mərhələyə daxil olduğu bildirildi. Bu forumun, eyni zamanda, Azərbaycan ilə Avropa İttifaqı arasında əməkdaşlığa müsbət təsir göstərdiyi xüsusi qeyd olundu. Ümumi razılığa əsasən, Dünya İqtisadi Forumunun bu ilin aprelində Bakıda keçiriləcəyi və bunun mühüm hadisə olacağı vurğulandı.

Azərbaycan artıq bütün dünyada beynəlxalq tədbirlərin keçirildiyi mərkəz statusunu qazanıb. Bu gün çağdaş dünyamızı düşündürən bir sıra aktual məsələlər məhz Bakıda müzakirə olunur. 2013-cü il Azərbaycanda həm də "İnformasiya-kommunikasiya texnologiyaları ili" elan edilib. Təbii ki, forumun Bakıda keçirilməsi ilə bağlı qərarın qəbulunda bu amillər əsas rol oynayıb. Bütövlükdə Bakıda keçiriləcək Dünya İqtisadi Forumu Cənubi Qafqaz və Orta Asiya regionlarında əməkdaşlığın və inteqrasiyanın inkişafına töhfəsini verəcək.

43-cü Davos İqtisadi Forumu Azərbaycan üçün uğurlu oldu. Budəfəki toplantı Azərbaycanın dünya birliyindəki yerini, dünyanın və Avropanın enerji təhlükəsizliyinin təmin olunmasındakı mühüm rolunu, sürətli inkişafını bir daha beynəlxalq ictimaiyyətə tanıtdı. Forum həm də onu sübut etdi ki, Azərbaycanın qlobal məsələlərdə həyata keçirdiyi siyasət, nümayiş etdirdiyi mövqe beynəlxalq miqyasda qəbul olunur.

Rəşad CƏFƏRLİ

Azərbaycan.-2013.- 31 yanvar.- S.3.